Segnalibro

El dialeto de Ugo Suman

Ugo Suman

L'ocasion de la so ùltima publicassion, "Pensieri in quartina" (Panda edizioni, Collana "L'orto de casa" N° 3) me dà modo de parlare de Ugo Suman. Anca parché, ogni tanto me càpita che i me domanda cossa ca penso del dialeto de Ugo Suman, se el me piase davero, se me pare che el sia dialeto o italian tradoto in dialeto, o dialeto che deventa italian. Ogni volta rispondo che par mi "el dialeto de Suman el xe el dialeto de doman", un dialeto suo e nostro, vivo, fato par parlarse ogni giorno, meténdoghe le parole vecie che ne xe restà in uso, quele chel se ricorda lu, e zontàndoghe quele nove che no ghe gera e che entra in uso 'desso. Ugo nol ga mai vudo ambission de leterato, ma el xe scritore vero, che sa doperare la parola pa contare tuto queo che ghe vien in mente, queo che el sa, queo che el pensa de la vita, de l'omo, de le esperiense de ogni dì, quele inparà su la so pèle e quele scoltà in tanti ani de atension piena de rispeto a òmeni, done, toseti, preti, móneghe, frati e atei e miscredenti. Ghe piase contare, sentà ne "l'orto de casa", coi profumi de salvia, de rosmarin, de basìlico, soto l'àlbara de persegheti mati o de cachi, che segna le stagion. L'orto el xe tuto drento de lu, nei so ricordi de canpagna, nei ricordi de i filo, nei discorsi de i òmani drento in càneva, insupà de filosofìa, de economìa, de politica, de psicologia, de religion, de conossensa de la tera, del tenpo, de la natura, de le piante, de le bestie, de la zente. Memoria e esperiensa xe le "credense" de i so raconti e de i so soneti: tanti cassetini de idee, emossion, sentimenti, dispiasseri, zoie, dubi, incertesse, paure, dolori. Mi credo che ormai el pensa in quartine e in soneti. Có 'l se alsa dal leto ghe vien sùbito da tradure in soneti e quartine i pensieri de la note e de l'alba; có 'l se fa la barba invesse che cansonete ghe vien versi a dare el ritmo a la giornata de sole o de piova, verta a le speranse o ancora ingrumà a rumegare tra le magagne. Come ai musicisti na nota ciama nantra, par lu na parola tira l'altra, un pensiero na riflession, un'esperiensa un ricordo, un'ipotesi na conclusion, e senpre co sostansa, misura e ritmo.
Ghe vien naturale: no pero come fato mecanico, automatico come el respirare (che se te fè de manco te fa male e te s-ciopi), ma come el caminare, el vardare, el parlare che ga bisogno senpre de un ato de volontà, de na diression, de un senso. El ga senpre passà tante ore in silensio, da lu lu solo, e cussì el ga tacà a contàrsela in versi e in prosa, sercando de capirse lu e de capire i altri, tanto pa non parlar par gnente e de no pàndere presunsion.
El ga scrito ormai raquanti libri, almanco na ventina, de poesìa e de raconti, tradoti anche in todesco, in francese, in inglese, ma el xe restà sènplice, fedele al so dialeto parlà ogni zorno, sensa métare cresta, sensa preocupassion, solo sercando de farse capire e de non dire o scrìvar monade. E in sto libreto el se lìbara dei pensieri che ghe xe vegnù in sti ùltimi tempi, sistemà in quartine de óndese sìlabe, su argomenti diversi, a scominsiare da Dio pa tocare el dolore del mondo e de l'omo, le robe de la vita quotidiana, i tanti Se... e i Quando..., l'amore, el tenpo, i giorni e le ore del giorno, le stagion, le nostalgìe, le rason del so scrìvare, la natura, la polìtica, l'ètica, i dolori che sconquassa e le picole gioie sensa spiegasion: pensieri, ma no solo quei che te nasse e te cresse drento spontanei; meio quei rancurà e coltivà co fadiga, limà co amore parché i sia più ciari, perché i diga pa davero un poca de verità, magari ne la mùsica lisiera e persuasiva de un soneto o ne le rime de na quartina. Avere o tor sù pensieri, bei e bruti, xe bastansa fàssile, dise spesso Suman, ma el più difìssile xe pensare.

[torna sopra]

Dal nùmaro de Giugno:
Editoriale
Eh, sì! La vita la xe na guera!
Gìrela e vòltela come te voi! Ogni dì, có te te sveji, la xe na batalia nova: qualche volta te vinsi, tante volte te perdi!
de Mario Klein
[torna sopra]