Editoriale

Se tute le mame del mondo...
Un mondo dove comanda le mame? Un sogno, na pazìa, no 'l capitarà mai! Pecato, parché canbiarìa tante robe!

Na mama e el so tesoro: no ve dà fiducia?

Par come va 'l mondo, soratuto in sto tenpo, ghe xe da preocuparse assè. Semo tuti ciapà da la paura de vìvare: on male che se difonde co gnente, che se trasmete co l'aria, col pensiero, co le parole. Tuto deventa na minacia: in casa e fora casa, in banca o a la posta, in strada o al cìnema, a botega o in ciesa... La violenza, la cativeria, l'afronto, l'insulto, la sfrontateza, la maleducazion i dòmina la sèna e i teroriza le nostre ore quotidiane.
Se ghe ne ga provà tante par darghe na svolta a sta cultura del spàsemo che ga infestà i nostri raporti sociali, che ga velenà el vìvare civile, che ga soterà la gioja de èssare al mondo! Tuti se intèroga, se domanda, se delude, se rabia, se desbateza, ghe vien le paturnie e parfin bruti propòsiti.
No xe da fàrsene na colpa, parché ghe xe poco da stare alegri! Ghe xe chi ghe dà la colpa ai governi, a la polìtica, a la scola, a la fameja, a l'anbiente... Na roba xe certa: se se se ferma soltanto a la lògica, senza lassarghe spazio a ipòtesi anca fantasiose, sarà fadiga catarghe rimedio a sto fenòmeno.
La lògica ne dise che, in pràtica, cussì va 'l mondo, cussì el xe senpre 'ndà e senpre el narà! Gnente de pi falso! L'umanità la ga senpre vudo problemi, fin da quando el paradiso terestre xe deventà... na tera de fadighe, na tera da arare, da roversare soto sora par cavarghe fora el pan quotidian, visto che dal cielo no xe pi calà la mana! Ma i xe senpre stà problemi novi, che l'umanità ga de volta in volta afrontà e tentà de risòlvare. Quela de 'desso la xe na roba nova, ghe xe la necessità de ricostruire la piràmide de la vita sociale partendo dal basso, canbiando le piere che ghe sta a la base. E i discorsi i se fa 'ncora pi ingrejà co la facenda de la globalisazion, fenòmeno che presenta aspeti negativi e pericolosi e che inpone esperienze nove, canbiamento de mentalità e de conportamento. Un lavoro difìssile, da fare a passi curti, un fià a la volta, ma senpre co fiducia.
Eco, proprio parlando de fiducia, nasse un pensiero alto, enorme, monumentale, ùnico, iripetìbile: el pensiero de la Mama, del so ruolo umano, del so equilibrio "generazionale", de la so figura centrale e degna de èssare "globalizà" da la considerazion de tuti quanti!
A parte qualche caso negativo par difeto de natura, la mama la xe senpre stà la banca dove tegnere al sicuro i valori, le selte de caràtere morale, le decision pi inportante. Ma parché sta banca la possa funzionare a dovere, ghe vole la colaborazion de tuti. Nando te'l pràtico, la responsabilità de la mama la xe granda, ma el riconossimento solidale, sociale, globale el xe pitosto tacagno ne i so confronti. On sbalio da corègiare!
Provemo a doparare sta medisina prima e dopo de ogni... parto! Nò, no me son sbalià de parola: go dito proprio "parto"! Par dire, démoghe a le mame oltre al mèrito de generare la vita, l'anpia libertà de gestire, governare, dirìgiare la vita del mondo, co la sapienza, la generosità, l'istinto che solo le mame pole avere. Visto che ghemo corso tanti ris-ci fin desso, parché no córare anca quelo de far governare el mondo a le mame?

[torna sopra]