Da Mestre-Venezia

Rìdar par no piànsar

Un gato de la me amiga: el ga parfin l'aparechio par drissarghe i denti.

Difìssile rìdar in momenti come questi. Par de èssar in guera, a contar morti e vardar confini che canbia: ora zali, ora arancioni, ora rossi, no se ghe sta drìo; par no parlar de le restrission. De securo la più dura xe quela de no poderse mòvar, tuti serài sù se ga da star!
Ben se sa, però, che fata la lege, trovà l'ingano... anca se in ’sto caso se pol pagar cara la trasgression, ma de le volte bisogna proprio ciapar la màchina; cussì ognun se inzegna come mèjo pol par trovar cossa scrìvar par descolparse ne l'autocertificassion da mostrar a le guardie in caso lo fermasse. Par esenpio, el moroso de ’na me vecia colega, restada vedova ani indrìo, ma che ga ancora morbin e che patisse a star sola, visto che el sta su naltro paese, secondo i pati de: “insieme, ma ogniun a casa sua”, par poderla ’ndar a catar el ga messo ’na tola nel bagaliaio de la màchina, cussì se i lo ferma el fa da védar che el xe drìo portar ajuto a ’na ansiana sola, che causa el colpo de la strega no la se pol mòvar, la xe in leto e ghe vol la tola soto el stramasso par far si che la se senta più solevada. Se no i ghe crede i pol telefonarghe che se la xe bona de slongar un brasso e ciapar el celulare la ghe lo conferma. Invense la me amiga de Treviso che ga sìe gati e trova mile rason par ’ndar de qua o de là, la ciapa sù un gato, lo inpira in cheba e la lo mete in màchina: se i la ferma la ghe dise che la xe drìo portarlo dal vetrinario. Xe da dir che par no savariar massa ’ste bestie, che no ama girar in màchina, la li ciapa sù a turno, sensa problemi, visto che i xe tuti veci e pieni de magagne; par che li gabia anca le pùlesi, ciapàe de sicuro dal gatasso de la so zermana che la gera ’ndada a catar par jutarla a far el bagno, visto che la ga paura de sbrissar.
’Na me vissina de casa, invense, la fa un ato de autolesionismo, se podarìa dir, o mèjo la se grata ogni zorno un brufolo in maniera che se la ghe cava la crostina ghe vien fora sangue e sicome la tol de tuto par la circolassion, el sangue fa fadiga a fermarse, cussì par sicuressa, xe ben che la vada in pronto socorso co el brasso infassà, se po’ i la fermasse distante da l'ospeal che xe in santa malora, la dirà che da la paura la ga fato confusion e sbalià strada.
Par fortuna che co el vacino le robe dovarìa ’ndar mèjo e finalmente poder respirar. Eco ’lora che tuti i vecioti se dà da far a prenotar o respóndar a la convocassion; cussì go fato anca mi e ancora no sò parché i me ga dà l'apuntamento a Venessia, anca se stago a Mestre.
Sabo 10 de april a le ùndese gero in Piassal Roma, go visto subito dove che gera el posto dal mucio de zente ferma a spetar, ma i gera tuti aconpagnatori, parché chi gaveva da far el vacino ’ndava subito drento. Bisogna proprio dir che tuti xe stai de ’na gentilessa granda e roba da no crédar l'organisassion no la podeva èssar mèjo. Dopo el controlo de le carte e le tessere varie i me ga fato comodar ente ’na saleta co naltra ventena de àneme, quasi tute done e tute vece, ma a dir el vero le gaveva poco o manco i me ani! Go capìo subito che ’na diesena de lore se conosseva e gera rivàe tute insieme, le ciacolava che gera un piasser e me ga dispiasso de no ’ver sentìo tuti i discorsi, parché xe stà un spasso.
Una co do ganbe che somejava a dó tronboni se lamentava par i dolori a i piè: “... Ciò, xe da squasi un ano che no me movo da casa, le spese me le porta la Giana che ga un cuor grando… Vogia go de inpirarme le scarpe! Me ga tocà métarme le papusse. Chi no vol, no varda...”
“Ma, Tosca, – ghe fa quela sentada da vissin, – parcossa te si vegnùa qua, no ghe gera un posto più tacà a la Giudeca?”
“Quel che digo anca mi – la ghe risponde. – Ma ti sa ben che ne ga prenotà tute insieme l'assistente social co ’l so conputer, ma almanco no so da mi mi sola a montar in vaporeto, serto che go ’na agitassion!”
“Ti ga fifa?” salta sù a dir ’na doneta seca, seca vestìa co elegansa.
“Ma cossa voléo ’ver el spàsemo – dise quela sentada più distante su un canton – par ’na sponciada! Ansi savéu cossa ve digo, visto che semo in giro, go pensà de ’ndar dal tabacher a métar i numeri al loto.”
“Ciò, ti me ga leto nel pensier – fa la seca de rimando – sò anca cossa métar: intanto el 10 la data de ancuò, 45 el numero del turno che i me ga dà, po’ el terso go ancora da pensarlo...”
“Ah, ben – mete bèco quela che pareva la più sgaja – pensè che mi go el 47 morto che parla! Come terso penso de métar 49 che fa malatìa.”
“Ma no semo miga malade! – salta sù una. – Xe mègio métar 61 che fa epidemia!”
“No ti ga torto – dise quela che somejava èssar la più vecia, – ma anca el 40 che fa disgrassia granda, 61 che fa epidemia e anca vacino però, tagia la testa al toro!”
A ’sto punto l'omo che tendeva el ga dito de tàsar che le disturbava el mèdego che ne la saleta de fassa gera drìo vacinar, ma soratuto la dotoressa che leseva le carte de l'anamnesi.
“Ah, qua te vogio – fa ’na doneta tuta incancarìa e piena de fredo – par lèsar le me carte ghe vorà almanco dó zorni – e intanto la tira fora da ’na sporta un paco de carte de ospeal, par èssar za pronta a dàrghele có i la ciamava. Nessun la ga badada.
“Sentì ben, e qua finìmola, ché l'omo ne ga za crià: par terso nùmaro metemo 90 che fa paura, e no se sbalia mai!” Cussì ga serà el discorso quela co le papusse.
Se gavemo trovà dopo, tute vacinàe a ciapar el secondo apuntamento. Un bàito da no crédar có le ga leto su la carta che le doveva tornar, mi conpresa, el primo de magio... El problema sta nel fato che al primo de magio no ghe xe i vaporeti parché fa festa anca i capitani che xe al timon, e da la Giudeca, nuando no le pol proprio vegner, no le xe de securo sirene!

[torna sopra]