Gente Veneta

None

Ne le do foto el "nostro None" drio sistemare la tera davanti casa e drio uare 'l feroda segare (foto Simona Malaman).

El xe rivà co la biçicleta de so pora mama Taresa, ne la casa de la "me amica del cuore" Dina, a Casalserugo (PD), dove se gavévimo dà apuntamento, par scanbiare quatro ciàcoe.
Gastone Toson, deto None, el xe na figura caraterìstica, conossùa e benvolùa da tuti i so conpaesani. Da quando che'l xe 'ndà in fosso col "Califfo", spacàndose on brasso, el viaja senpre in bici.
D'istà, el va al marcà de Piove de Saco co la so "foriserie", meza inruzinìa, a conprarse i pomi e le angurie, robe che no'l se copa dal gran peso de le sporte piene. Le ghe piase cussì tanto, che, 'pena tornà a casa, el ghe ne taja una e se la magna tuta so na volta sola, co i efeti diurètici che podemo imaginare...
El xe paron de tre canpeti che'l goerna co na passion e on amore che no ve digo. El li fa arare e semenare, po' el se rangia tuto da solo. El sapa el formenton ganbeta par ganbeta par cavarghe l'erba e, có la tera xe seca, el ghe dà da bévare co on secio e on menestro. Par None la tera se el so tesoro. Fra pagare l'araura, le semense e la sémina el ghe ne rimete: "Ma almanco magno roba genuina, sensa urèa (concime) e par questo vivarò diese ani de più!". El vive da solo, par conpagnìa el ga do cani; uno xe da cacia che ghe serve per trovare la selvagina e po', quatro gaine che ghe fa i ovi.
Se le va in cioca el le fica dentro on maastelo de aqua freda tre volte al dì e cussì le torna a far ovo. Sta trovada la ga inparà da so mama, che la meteva le cioche ne l'albio.

El xe on bravo cogo, el se parecia çerti condimenti par le pastasute, inafià da do onbrete de vin: "Altro che punture su le culate!". Xe propio vero che "brodo de galina e siropo de cantina i lontana el mèdego da la cusina". A None ghe piase tanto anca magnare pan e caco, pan e ua, pan e anguria come i nostri veci. El se scalda co la stua a legna e, fin a quatro ani fa, el tirava sù l'aqua dal posso con la secia. Tuti i sabo e le doméneghe el se veste da festa co la so bea camisa bianca, e, quando che'l ga tenpo, el va zugare tónbola al "Centro Anziani" de Casalserugo, anca fora pa la setimana.

El xe on tipo "estroverso", el saluda tuti a larga siera, specie le done: "De morose, da zóvane, che n'ò vudo anca massa!".
"El senta, None, cossa ricòrdelo de la so infansia?".
"La mama de me mama la se ciamava Veneranda e la inpaiava le careghe rote ma anca la ghe ne faseva de nove. Mi che jutavo e cussì ciapavo qualche mancia. Go fato fin a la quarta elementare e so' stà promosso in quinta. L'ùltimo ano de scola, la maestra me voleva métar in castigo; gera xa pronte do panoce che mi dovevo sgranare par po' inzenociarme sora, parché no gaveva inparà sta poesìa, che me ricordo ancora: Erano i primi martiri / che sacrificarono la loro vita per la Patria / Silvio Pellico, Pietro Maroncelli / rinchiusi per anni in orride prigioni / Santorre di Santarosa mandato in esilio / Ciro Menotti morto sul patibolo / i Fratelli Bandiera fucilati... In te on bàter d'ocio la go inparà tuta e cussì go scansà el castigo. Quante pache go ciapà da la maestra Irene parché no savevo lèsare la carta geogràfica! No capivo propio gnente, manco de gnente.
Có so' 'ndà militare go fato el bersaiere, par questo me piase tanto córare in bicicleta istà e inverno".
Prima de saludarse el me ga mostrà na foto tèssera de quando che'l gera zóvane. Da restare imagà: metì védare l'atore Gary Cooper.
"Desso che so' vecieto, 85 ani el pròssimo aprile, prego de più e fasso la Comunion. Ogni volta che passo davanti a la povola (piopa secolare vissin a la casa de la me amica) dove, durante la guera del '15-18 na fameja, in sèguito a un voto fato, la ga messo na statueta de la Madona, a digo: "Ciao, Mama!".

[torna sopra]

Dal nùmaro de Febraro:
Editoriale
Vìvare ne la gioia.
Co tuto el turbio che ghe xe in giro, che sia possìbile recuperare un fià de serenità e no vìvare senpre te'l pessimismo pi nero?
de Mario Klein
[torna sopra]

El pan: l'oro de i pòpoli
Le me esperiense de putèo a fare el pan. La so storia infinita da la note de i tenpi. Sìnbolo de unità familiare, de amore e de fecondità. El durarà fin a la fine de l'omo.
de Gigi Vasoin
[torna sopra]

Cronache dialettali
(Q.C. XVIII N. 12 - DISSENBRE 2000).
di Manlio Cortelazzo
[torna sopra]

None
Gente veneta
di M. Luisa Zilio Furin
[torna sopra]

Storia de do leoni
Robe de Ciósa
El leon de Ciósa, el leon de Cavàrsare. a cura de Angelo Padoan
[torna sopra]

Gastone Nuñez
Gente de Verona
On tesoro d'arte da visitar a San Pietro di Morubio: trédese tele par "Omaggio a Dio nostro Padre". de Lucia Beltrame Menini
[torna sopra]