Da la Bassa Padovana

Me zia Iseta
’Na dona de altri tenpi, co i piè par tera, ma i oci rivolti al celo.

Me zia Iseta (Elisa).

I fiòi de la Iseta, ne i ani ’50 emigrà prima a Poggio Rusco (MN) e dopo a Bastiglia (MO).

La xe nata ultima de oto fiòi, la ga inparà da i fradèi a stare al mondo, ma piassè da so mama, me bisnona Maria che, anca se la jera analfabeta, la savéa fare i conti mèjo de on ragioniere e la dirigéa la canpagna, dàndoghe ordini a i òmani, al boaro, ma anca al marìo e a i fiòi.
Me zia Iseta non la jera mia me zia, par via che la jera la sorela de me nono; alora a gavarìa dovesto ciamarla “prozia” Iseta, in pi non la se ciamava gnanca Iseta, ma Elisa, ma alora bastava capirse! ’Desso se non te ghè nome, cognome, codice fiscale, l’Iban, el codice Ateco, la password... a non te si nessun.
La Iseta, nata el 28 dissenbre 1893, la ga vivesto con me bisnoni e so fradèi fin a coando che la se ga sposà con Fausto Maggiolo (1894-1973) el 29 genaro del 1921.
Durante la Grande Guera, assieme a so mama, la ga mandà avanti la canpagna de le Gronpe, indove ca son nato anca mi, parché i quatro fradèi i xe stà riciamà come soldà.
Alora a vegnéa somenà tanto fromento in te i canpi, che el vegnéa requisìo, assieme a bo e cavài, par darghe da magnare a i soldà al fronte, e intanto la gente a casa faséa la fame. Dal fornaro el pan el jera razionà, la ciopa in pi bisognava scóndarla.
Ma me zia Iseta e so mama le ga catà el modo de darghe da magnare a la gente, vendendo ’na parte del fromento al mercato nero, sperando che nessun nesse a controlare ste dó done.
Cossì le ga mucià schei che le scondéa dapartuto, par paura de i ladri. Có xe tornà i fradèi da soldà le ga destirà sti schei so la tola, coerzéndola tuta, contente che mai! I quatro fradèi, co sti schei, i ga conprà canpi senza intestàrghene gnanca uno a la Iseta che la gavéa laorà e ris-cià par tuti. Solo pi tardi i ghe ga dà on pochi de schei anca a ela.
Sposàndose la ga mantegnù el spirito e i insegnamenti de so mama, spinzendo i quatro fiòi a restare uniti par coltivare insieme la tera che on poco a la volta i ga conprà vizin a Modena. Ne i ani ’70 i ga verto on spacio de carne e de formaji de propria produzion, laorando tuti insieme e anca con le so spose. Oncora ’desso che i fiòi de me zia Iseta i ga ’torno i 90 ani de età e i canpi i xe cressù con lori, la tera i la laora insieme d’amore e d’acordo.
Coando che ghe jera on laoro da fare, so marìo el ghe diséa a la Iseta:
“… A lo faremo doman” e ela la ghe rispondéa in preciso italiàn:
“Non rimandare a domani quello che puoi fare oggi!”
Ma non la ga mai podesto conpatire el fato che in Emilia la gente nesse poco in cesa. Ela la jera stà tirà sù da so mama con ’na vita tra casa, canpi e cesa, e non la capìa sta mentalità e el conportamento de sta gente.
La staséa de fronte a la strada che porta al cimitero de sto paese vizin a Modena e, coando ca naséa catarla, la me contava come ca jera i funerài lì e la me diséa:
“… Có i more i li porta al cimitero senza nare in cesa, come i mas-ci!”
La xe canpà 95 ani, senpre atenta a tuto coelo che sucedéa in te le fameje de i fiòi, in stala e in te i canpi, e coando che xe stà la so ora la se xe indormezà par senpre con la serenità de i giusti.

[torna sopra]