|
Editoriale
Volemo canbiare el mondo?
La xe na domanda che ga tormentà l’omo de ogni tenpo. Par na rason o par naltra, el mondo de oncò el xe drio passàrsela maloto. Ocore intervegnere. Ma come? Forse partendo da quelo che n’à insegnà la pandemia, canbiando el córe e la cossienza.
 | | Co l’inpegno de tuti… podemo tentare de canbiare sto mondo. |
No ghe xe dubi: el mondo no ’l pol pi restare come che ’l xe ’desso, propio in sto tenpo che semo drio vìvare, tra tanponi, vacini, regole nove, limitazion de libertà individuale e contrasti radegosi de quei che no vole sotostare a i comandi… Se po’ ghe zontemo la situazion del mondo del lavoro e quela del canbiamento climàtico con le conseguenze del riscaldamento globale che cressarà da 2°C a 4°C entro fine secolo, se ghe tegnemo a vìvare, semo costreti a inventarse de tuto, par no fare la fine del poro sugaman che, struca struca, el xe da butar via.
Dunque, no ghe xe scùrtoli o scurtarole, parché l’alternativa xe la fine de tuto… e de tuti. E questo ne dispiasarìa propio, parché ghe semo drento anca noantri.
D’altronde, a xe on tòco che el tenpo tànbara, che el celo se ga fato scuro e l’aria minaciosa: e se no se canbia, i xe afari seri. Al primo posto ghe xe el razismo, el fondamentalismo e el terorismo che se sconde drio le religion: tuti mostri che sta metendo a ris-cio l’umanità.
Nonostante che in Italia, ma anca in tuto l’Ocidente in generale, ghe sia la sensazion de vìvare in un “mondo de pace”, ne i vari continenti no manca le situazion de guera, come quela che ghe xe in Birmania tra la minoranza musulmana, vegnù dal Bangladesh, e i Kachin, altra minoranza cristiana. E no parlemo de le proteste sociali contro el governo in Burkina Faso o de le lote che ghe xe in Libia, dove par difendare i so intaressi se scontra Russia, Egitto, Turchia e Arabia Saudita. Parlemo pure de la situazion tra Pakistan e India con i massacri de miliziani cristiani contro le popolazion musulmane; parlemo de Ucraina, de Venezuela, de Yemen, Iraq e Nigeria, ma anca de Israele e Palestina. Ricordando el rapimento de le 276 studentesse de tenpo fà, pensemo al massacro de le 40 tosete drio vegner fora da scola a Kabul, in Afghanistan, capità in sti giorni.
I xe tuti segni del necessario canbiamento. Pecato che ghe voja senpre disastri cussì grandi par svejare i sordi, i tièpidi, i incrèduli, ma d’altronde la xe senpre stà cussì. E par canbiare, bisogna che metemo da parte la rabia, el dolore, el senso de ribelion, la voja de vendeta e, soratuto, el comercio de le armi… se no volemo che i morti no i sia morti par gnente. Quante vìtime ghe vole oncora, par decìdare de canbiare el nostro córe e la cossienza.
Pare propio che i òmeni no i gabia inparà gnente da i mali del passato e i ga senpre la stessa cativeria. Ma come se fa a no comòvarse e indignarse davanti a l’infamia de i putini africani, drogà e mandà a conbàtare, o davanti a la miseria che colpisse on terzo del mondo. Alora, se volemo canbiarlo (anca se ne vien qualche dubio so ’l risultato de le nostre bone intenzion), partimo da la stragrande necessità de amore che ga le creature de sto mondo.
Basta vardare i pìcoli o grandi ràdeghi tra le persone; el calo de la reciproca soportazion; le union provisorie e pronte a la separazion; el matrimonio che fa paura par l’inpegno: insoma trionfa senpre l’individualismo, segno de mancanza de amore.
Me ga colpìo, propio in sti giorni, uno de i raconti del libro Cuore de Edmondo De Amicis e precisamente “L’Asilo Infantile”. Vien l’ora de la ricreazion e sti putini i va in cortile. Ghe ne sarà stà vinti intorno a on scrìciolo alto cussì, che ’l gavéa in man on scartozeto de zùcaro: tuti a rufianarse par ’verghe el parmesso de pociarghe el pan, e sto putin a calcheduni el ghe lo dava e, a de i altri, dopo che i l’avéa ben inplorà, el ghe inprestava solo el so déo da ciuciare.
Me son inborezà, ma te ’l stesso tenpo a go pensà a la necessità de inparare a vìvare propio da i putini: l’inocenza, l’ingenuità, la generosità che ga lori, li aiuta a créssare nel mèjo senso de la parola.
Quante volte ghemo dito par scherzo: “Ah, se podesse tornare indrìo!” Ben, stavolta disémolo sul serio e fémolo: tornemo indrìo, tornemo a vìvare co manco aroganza, cativeria, egoismo e superbia. Inparemo a vìvare da i putini… e cussì faremo calcossa par canbiare el mondo!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Volemo canbiare el mondo?
La xe na domanda che ga tormentà l’omo de ogni tenpo. Par na rason o par naltra, el mondo de oncò el xe drio passàrsela maloto. Ocore intervegnere. Ma come? Forse partendo da quelo che n’à insegnà la pandemia, canbiando el córe e la cossienza.
de Mario Sileno Klein
Poeti veneti
Lodovico Pastò
Poeta dialetale del ’700
de Fiorenzo Zampieri
|
