|
Editoriale
Setenbre: tuti a scola?
La xe na bela domanda, anca parché, tra giugno e setenbre, ghè ’ncora de mezo el mare del Covid, che no se sa se ’l narà a scola o se ’l tornarà tra i barbastreji de la giungla, dopo du ani da sparonzon tra i umani, portàndose via fin ’desso pi de 2,3 milioni de creature nel mondo.
 | | Quanti ricordi e nostalgià ligà a sto bancheto de scola de na volta! |
“Che confusione / sarà perché ti amo. / È un'emozione / che cresce piano piano…” cantava i Ricchi e Poveri ne l’81, giusto quarant’ani fà. Cussì anca st’ano… se vèrze el rubineto de i problemi e de la confusion.
Ogni giorno se sente robe nove che rende difìssile el problema de la scola. I studenti no taca tuti el stesso giorno, come na volta, ma secondo i calendari de le Region: a Bolzano el 6 setenbre, in Lombardia, Trento, Valle d’Aosta, Piemonte e Veneto el 13 setenbre, in Friuli Venezia Giulia, in Calabria el 20…
Za questo ne dise che no xe gnancora stà “fati” i italiani e, co pi se va ’vanti, forse gnanca pi i vegnarà “fati”.
Ma, el novo ano scolàstico el ga altri ploblemi da afrontare: tanto dipendarà da la canpagna de i vacini e da la circolazion de le varianti del virus.
Le prevision le xe brute: manca maestri, insegnanti, docenti. La politica che ghe mete el naso so tuto, no la xe bona de métarse d’acordo so sti problemi reali de la scola. La pianta de i precari la xe stracolma de fruti, ma nessun li destaca e li mete te ’l piato de l’insegnamento. Cussì ris-cia de nare da malo i fruti, i precari, e i nostri pori studenti.
“Settembre nero”, dunque, par la scola italiana? Ghe xe on grosso punto de domanda. I dati fornìi dal Ministero, region par region, i xe preocupanti: in Italia, in totale manca 107.424 insegnanti.
Solo te ’l Veneto ghe ne manca 7.578 che, zontando quei che st’ano va in pension, 2.679, i deventa 10.257.
Po’ a descàpito de l’integrazion, xe drio nàssare scole par soli putèi islàmici, pagà da i genitori, par evitare che so fiòi i se insenbra co i “ocidentài”, con insegnanti islàmici e materie de studio in base a i programi del Paese de provenienza.
La sconparsa de la zóvane pakistana Saman Abbas, 18 ani, de Novellara (RE) xe una de le tante storie de l’Italia de le tante raze (multietnica) de i ani Domila.
Na fameja riva da distante co la speranza de costruirse on futuro. L’integrazion no xe sènplice; la tradizion de on matrimonio conbinà da i genitori, el rifiuto da parte de la tosa che vole sentirse lìbera de fare le so selte, de inseguire i so sogni e i so sentimenti. La conclusion finisse ne la busa del mistero.
Alora, la parola “integrazion” la vale solo par na parte de nialtri che, ben o male, a semo drio convìnzarse che el mondo el xe canbià, che bisogna èssare toleranti e solidali, che ocore convìvare anca con chi ga idèe, fede, religion e civiltà difarenti… Civiltà, ma non primitiva.
Ma che raza de integrazion xela, se chi che xe vegnù da nialtri se ciama fora e i fa tuto un discorso par conto sóo? Xe propio fasendo ste ìsole culturali, sti saraji de prepotenza e de intoleranza, che se favorisse la mentalità razista!
Se no se parte da la scola a far créssare la civiltà de la dignità e de l’ugualianza universale, gavaremo perso in partenza la batalia del vero e civile progresso.
Anca nialtri vèneti a semo drio zercare de recuperare la conossenza de la nostra storia, de la nostra cultura, lingua e tradizion, che ghìvino un fià perso de vista.
Ma no lo femo mia creando classi par soli vèneti o brusando i libri de storia-leteratura-geografia-arte… italiane, europèe o mondiali: lo femo a fianco e insieme a la cultura de base, aumentando el nostro saère, slargando i confini e integrando la nostra cultura.
Se no se camina so sta strada, se ris-cia de deventare on Paese de stranieri in casa nostra!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Editoriale
Setenbre: tuti a scola?
La xe na bela domanda, anca parché, tra giugno e setenbre, ghè ’ncora de mezo el mare del Covid, che no se sa se ’l narà a scola o se ’l tornarà tra i barbastreji de la giungla, dopo du ani da sparonzon tra i umani, portàndose via fin ’desso pi de 2,3 milioni de creature nel mondo.
de Mario Sileno Klein
|
