Da la Bassa Veronese

La note de San Gioani

San Gioani, un poco malmetùo (malmesso), de guardia su la faciata de la cesa de San Stèfano de Zimela.

'Na olta i saéa smissiare el sacro co' el profano, ma no co' la malizia o co' la cativeria, ma parché i pensava che in tute le robe ghe fusse drento calcossa che ligava la tera co 'l cielo. E cussì i binava i Santi co' i avenmimenti de la vita e cussì i ciamava S. Bovo (2 de genaro) parché el protegesse le bestie, come anca S. Antonio Abate (17 de genaro), dito quelo del mas-ceto par no confóndarlo co' quelo de Padova. De S. Biagio (3 de febraro) i naséa in cesa a farse benedire i fruti par magnarli par no ciapare el mal de gola. De S. Valentin (14 de febraro) i se sfregolava le man parché l'inverno el jera quasi passà. De S. Giacomo a se pagava i aconti de i fiti de i canpi e el saldo el se faséa a S. Martin (2 de novenbre) e in chel dì lì a se faséa anca sanmartin, che voléa dire caricare su un caretin tirà da un musseto le quatro tàtare (poche cose di casa) che i gavéa e fare trasloco. Anca el magnare el jera ligà a zerte ricorenze: a la Sensa (Ascensione di Nostro Signore) se magnava el codeghin co' la lengoa, al Rosario se magnava l'ànara e ai morti i peladèi, che jera maroni spelà e cusinà lessi co' sale e salvia. S. Antonio, quelo de Padova (13 de giugno) el segnava el tenpo de tajare el fromento.

La rameta de giranio ligà a 'n'àlbaro, la note de San Gioani.

Però uno de i giorni pi inportanti in te 'l mondo contadin el jera quelo de S. Gioani Batista, che el vien el 24 de giugno e el casca in te 'l solstizio d'istà. La vigilia se cavava l'ajo e la sera a se inpizava i brugnèi e de sòlito, o el 23 o el 24 a piove, quasi che a se voja confermare el proverbio che el dise che "A San Gioani a piove tuti i ani". La note de S. Gioani i diséa che la jera 'na note màgica, 'na note de spìriti, e che nando in stala a se podéa sentire le bestie parlare fra de lore come i òmeni, ma nissun che 'ndava a controlare parché i diséa anca che ci che a le sentéa a el faséa 'na bruta fine! Nare a caminare a piediscalzi su l'erba moja de sguazzo (rugiada) i diséa che a faséa nare ja i dolori e che se le tose le se lavava la facia co' el sguazzo a ghe saria vegnù la pele pi bela e a ghe gavarìa fato ben anca par la salute. Ghe jera anca ci che se lavava i oci co' sto sguazzo, o par guarirli o par tegnèrseli sani. Zerto che se 'desso uno el nasse par i canpi a piediscalzo de note, come mìnimo el ciaparìa el tètano, tajàndose co' feri rùzeni o viri invelenà o, a la pi trista, el se sbusarìa co' calche siringa de drogati che el ciaparìa l'aids. Anca de le erbe, come la Verbena, le vien ciamà erbe de S. Gioani e i dise che le xe bone par curare le malatìe. 'Na olta le tose che le jera da maridare le ciapava 'na ciara de ovo, le la sbatéa ben e dopo le la metéa in te 'na botilia che la vegnéa messa de fora in te 'l prà par tuta la note tra el 23 e el 24. La matina le vardava la ciara cajà e, da la forma che la gavéa ciapà, le zercava de indovinare a che strumento la ghe somejasse, par savere che laoro gavarìa fato el possìbile futuro moroso o marìo.
Par mi però S. Gioani el me ricorda 'na bela tradizion che faséa me zia Rosina e anca tanti altri. La sera del 23 a se tajava 'na bela rameta de giranio, co' i so bei fiori spanìi e le so foje bele verde, e la se ligava ben in alto co' 'na stropa o un fildefero su 'l tronco de 'n'àlbaro, o su un palo che tegnéa 'na retemetàlica o anca su un palo de fero. E là, soto el sole che spacava le piere, el soleon de 'na olta, chelo che el te cusinava i zarvèi se no te gavéi in testa el capelo de paja e che no 'l te faséa mia vegnere le malatìe parché a no ghe jera mia el buso in te l'ozono, i fiori i restava bei e le foje verde, senza darghe 'na gioza de aqua!
'Stistà (quest'estate) a go proà a rifar anca mi l'esperimento e lo go fato no co 'l core fredo del sienziato, ma co' quelo de la fede sènplice de me zia Rosina. A passava le setimane e a no sucedéa gnente. Dopo pi de un mese a ga scuminzià a secarse 'na rameta fiorìa, ma inframentre (nel trattenpo) n'altra piena de bòcoli a la ga fiorìo e instesso a xe capità par le foje. Par farla curta, a fine otobre, dopo quatro mesi, quando che a paréa che a fusse tuto finìo, da un buto a xe vignù fora ancora de le foiete e anca un rameto co' de i bocoleti che i xe spanìi come se i fusse in piena stajon.
Ghe xe stà chi che ga ridesto quando che a ghe go contà el fato, diséndome che le xe supertizion o credenze insulse de 'na olta, quando che i jera tuti inbezili. Ma mi penso che anca sto fenòmeno, che no' me interessa mia che el me sia spiegà co' la sienza, el sia anca lu un pìcolo segnale, un aviso a l'ometo che el crede de èssare el paron del mondo, par dirghe de star 'tento che par na roba che el sa a gh'in ne xe mile che a no 'l sa e che no 'l staga massa montar in scano, che no se sa mai!

[torna sopra]

Dal nùmaro de Giugno:
Editoriale
Eh, sì! La vita la xe na guera!
Gìrela e vòltela come te voi! Ogni dì, có te te sveji, la xe na batalia nova: qualche volta te vinsi, tante volte te perdi!
de Mario Klein
[torna sopra]