Da Verona

Che delusion!

“I me abrassa in vita, prima uno e dopo quel’altro.”

“Nona, avemo proà a abrassar anca el nono, ma… no la n’è mia nà riessa!”

Tanto par canbiar me telèfona la me amiga. L’è piassè de un ano che ciacolemo a distansa parché in presensa l’è inpossìbile par via del Covid e de tuto quel che ghe va drio.
Ne catemo, de sotoventovìa, solo al luni al banco del formajo a i Scalsi*, al marti al camio de i fiori a san Zen, al mèrcoli al cimitero de Quinsan par recapitar i fiori conprè el giorno prima senò i spanisse, al giòvedi al marcà de la Coldireti a l’Arsenal, al vènardi al supermercato par la spesa grossa e a la domìnica in cesa.
El sabo l’è el giorno ‘without ciàciare ‘ cioè sensa ciàcole parché ela l’è inpegnà co i neodi, mi sponso. A pensarghe ben, da quando ghè el virus ne vedemo piassè de prima ma i nostri incontri i è concentrè par le tante robe da dirne e i tenpi struchè, perciò ‘altamente stressanti’ (come el dise el so omo quando la vien de ’olta e la pòtola par el mal de testa).
Finìo de far la spesa, ne saludemo e ogniuna la va par la so strada. L’è bela da védar che, par no lassar i discorsi a metà, apena rivè a casa, ne tachemo al telèfono par finirli!
“Ciao bela, come steto?” la me domanda.
“Come diese minuti fà quando ne semo saludè dal formajar, precisa identica, forsi un eto piassè parché ò ’pena magnà na pontina de grana con un rosegoto de pan. No te sito mia incorta che me son ingrassà? A star serà dentro sèito savatar dal sofà a la cusina e fico zo tuto quel che cato drio strada.”
“A propòsito che te t’è ingrassà, ghe n’ò una de bele da contarte…” e la parte con n’altra de le so storie.
“Donca, sabo passà riva me neodeti con so mama e so papà par disnar. I core de paca in cusina e i taca a usmar parché i vol védar cossa metarò in tola. Come ogni sabo ghe digo che i me par ancora piassè grandi de la stimana prima, che i ga le ganbe senpre più longhe. Lori i se sòssola a sentir ste robe. In coro i me dise: – Anca i brassi, nona, varda che longhi! – e intanto i me abrassa in vita, prima uno e dopo quel’altro. – Varda, nona, che brassi longhi! Rivemo parfin a tocarne le mane dedrìo a la to schena! – Mi rido, i s-ciuciono un fiantin, un colpo uno, un colpo quel’altro, e ritaco a spignatar. Son invià a minestrar quando uno de i du, no so qual (i confondo ancora dopo sinque ani), el me vien vissin co i ocioni spalanchè e na làgrima in pingolon, indecisa se rugolar fora del tuto o tor sù le so tanpeline e far dietro front. Capisso de paca che el ga bisogno de conforto, me ghe cucio denansi e ghe domando parché l’è cosita avilìo. La làgrima la inesta la retromarcia, lu el me se posta al pèto e el me dise…”
“Cossa?” voi saver mi.
Ela, da gran palchista come l’è, la me spedisse un sospiro telefònico e la me risponde:
“Al picinela, poarin, ghè vegnùo el dubio de no èssar po’ tanto grando e con brassi e ganbe tanto longhi parché el m’à dito: – Nona, avemo proà a abrassar anca el nono, ma no la n’è mia nà riessa!”

* Gli Scalzi indicano la zona, molto circoscritta, che gravita davanti alla chiesa di santa Teresa agli Scalzi, con annesso convento, che fu fondata a partire dal 1666, ultimata solo nel 1750 e tuttora retta dai Padri Carmelitani Scalzi, una congregazione religiosa che rimanda a santa Teresa d’Avila e a san Giovanni della Croce.

[torna sopra]