Da Verona

La Castellania de Suavia l'à conpì trent'ani

Su la scala le balerine e, sul pontesel, l'araldo col capel (che sarìa mi).

A Soave, la matina del 20 magio 2001, par la prima volta in trent'ani, emo "intronisà" più "Spadarini" che "Castellane"!
N'altra novità: gnente procession dal bel paese medioeval al castel scalìgero, forsi parchè noialtre "castellane" de la prima ora semo tute veciote e a far quela longa scarpinà in pontara e a maròcoli no' ghe la femo più.
Alora, tute sù co' la màchina e ci è rivà dopo le diese l'à dovù far i sequeri par catar un buso andó infilarse.

I tamburini

Ale 10,30 s'à formà la sfilada, dal ponte levatoio al grande cortil del pósso. Oltre un çentenar de cavalieri, dame, sbandieradori, cantanti, balarini, musicisti ecc., tuti in lussuosi, sfolgoranti costumi del tempo scalìgero. Mi, ne la me consueta, ormai ventenal, veste de araldo, n'èro za pareciada al me posto, sora la scalinada che porta al salon d'onor del castel, insieme ai me trombetieri. A le óndese è scominçià el spetàcolo, 'st'ano particolarmente belo e vario e, verso mesodì, anunçià dal sóno de le trombe e co' l'acompagnamento de'n vento vilan che me sparpaiava i fòi e me intorcolava la mantela, ò scominçià el cerimonial, scrito ne la metà del 1200 da Imperatrice Dela Scala, moiér de Federico, cusin de Cangrande, par premiar co' le ciave del castel de dame più meritévoli de la so corte.

I sbandieratori

Le dame che in 'sto ano le à ricevù da le mane de l'Imperial Castellana, Nenè Lovat, la ciave co' la tracola damascada, i è stà la dotoressa MAUD JOAN ARKSTEIJN VAN VILLIGEN, olandese de Naarden, docente a l'università de Amsterdam de pedagogia, filosofia, sociologia, psichiatria e, tra le altre alte incombense, membro del Comitato esecutivo per le "cità murade", de le quali fa parte Soave.
La seconda dama l'è stà ORNA CSILLA'G, enòloga in Israele, Diretrice de le relassioni internassionali del Municipio de Tel-Aviv, fondatrice de vari movimenti giovanili per i diriti civili e la pace.
Terza dama: PATRICA GUY. Notissima esperta nel setor vinìcolo, la colàbora a inportanti testade de stampe mondiali. Autrice de volumi sul comercio de vini e liquori ne la Londra vitoriana de Sherlock Holmes.
Quarta dama: GISELLA ORLANDI. Colaboratrice de Maria Teresa de Calcutta de la qual la sèguita, con umiltà e carità, l'òpera.
Questi i Spadarini: Prof. Dot. FABIO DOSSI, uno tra i più conossudi e stimadi chirurghi oculisti. L'è stà el primo a operar la catarata con un mètodo rivolussionario. El primo a praticar in Europa la cheratotomia radiale secondo Fjodorov, el secondo in Italia a usar el làser ad Argon ecc. El so curiculum l'è longo come el pàssio e no' gh'è riga che no' la g'abia enorme importansa.

L'inissio de la sfilada

Secondo "spadarin": BEDONI PAOLO. Presidente de la consulta economica veronese, Socio fondator de la Fondassion par l'Arena e el Teatro Filarmonico, componente del Consiglio de Aministrassion de l'Ente Fiera e de 'na barca de altre Associassioni, una più importante de l'altra.
Terso: dot. MASSIMO FERRO: Sìndaco de Caldiero, Presidente de la Camera de Comer-cio de Verona, Presiden-te del nostro aeroporto "Valerio Catullo", del Centro Estero Veneto e de l'Associassion Italia-na Gestori Aeroporti aderente a la Confindu-stria.
Quarto: dot. ALEARDO MERLIN. Segretario Comunale de diversi comuni de la Provincia veronese. Presidente ANCI-Veneto e componente de l'esecutivo de l'ANCI nassional. Dal 1999 l'è Presidente de la Provincia de Verona.
Quinto: Prof. GIANCARLO VOLPATO. Laureado in lingue e leteratura straniera. Diretor de le biblioteche de l'Università de Verona. Giornalista. Diretor de do riviste sientìfiche e autor de sete volumi monografici e de 'na quarantina de artìcoli sientìfici.
Çinque "spadarini", çinque autorità che émo mandà via... in "spadina"! (¹).


(¹) andar in "spadina". Sensa sopràbito, in pani legeri. I "scaligeri" quando i andava a spasso, in "borghese", i portava, al posto de la spada la "spadina".

[torna sopra]

Dal nùmaro de Lujo-Agosto:
Editoriale
St'istà? Toremo quel che vien!
No xe dito che no ghemo da fare i nostri programi. Però xe mèjo stare lesieri, ché no ne vègna le paturnie!
de Mario Klein
[torna sopra]