Editoriale

St'istà? Toremo quel che vien!
No xe dito che no ghemo da fare i nostri programi. Però xe mèjo stare lesieri, ché no ne vègna le paturnie!

Come che 'l passa in pressia sto tenpo! Xe za rivà l'istà, squasi saltando la primavera. A no ghè pi meze stajon: anca el tenpo se adegua... ai tenpi! Via de corsa! Presto! Sùbito! Ocio che passo mi!
E noaltri a gavarìssimo la tendenza a narghe drio: tuto de corsa!
Ma l'esperienza insegna che bisogna che se demo na regolada, par no incontrare sorprese e no ciaparse na qualche smusonà.
No xe fàssile, ma comunque quelo che conta xe de no desmentegarse de métare in valisa na bona dose: prima de responsabilità e dopo de "sarà quel che sarà". No fa difarenza se se passa l'istà so la teraza de casa nostra o soto un peraro davanti casa, a siare te le aque del Sri Lanka o a brustolarse in spiaja a Sotomarina, te le coline de Asolo o a le Piràmidi de Luxor in Egito, in mezo ai canpi de San Piero de Morubio o soto le creste de le Tre Cime Lavaredo. Quelo che conta xe armarse de la famosa pazienza de Giobe, gòdare del tenpo che se ga a disposizion, sperare che ogni giorno végna fora el sole, ma no sassinarse la vita se ocore vèrzare l'onbrela o se scravaza par 48 ore, se el gelato no 'l xe al pistachio o se l'aqua in tola no xe freda al punto giusto.
Xe ben ciapare el tenpo de la vacanza come un tenpo regalà, come un calcossa sora 'l conto, no come na roba guadagnà co fadiga, senò se ris-cia de doverla ciapare massa sul serio.
Va ben anca tuto quelo che racomanda in sto tenpo i profeti e i specialisti de la vacanza: cossa magnare, cossa bévare, disinfetare le robe, ocio al sole che te brusa anca se no 'l scota, ricordarse de avere senpre drio un antibiòtico, el termòmetro, le siringhe, l'aspirina, l'antidolorìfico, el colirio, le bende, i ceroti e... consultare el mèdego prima de la partenza! Tuto 'iuta, anca questo serve, la prudenza no xe mai massa! Ma no stè desmentegarve soratuto de portarve drio na giusta dose de amore par tuto quelo che la vita comunque ve regala.
Xe antipàtico, savìo, fare sti discorsi che i pare senpre rivolti ai altri e mai a chi scrive o parla. Ma stè tranquili: el primo a 'ver bisogno de sta prèdica, de sta spece de "moralismo" xe senpre quelo che lo pensa e che lo dise.
Quindi... ghi ca-pìo: a semo so la stessa barca! Vorà dire che se valtri portè tuto el necessario par disinfetare l'aqua, par difèndarse da i beconi de le sginzale o par conbàtare le infezion intestinali, mi portarò la frescura de Quatro Ciàcoe, la voja de comunicare tra de noaltri co le parole scrite nel nostro dialeto vèneto. Portarò el desiderio de savere calcossa de pi su le tante pàgine de vita, de abitùdini, de usanze, de persone passà da ste parte prima de nialtri, me portarò drio el gusto de la ua in varedo, el colore de i àmoli za fati, de i peri moscati e de le bronbe, l'odore del fromento 'pena trebià, l'alegrìa de casa nostra, de zerte parole strafàlfare e na broca de aqua de pozo par rinfrescarse la facia, sguaratarse la boca e risentire el gusto de la menta casalina.
Questo l'augurio che ve femo a tuti, parché l'istà sia un refrigerio da i scotoni del resto de l'ano!


[torna sopra]

Dal nùmaro de Lujo-Agosto:
Editoriale
St'istà? Toremo quel che vien!
No xe dito che no ghemo da fare i nostri programi. Però xe mèjo stare lesieri, ché no ne vègna le paturnie!
de Mario Klein
[torna sopra]