|
Da Tombazosana (VR)
Chel bruto pozzo maledeto
Quanti bei ricordi che me porta el pensiero del paese indo’ che son nata: San Pietro di Morubio. Quanti ani ghè passà...
Me ricordo de la nostra casa granda, con tre fameje numerose: la mia con me papà Gaetano, dito Tano, me mama Albertina, ciamà da tuti Berti, e oto fiói, el zio Pietro co la zia Teresa e oto fiói anca lori, zio Agostino co la zia Viola che i gavarìa ’vù oto fiói anca lori, ma quatro i jè morti da pochi mesi de malatìe che alora no ghera cure. Se vedéa spesso in quei ani funerài de butini pìcoli; al dì de ancó certe malatìe jè stè eliminè par fortuna.
Dedrìo a la casa, ghera un canpeto con tirele de vegne, piante da fruto e un bel'orto grando, con verdure de ogni bendedìo. In un canton ghera un pozzo fondo, con dessora el so fero fato a arco, con la carùcola, la cadena, el ganzo par tacarghe el secio; se tirava sù l'aqua che servéa par bearar le bestie in stala, e daquare l'orto. In casa se doparava l'aqua de la ponpa come gavéa tuti. Le nostre mame le ne racomandava de starghe distante da chel pozzo, parché l'era pericoloso par noantri buteleti.
Èrimo un bel s-ciapo de fiói; tra fradèi e cusini èrimo in vinti, mi era la terz’ultima de tuta la squadra, gavéa sete ani circa, i altri da i nove a i trèdese ani e oltre. Noantri èrimo senpre lì su chel canpo a zugar, se coréimo drio, se scondéimo de drio a i pajari, ranpegàimo su i àlbari, ghe ne conbinàimo de tuti i colori.
Un dopodisnar, fin che i nostri genitori in casa i faséa el ponsin, el grupo piassè grando el s’à inventà un zugo pericoloso: i se misurava el corajo, ci era boni de scavalcar sto pozzo, così lori pi grandi de mi, i montava su la piera, i se tacava con i brazzi al fero de sora e i faséa un bel salto da l'altra parte; quando me tocava mi, i à scomizzià tórme in giro e rìdare, sfidàndome e dire che non sarìa stà bona de far come lori. Alora mi, contro la me volontà, con na paura da mati, m’ò fato forza, anca se me batéa el cor da la fifa, son montà su sta piera, m’ò tacà al fero de sora, ò guardà drento l'era fondo e nero, ma decisa, ò fato un salto da l'altra parte.
No sò come ò fato, ma era orgoliosa parché a i jò fati tasere. Certo che se avesse fato el passo falso, i sarìa stà guai: anca al pensarghe ben, era pìcola. Ò giurà che no avarìa fato pi chel gesto da incossiente.
Maledeto chel pozzo! Dopo tanti ani, quando ghe penso, me sento ancora el teror che ò proà chela olta, ma son stà forte.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Dovemo salvare la dona
Quando telegiornài e giornài, quasi tuti i giorni, i taca co notizie de violenza su le done, vol dire che semo so na bruta strada. Xe ora de afrontare seriamente el problema e de inpegnarse tuti, par far cessare sta guera infame de l’omo contro la dona.
de de Mario Sileno Klein
Da la Bassa Padovana
Me zia Iseta
’Na dona de altri tenpi, co i piè par tera, ma i oci rivolti al celo.
de de Roberto Soliman
|
