Editoriale

Eh, sì! La vita la xe na guera!
Gìrela e vòltela come te voi! Ogni dì, có te te sveji, la xe na batalia nova: qualche volta te vinsi, tante volte te perdi!

Ogni giorno na mossa, sperando che la sia quela giusta.. ("I giocatori di scacchi", partic., Liberale da Verona, 1445-1527/29)

Dura la xe... ma chi la dura la vinse, dise chel proverbio! E la vita la xe na batalia che bisogna che se metemo in testa de vìnsare. Anca parché Quelo che ne ga fato piòvare zo, qua so sta tera, el ne ga dà drio el bilieto de entrata e anca qualche palanca par fare el nostro zugo tel Casinò de l'esistenza.
No xe da maravejarse se 'ncora prima de tacare a conbàtare ne trema le ganbe, ne "cala la palpebra". No se trata de paura: se trata de prudenza!
Guai sotovalutare le dificoltà, ma gnanca fàrsela 'dosso al solo pensiero de dover lotare. Dovemo trovare el giusto equilibrio tra "el dire e el fare", senza bandonarse a la sola speranza. Pararà in-possìbile, ma se pole malarse anca de speranza, lassando che tuto vaga pa'l so verso, vardando in sù e spetando che tuto casca da l'alto, opure meténdose in testa l'idea de chissaché, ilundéndose de chissacossa, desiderando la luna te'l pozo!
Speranza vol dire giusta misura de volontà e de voja de vìvare, vol dire vardare vanti, senza destacare i piè dal "presente". In altre parole: volere fàrghela e avere fiducia de fàrghela. Solo cussì se riva a quelo che ne insegnava me nono, quando, a la fine de la fòla che'l ne gavéa contà, el ghe zontava: "Cari putèi, la vita è una vitella: bisogna inparare a mónzarla!" E come l'insisteva so sto discorso. Pareva che'l ghe catesse gusto te'l ripètarne sta sentenza che ne faséa colpo, parché noaltri savévino che no se 'ndava mai in stala a mónzare na vedela, semài na vaca!
Cressendo, se semo resi conto de quanto nostro nono el gavéa reson: bisogna tacare presto a ciapare confidenza co la "teta" de la vita, senò có xe ora de mónzare se ris-cia gran peade!
Za! Questo l'è 'l problema: le peade, le sconfite, le batoste, le ramenade... Epure no bisogna star lì a lecarse le piaghe: se ris-cia de ciapare el resto. Xe mèjo tirarse sù, métarse al riparo, tirare el fià, farse sù le màneghe e tornare in canpo co la convinzion che no ghe xe batalia vinta se prima no ghe xe batalia persa!
No xe fàssile, ma xe proprio quando che se ga ciapà na batosta che xe necessario reagire. Reagire e no fare el Pilato. No ocore gnanca fare l'Enrico Toti! Basta fare el proprio dovere de "conbatente", onesto e generoso, senza mai pèrdare la misura de quelo che vale... e de quelo che se vale.
Tuti gavemo sperimentà giorni de burasca e giorni de sole, ocasion de grande sodisfazion e de sucesso, come anca de umiliazion, de delusion e de boconi amari. Par tanti, tuto questo dipende dal destin, da la dèa fortuna che ora aiuta i coragiosi e ora i stùpidi, ora la dà e ora la tole. Mi digo che bona parte dipende sì da la fortuna, ma altretanto dipende da la nostra volontà. Non par gnente semo lìberi. Lìberi de ciaparle e de darle, de pèrdare e de vìnsare, de cascare par tera e de tirarse sù. Naturalmente, senza desmentegarse che, par tradission e par fede, ghe vole na bona dose de umiltà, savendo sbassare la testa e afidàndose a Quelo che ne ga mandà qua in tera col bilieto pagà par entrare al Casinò de l'esistenza. Par pèrdare, ma soratuto par vìnsare!


[torna sopra]

Dal nùmaro de Giugno:
Editoriale
Eh, sì! La vita la xe na guera!
Gìrela e vòltela come te voi! Ogni dì, có te te sveji, la xe na batalia nova: qualche volta te vinsi, tante volte te perdi!
de Mario Klein
[torna sopra]