Da Belun

Al "Rifugio 7° Alpini" al conpie 50 ani

Al Rifugio 7° Alpini e al S-ciara (da an aquerelo de G: Ghe).

Al 23 de setenbre 1951, l'é stat inaugurà al Rifugio 7° Alpini; l'é del C.A.I. (Club Alpino Italiano) de Belun e al se cata propio sot la "gran muraglia del Gruppo della Schiara", quota 1498, te na conca ciamada Pis Pilon. An posto via da perìcoi de slavine rente la vecia Malga de Pastori, veri esperti de sti posti tant da èsser "uniche guide" par chi che se venturéa par ste crode.
Al scrive, tra l'altro, Dino Buzzati, inviato Corriere della Sera, so sta cerimonia: "...Se ne parlava almeno da 30 anni. Lo Schiara per Belluno è la massima corona: da quella parte si apre la strada verso altri bellissimi gruppi... arrivarci a piedi, una fatica bestiale su per inverosimili sentieri e non ci voleva niente a perdersi. E la notte dormire dove? I pastori sono brava gente che non dicono mai di no...". Sì, al Rifugio l'era an sogno, manchéa forze e schèi. Parché no dedicarlo a la memoria de i Caduti del 7° Alpini, dato che "la Patria" de sto Regimento l'é Belun?... e tut se met in moto. A le Case Bortot, poch lontan Bolzan Belunese dove se pol rivar montadi, an Cippo de Franco Fiabane ricorda sti "Ideatori": Mario Brovelli - Toni Hiebeler - Piero Rossi - e propio là parte al sentiero 501 che 'ndando pa la Val de l'Art (Ardo) porta al 7° Alpini. Sta "mulattiera" prima piana dove la vista la se slarga so 'l Serva, e contorni de Belun... la monta e la se intrùfola sol fiss senpre tacada a la costa del Terne, co l'Art dó fondo fondo che manco se lo vede e se lo sente. A na zerta alteza sto fiss se verze mostrando su ponte spize che par na vision, al troi se sbassa senpre pi fin a rivar a Casera Scala-Mariano, dove se pol tociar so sta aqua bona fresca, e dove al Rui Frét, che riva dadrìo al Serva se missia co l'Ardo... altri troi... altra zona... altre storie...
Qua a Mariano ghe n'é al primo pont, na tapa obligatoria pa inpienirse la boracia e... su e su, se traversa quatro olte l'Art.

Ceseta al Pis Pilón.

Tre bone ore conpreso l'ùltimo tòc ciamà "al Calvario" dove: ècolo al Rifugio, par de tocarlo e no se ghe riva mai... I diss tre ore, o anca 48 minuti de corsa (record Beniamino Sitta). Ma come far a contar al tenp in montagna? Có an tut te met meraveia: an sass stranbo, an colpo de ocio che po' al canbia, an fioret pìciol nat là te la croda, sti cussin de fior co colori che par 'pena vernizadi e che se vede de schivar pa no pestarli... an tut che sa da miràcol! Po' la zornada la pol èssar bela, "splendida-radiosa", co nèole che va e vien, borasca, piova, e, có manco se la spèta: neve! An tut che pol stracar i oss, có se va par crode... ma an tut che, anca sol tel ricordo, dà vita a ànima e cor.
Al Rifugio 7° Alpini e Mulatiera i é deventati roba vera dopo ben 63 mila e 400 ore de laoro. Pi de 120 viadi-uomo co 735 salite co muli (15 muli e 35 alpini). L'é stat pi che necessario montar na teleferica, dove 290 Fanti de la "Nembo" te an sol dì i é rivadi a portar a spala da le Case Bortot, seramenti de legno e fer. Altri 450 Fanti i trasporta mòbili e aredi fissi... e altro... e altri. Al dì de l'inaugurazion na vera adunata alpina e alpinìstica co an celo, movimento de neole, an vero tenporal de passaio che l'é rivà a benedir tuti. Ste giozˆe grosse che sbatéa anca té la "Grotta" fata sù da Genieri pa ospitar la Statua de la Madona "Regina Alpinorum" (che 'dess la sta entro la ceseta inaugurada 24 agosto '52) dono de Pio XII, rivà grazie la segnalazion de Gioacchino Muccin Véscovo, (Bocia del '99) ...la Messa dita dal Capelan Mons. Sartor... discorso uficial: General Emilio Battisti... la comozion de Lea Tosi, la Madrina, socia del C.A.I. e sorela del Tenente Umberto Tosi (caduto in guera)... an tut restà entro: persona che à camina co noi... co mi... Ricordi che pol rivìver anca chi no ghe n'era... traverso la Cronaca de Dino Buzzati, che co l'amor che al portéa a sto "So S-ciara" l'à piturà ogni momento... dove al met che co se à fat sera: "...Sulle aree mensole della grande parete, lungo le creste, sulla vetta dei torrioni, a migliaia erano schierati. Né c'era bisogno di fare l'appello nominale per sapere se ci fosse qualche defezione. L'intero reggimento era presente in tutti i suoi ranghi di morti, compresi i Muli fedelissimi. Chi in uose del 1911, chi in fasce mollettiere, chi in uniforme coloniale, chi in cappottone siberiano. Ma in testa avevano tutti il cappellaccio con la penna e sul davanti infisso un piccolo "VII" di metallo (lucido ancora dopo tanto sangue!). Né si muovevano né cantavano né si capiva se fossero contenti o afflitti. Erano più taciturni ancora delle rupi. Probabilmente aspettavano che si facesse completamente buio. A mezzanotte sarebbero discesi a vedere la loro casa nuova". (Dino Buzzati).

[torna sopra]

Dal nùmaro de Giugno:
Editoriale
Eh, sì! La vita la xe na guera!
Gìrela e vòltela come te voi! Ogni dì, có te te sveji, la xe na batalia nova: qualche volta te vinsi, tante volte te perdi!
de Mario Klein
[torna sopra]