Tradizioni musicali (in triestin)

Un coro e 'na zità
Indove se parla de el Coro "La Valle" e de la Fiera internazional de Padova

Fiera de Padova. El Coro "La Valle" col el maestro L. Pengo el ricevi i aplausi da el pùblico.

Co mi iero putel, Padova la conossevo solo de nome, perché mama 'ndava co papà, ch'el gaveva bisogno de i fanghi de Abano, in treno fin a a la sità de el Santo; po' i ciapava la carossa e i rivava a le Terme. Ma più che Padova conossevo el su Santo, che el ga 'sai devoti a Trieste, indove ghe xe do cese in su onor: "Sant'Antonio vecio", dove par che'el frate gabi sogiornado e, dato che la fede in lu iera tanta o grande, inte 'l novo quartier che i stava costruendo nel 1700, a la fine del Canal Grando i ga costruido 'na cesona, che tuti ciama Sant'Antonio novo. Mama in giunio la pregava la tredicina in onor de el Taumaturgo e la condinuado sta pràtica religiosa anca co la se ga trasferido a Pàdova, indove son vignudo anca mi co ela, spetando de 'ndar militar.
E cussì, co go l'ocasion de tornar a Padova, lo fazo 'sai volentieri, specie in sti zorni che xe stada la Fiera internazional.
La prima volta che go visto la Fiera xe stado inte 'l 1952 co la xe stà inaugurada da De Gasperi: che diferenza 'desso da quela volta co el mugito de le bestie de stala te compagnava dapertuto e i box de el ristoro iera sistemài a la mèjo sul vial! Ogi xe tuto lustro e ordinado, mochete nove per tera che le par un "acciottolato", luci ben studiade e fiori dapertuto. Ma stavolta go visto 'na roba nova, un pìcolo "auditorium" per i cori e 'na sera go trovado quel famoso che se ciama "La Valle", direto da el maestro Luciano Pengo. I su amici i me diseva che sto maestro xe stado un "enfant prodige" inte 'l campo de la mùsica: a sinque ani el sonava la fisarmònica, tanto che a oto el fazeva parte de el complesso de fisarmòniche de el maestro Lanaro de Padova. A ùndise el compagnava co l'òrgano 'na corale inte'la esecuzion de la "Pontificalis" de Perosi. Dopo aver fondado e direto el coro "Stella Alpina", Luciano Pengo da el 1976 el ga direto, e el lo guida 'ncora, el coro "La Valle", formado ancò da quarantadò elementi; sto ano el 25? aniversario de la fondazion se festegerà el 10 otobre a l'Auditorium Pollini.

Un altro momento del concerto del Coro "La Valle". (foto LuPe)

Luciano el xe stado organista inte'le parochie de S.Andrea e Santa Lucia e el ga direto corali "liturgiche" e in sto gènere el se ga aplicado a la composizion, come de el resto in quele de mùsica legera e popolar. "Armonizzatore" de le mùsiche corali, el ga portado el coro "La Valle" fora de i confini d'Italia, in Austria, Germania, Ungheria, Finlandia, Francia, Polonia, ma anca inte'l Montana de i Usa e nel Canada. Sto coro se ga esibido anca in varie regioni italiane, come Puglia, Sicilia, Vèneto, Trentino, ingrumando sempre boni sucessi, co grande sodisfazion no solo de el maestro, ma anca de el pressidente, che ancò xe l'ing. Maurizio Paesotto. Inte'l complesso corale ghe xe anca le vosi soliste, quele de Flaviano Rigon, Mario Bortolotto, Paolo Boaretto e Paolo Scanferla per i tenori; de Riccardo Berti tenor contralto; e de Domenico Sabbadin ch'el ga 'na profonda vose de basso.
El coro xe 'na roba viva come l'arzento e credo che no sia fàzile tegnirlo insieme per le prove e le esecuzioni, se se pensa a la varietà de le ocupazioni de i componenti che xe ingegneri, professionisti, artigiani, impiegati, infermieri. Go savudo tute ste robe, qualcheduna la saveré za, missiàndome fra i coristi tra 'na canzon e l'altra, tra le note de "Yesterday" e de "Every time", ma anca tra quele de "La rosa dai monti", "La Villanella" e la "Montanara", per no parlar de "Balm in Gilead (Balsamo in Galilea) e de "Kalinka". E per finir "Me compare Giacometo" che se canta da Trieste a Rovigo e oltre, e quela locale, de 'na intonazion 'sai falize, bilieto de vìsita de la "patavinitas"de ieri e de ogi, "Quando torno a Padova" che el pùblico presente ga cantado insieme al coro.

[torna sopra]

Dal nùmaro de Lujo-Agosto:
Editoriale
St'istà? Toremo quel che vien!
No xe dito che no ghemo da fare i nostri programi. Però xe mèjo stare lesieri, ché no ne vègna le paturnie!
de Mario Klein
[torna sopra]