Da Arzergrande (PD)

Caresina

Fassi de caresina secà.

Eà racolta de ’a caresina. (foto Enrico Zarri)

So sti giorni qualcuno me ga scrito, chiedendome notìssie so uno de i argomenti de i quai go avùo modo de acenare nel me ultimo libro “Arzergrande e Vallonga, un passato di forza e di valori”. L’argomento xe eà erba carice o carex elata, in paròe povere, qua da noialtri ciamà da senpre “caresina”.
Eà xe na erba fine, che cresse a s-ciapi so eà riva de i fiumi o dove che ghe xe zone umide, come eà riva de i fossi… Ultimamente eà go vista créssare anche in mezo a i canpi. ’Torno i fossi de casa ghe ne xe raquanti s-ciapi. Mi ’asso che eà cressa e no eà tajo come che fasso co eà erba comune. Man man che eà vien sù eà controeo, eà vardo atentamente e, eà prima roba che me vien in mente xe me popà che ’l ’ndava, de matina presto, in bicicleta verso Lova, che da qua i xe circa 20 chiòmetri a tajàre eà caresina.
El tornava eà sera che jera quasi scuro, par dopo ripartire eà matina presto e ritornare eà sera. El jera un ciclo de vita che se ripeteva, come el sorgere del soe o eà marea del mare. E cossì par setimane intiere, senza sosta né sabi né doméneghe. So ’l manubrio de eà bici, na sporta de paja, dove che me mama ghe meteva qualche feta de poenta, un fià de lardo o saeame e na botilia de vin, de queo che se faseva éo so ’l vegneto.
Ghe go risposto, a ’e persone che me chiedeva notissie de eà caresina, che no xe fàssie descrìvare eà situassion che se vegneva a creare par lavorarla e portarla a casa… ’e podarìa senbrare robe de ’n altro mondo e invesse ’e xe sóeo robe de ’n altro tenpo.
Co ’l careto e eà mussa, se faseva ’e strade interne e, se ’ndare jera anche fàssie, tornare jera come ’ver fato na roba granda, na inpresa fora da eà normaità, parché se doveva caminare de fianco a eà mussa par fare in modo che no eà fasesse scati al passare de qualche màchina o tratore (pochi in verità).
El careto el jera pien stracolmo e se doveva ’ndare pian anche par evitare ’e buse so strade che eòra ’e jera sóeo de tera batùa.
Quando che, mussa e paron (me popà), i rivava in corte, ghe jera na grande sodisfassion, par ’vere fato na roba che, nel tenpo, gavarìa avùo modo de sostegnere eà fameja intiera. Ghe voeva sacrificio par stare in aqua da eà matina a eà sera, co conseguense fisiche so ’l ’ndare de i ani, prima de tuto i reumatismi.
Sacrificio par ritrovarse so un posto isoeà, dove che se capitava un maeore, no ghe jera modo de avertire nessùn… Sacrificio par portarla a casa e lavorarla in corte. I jera tenpi che no se usava guanti e a lavorare eà caresina se se ritrovava co ’e man piene de sangue.
Una de ’e particoearità de eà caresina xe proprio che è foje taja come lamete. Có i rivava, eà mussa jera tuta moja suà e me popà, se no ’l basava eà tera de casa poco ghe mancava.
Dopo venti chiòmetri a piè, co ’l pensiero che el càrego se rabaltasse par eà strada… no jera fàssie par gnente, ma eà zente de eòra i ’o faseva par spirito de sopravivenza de eà fameja.
Se ’ndava ’vanti da quando che nassiva el soe e anche prima e fin quando che el tramontava… e no eà jera mai finìa.
Tajare eà caresina jera uno de i tanti lavori che faseva portare a casa el pan, o, par mèjo dire, eà poenta, parché de pan, a casa mia, se ga scomissià a gustarlo quando che mi go inissià a fare el fornaro… ma questa xe ’n’altra storia.

[torna sopra]