Gente de Verona

Gastone Nuñez
On tesoro d'arte da visitar a San Pietro di Morubio: trédese tele par "Omaggio a Dio nostro Padre"

Gastone Nuñez.

Quanti auguri che semo fato in te i primi giorni de l'ano novo e del novo sècolo! Go fato caso: la matina presto del du de genaro, son 'ndà al forno a tore el pan, e i m'à dito "Bon ano!". La stessa roba la m'è capità dal tabachin e anca dal fotògrafo. E tuti dopo i continuava a dir che la roba piassè inportante l'è la salute. I se intendéa quela del corpo, e anca, forsi, i se faséa capir su chel po' de serenità che ghe vol par vìvar na s-cianta discretamente.

Padre nostro.

No stè a pensar che sia bigota, ma mi, drento al me cor, dopo 'ver pensà a quelo che go par me fortuna 'ncora qua in tera, me son votà soratuto al "nostro Pare", quelo che sta in cielo e che ne guerna tuti. E, sicome on pensiero el tira l'altro, m'è vegnù da dir che ben l'à fato chel bravo pitor veronese, GASTONE NUÑEZ ('desso, purtropo, l'è za tornà a la casa del Pare) che l'à ilustrà co i penèi, ma sarìa piassè giusto dire che l'à cantà co 'l color la pi bela preghiera che 'l Signor el n'à insegnà: el "Padre Nostro".
Cussì mi m'à parso giusto de farve conóssare tute ste piture che sta a metà tra la tera e el cielo. Ve digo anca, par ci vol védarle, che le se cata tachè via ne na cesolina ricavà da la vecia càneva, drento a la casa canònica de San Piero de Morubio, in te la Bassa Veronese.

Non indurre in tentazione.

Se trata de 13 tele, dove ghè dite, a alta oze, tute le frasi de la preghiera che ne conpagna durante el giorno ne la nostra vita da cristiani. In sti quadri, el pitor el s'à sentìo lìbaro, de na libertà che someia ai zughi de l'infanzia. L'à usà na tènica a metà tra la gràfica e la pitura, dove el colore el fa da paron fasendo i contorni sora al segno de la figura; Nuñez el s'à abandonà, quasi zugando, a la so spontaneità, al so estro, senza 'ndar in zerca de robe elaborà e difìcili, ma con el so bisogno de far solo quelo che ghe "dittava dentro"; cussì è vegnù fora na fòla ingenua e dramàtica insieme de sène, figure e azion che le à ispirà la so fantasìa e guidà la so man.
Davanti a sta pìcola galerìa de imàgini, de sto "Omaggio a Dio nostro Padre", se pol restar on poco inochè, ma mia indifarenti. Infati el pitor no l'à mia inteso de darne messagi novi, ma solo dire a la so maniera, la felicità che provemo in tanti de crédare e voler ben al Signor e a la so umanità.

Sia fatta la tua volontà.

'Desso ve scrivo ci l'era el pitor: Gastone Nuñez (1921-1993), l'è nato a Verona, l'è 'ndà a la Scola d'Arte "San Michele" in Verona. Fin che l'era ancora zóeno, el s'à notà al corso de la scola lìbara del nudo a l'Accademia Cignaroli de Verona. Par quasi dies'ani, l'à fato parte de la Casa de i Artisti sul lago de Tenno, dove l'à scrito anca versi, ciari come la so espression de poesìa. L'è stà Acadèmico de l'Accademia Tiberina de "I 500" a Roma. Nel 1975 i l'à premià con el "Campidoglio d'oro" par la pitura a l'Accademia Burckhardt de Roma. L'à fato parte de l'U.M.C. (Unione Mondiale de la Cultura). Piassè tardi l'à acetà la nòmina de consultore de la "National University" Ominium of Canada de Toronto. Le so òpere se pol trovarle in tante colezion private e pùbliche sia in Italia che fora, a l'èstero.

Ritratto di Cristina.

Dirìa che l'è on vanto par Verona, par l'alto grado artìstico de la so creatività, ma anca pa'l grande significato morale de tanta so arte.

[torna sopra]

Dal nùmaro de Febraro:
Editoriale
Vìvare ne la gioia.
Co tuto el turbio che ghe xe in giro, che sia possìbile recuperare un fià de serenità e no vìvare senpre te'l pessimismo pi nero?
de Mario Klein
[torna sopra]

El pan: l'oro de i pòpoli
Le me esperiense de putèo a fare el pan. La so storia infinita da la note de i tenpi. Sìnbolo de unità familiare, de amore e de fecondità. El durarà fin a la fine de l'omo.
de Gigi Vasoin
[torna sopra]

Cronache dialettali
(Q.C. XVIII N. 12 - DISSENBRE 2000).
di Manlio Cortelazzo
[torna sopra]

None
Gente veneta
di M. Luisa Zilio Furin
[torna sopra]

Storia de do leoni
Robe de Ciósa
El leon de Ciósa, el leon de Cavàrsare. a cura de Angelo Padoan
[torna sopra]

Gastone Nuñez
Gente de Verona
On tesoro d'arte da visitar a San Pietro di Morubio: trédese tele par "Omaggio a Dio nostro Padre". de Lucia Beltrame Menini
[torna sopra]