Da l’Alta Padovana

’E brespe

“Varda alto-là dò gnari de brespe…”

Me mama ga destirà so ’l becon ’a late bianca che ghe gnen fora dal pecòeo de i fighi crui e in 20 minuti jera sparìi infiùdene e mae.

“Varda alto-là el gnaro de ’e brespe. ’E podarìa becare i putèi! Bisogna brusarlo!” Anca in canpagna, credendo che ’a natura da carosèo sia coéa vèra, i ze deventài ignoranti de tute ’e so creature e prunti a far fora tuto coéo che disturba ’a cartuìna.
’E brespe se fa i afari sui a inpoinare i fiuri e a magnare i peoci de i frutari inte i sete misi che ’e ga da vìvare. Se ’e te ga becà ze parché no ’e te conosséa cò te si ’ndà de zhaltron a farghe paura da massa rente.
Becuni de ave e de brespe ghin’ò ciapà diversi, ma ’a prima volta, che jero picenin, me mama ga despicà racoanti fighi crui, ’a me ga destirà so ’l becon ’a late bianca che ghe gnen fora dal pecòeo e in 20 minuti jera sparìi infiùdene e mae. Ze anca par coesto che ’torno casa go figari da farmacia pi che da pasticerìa. Na volta co sta late de figo go socorso el fiòeo de on mèdego de Milan in ferie tacà casa mia, becà so na recia da na ava (ghe jera restà picà el basaìo). Ma so pare no voéa crédare a l’evidensa de mae e gonfiore fati sparire in pressa da on rimedio naturàe e ’l ga inpienà el tosato de ’e medesine che ’l se ghea portà drio.
De tante storie che podarìa contare so ’e brespe, ghin tiro fora dò che farìa fadiga crédare se no ’e me fusse capitàe a mi.
Casa go on portegheto indove che me fermo laorare cò serve. Ghe ze ’na zhoca, on bancheto co ’a morsa, ardegne da laoro, tàtare e, so on canton, ani fà ghe jera on barbeque co ’e rode, tuto onto, che me fiòea ghea doparà dò volte e dopo ’a me ’o ghea cazhà-sù a mi. Sora ’a graèa ghe jera butà-là anca el sacheto verto de carbonèa.
On dì d’istà go deciso de darghe na sistemada e na scoada a sto àndio e pa primo go ciapà pa i bràncui sto barbeque pa tirarlo in medo ’a corte… Coestion de on àtimo… me go catà cu i brazhi pjni de brespe che, zoeando, me bisigoeava ’l péo e ’a pée, ’ndando ’vanti e indrìo:
“So’ morto!” me ga dito l’istinto che me ga anca ordinà de moeare pianeto sto trapèo.
Go fato du, tri passi indrìo e lore, come che gnente fusse, ’e se ga inbusà da novo drento el sacheto de carbonèa, ma dò ’e ze restàe fora a zoearme ’torno, caso mai che no ghesse capìo el primo aviso.
“Ma varda ti! – me so’ maravejà, invezhe de far sèsti da ebete. – Ste pore bestiòe, organizàe come on esercito, coà ’e me ga visto bàtare, far strepito e sbrase de fogo co ’a moea a disco: trafegare insoma, e no ’e se ga mai mosso fin che no so’ ’ndà spostarghe ’a casa e anca ’lora no ’e me ga fato gnente parché, conosséndome, ’e sentìa che no ’a ghea co lore. ’E sarà stae 30-40 par brazho, epure nessuna ga sgarà, becàndome.”
Cò ’o go contà in giro, i me ga dito de ’ndare inpizharghe na candèa a Santantoni, ché ze senpre merito suo cò ’e robe te ze ’ndà ben e no te sè parcossa. E ’lora se ’e ndava mae, ghea da ciapàrmea co lu?
I me ghea dato na voliera da canarini, da metro cubo, tuta de fero, rete e coerto conpresi, pa farghe el punaro a ’e gaine. D’inverno però ghe fissava ’torno veci panèi da geto e drento on bon leto de fen e foje seche indove che lore de note ’e se intanava, ché co ’l fredo, se te vui coalche ovo, bisogna che ’e se tegna calde e goernàe co paston caldo. On dì de medo autuno che jero drio pareciare sto ricovero pa l’inverno, me ze vegnesto inamente ’a brespa che ogni volta che ’ndavo tor-sù i uvi, da ani ’a me zoeava ’torno anca fin che inpiravo ’a testa e ’l brasso drento ’a portàa bassa de ’a cheba pa ciaparli co maniera.
“Chissà che fine che ’a garà fato!”
’Lora de ste bestiòe saéa sòeo che d’inverno ’e more tute, via che ’a rejna che se sconde soto tera. De colpo l’idea:
“Vuto védare che so ’l sofito del punaro ghe ze on gnaro?” Co on speceto go vardà da soto in su. “Coàeo uno, sacranon! Tre gnari, vodi ghe jera, grandi f girasùi sichi! On gnaro par ano!”
Insoma jera tre istà che coasi ogni dì metéa el copin soto ’a ghiliotina a 50 schei (cm) da i so bèchi e lore no batìa gnanca ’e ae ché ’lora ’e garìa sentìe. E me go fato convinto che se par fastidio ghesse ciapà a scapeàe e magari copà ’a brespa goardiana, ste coà me sarìa saltàe ’dosso tute inte on ame come chea volta che co ’a strazha onta da coeore ghin’ò parà-via una che se ghea podà proprio so l’ocio ’pena finìo de on ritrato ’ncora mojo e naltre dò in aguato, che no ghea visto, ’e me ga silurà suìto so ’l còeo. Anca lore zherca de diféndare ’a parentà come che farìssimo noaltri.

[torna sopra]