Da Brugine (PD)

Aida, 150 ani portài pi che ben

Grande senografìa de l’Aida a l’Arena de Verona nel 1963, direta dal maestro Tullio Serafin, che la gavéa direta za nel 1913, dando el via a l’òpara in Arena, insieme al tenore veronese Giovanni Zenatello.

150 ani fà, al Teatro de l'Opera del Cairo, vegniva presentà par èa prima volta l’Aida de Giuseppe Verdi, destinà de deventare una de ’e òpare liriche pi famose al mondo.
Tuto jera partìo dal viceré d'Egito, khedive Isma’il Pascià. Voendo portare el so Paese a on gran svilupo moderno, el gavéa comandà, fra altro, de fare el Canàe de Suez, na nova linea feroviarìa e on novo Teatro d’Opera. Sto Pascià gaveva domandà al famoso Verdi de scrìvare on ino par l’inaugurassion del Canàe de Suez, ma Verdi el ga rifiutà, disendo che no ghe ’ndava de scrìvare musica de ocasion; aeora sto Pascià pensava che sto Maestro podesse inaugurare sto teatro co’ na òpara nova, anbientà nel misterioso mondo de i faraoni, mandando da fare intermediario el famoso egitologo francese Auguste Mariette (diretore del Louvre de Parigi e fondatore del Museo del Cairo), dato che el gaveva za in mente on sogeto de sta sorte. Mariette, grassie a l'intercession del diretore de l’Operà Comique de Parigi, Camille Du Locle, l’è riussìo a far rivare ne ’e man de Verdi sto sogeto, rimanéndoghe entusiasta. Come conpenso ghe jera stà oferta eà soma de 80mila franchi, ma sicome a Verdi ghe pareva massa poco, el ga convinto el Passià de sborsàrghene squasi el dopio, ben 150mìa franchi in oro zechin.
El 5 giugno 1870, Verdi ga firmà el contrato co’ l’inpegno de presentare l’opera nel mese de zenaro del 1871, e cussì tuti i se ga messo a laorare de gran pressa. Sarà el poeta Antonio Ghislanzoni a scrìvare i versi del libreto e Mariette, par pareciare i costumi e le senografìe, se ga messo al laoro ne i ateliers del prestigioso teatro de l’Operà parigino, studiando antichi bassorilievi egiziani.
Ma in lulio xe capità eà guera sanguinosa tra Francia e Prussia, e Parigi xe finìa soto assedio. Verdi darà na parte del so conpenso par jutare i ospedài pieni de ferìi (on Verdi tanto egoista co i inpresari, ma pronto a jutare el prossimo). Purtropo sta guera gaveva blocà eà partensa par El Cairo de ’e senografìe e de i costumi, faséndoe rivare in otobre, saltando eà data de zenaro e el Teatro xe stà costreto a scominsiare eà so atività co’ l’opera Rigoletto senpre de Verdi. Dopo on gran laoro de preparassion l’Aida xe ’ndà finalmente in sèna el 24 dissenbre 1871. Verdi no el ga voesto ’ndare al Cairo: massa atension, massa spàsemo, massa mondanità par el so caràtere, e cussì el ga mandà dó righe: “Ringrazio per l’invito, ma io ho un solo desidero, che la mia opera venga eseguita nel massimo rispetto, sia vocale, strumentale e scenico.”
Xe inùtie dire che sta prima xe stà on trionfo, Verdi jera riussìo fare on spetàcoo grandioso, pensà giusto par incantare; piena de brani musicài deventài subito famosissimi, tocando el massimo ne ’a sèna del trionfo, sonà da oto longhe tronbe, fate costruire aposta, dotàe de on solo pistonsin, sconto da on pano a forma de gajardeto, co ’l risultato de sentire on suono trionfàe, solene, deventando ino nazionàe de l’Egito e dopo sigla de ’a radio del Paese.
L'8 febraro del 1872 l’Aida debuta in Italia, al Teatro a la Scala de Miàn, vegnindo saludà come on ino a i valori risorgimentài e la marcia trionfale del II ato, giudicàndoa de na unica intensità emotiva, la vegnerà sonà in tuti i eventi celebrativi de l'Unità d'Italia.
No’ se poe nominare Aida sensa cubiarla a l’Arena de Verona. Dal 1913, sta opera xe deventà el fiore a l’ochièo anca de ’a sità stessa. In sentoventi ani l’Arena se gaveva fermà solo dó volte par causa de ’e dó guere mondiài, e na terza volta xe capità l’ano passà a causa del Covid-19. Se tuto ’ndarà ben sabo 19 e marti 22 de sto mese de giugno, par recordare i 150 ani de l’Aida, ghe sarà na esecussion de gala, direta dal maestro Riccardo Muti.
Dopo, l’Arena, darà el via a la tradissionàe stajon che durarà fin setenbre, scominsiando da vènare 25 giugno co’ la Cavalleria Rusticana de Mascagni e Pagliacci de Leoncavallo e dopo Turandot de Puccini e, de Verdi, la Traviata, Nabucco e l’imancàbie Aida. Fra l’altro ghe sarà ne ’a sera del 17 agosto on concerto del pi famoso tenore de ancò: Jonas Kaufmann.
A causa del Covid-19 eà diression ga anuncià che i spetàcoi senicamente i sarà tuti novi, manco tradissionài, ma pi tecnologici, doparando i moderni mezi de projession co’ spetacoeari luci e video.

[torna sopra]