|
Cultura orale
Le moleche
Un golosesso sorafin che costa un ocio de la testa
 |
| Eco qua na cassela de moleche fresche. (foto InVi) |
"Pare, ocio che te molo! Te sa da grìpola ca te stàneghi, uncò a tola quanti pitari te gheto scolà ca te vedo a l'òrza 'pena disnà?". "Tasi, racoleta dal guselin pontìo. Co quela giandussa 'dosso te piase tastar la meòla ai fati mii. Vuto ca te fassa 'ndar de oco a bela posta, mi, se taco smaronare in volta che, in tenpi de magra t'ò caponà pì volte con le sgrinfe a mojo, de grato te i vieri zo in marina a l'onbrìa del ponte?". Gheto sentìo, barba, cossa chi s'à dito quei do storni có i s'à visto? I go sentìi mi con le me rece ieri l'altro a Ciosa sul porton del Centro Ansiani seguìo da i frati de la Madona, dove me so' inbatùo par caso 'ndando consegnare un pacheto par conto de padre Danilo, guardian del convento de Santa Crose che 'l m'à domandà un piassère posto che 'ndavo mesa giornada in spiaja a Sotomarina. Te la sentarìssito de sassiare le me voje de conóssare e gustare la sostansa de quel gajardo pónzarse mai sentio prima?
Che la sòssola che t'à supià i snaroci da pìcolo, te me ne sgaruji senpre de nove. Da quel poco che penso de 'ver intuìo dovarìa tratarse de un stranio batibeco inprovisà al salto da i do conpagnoni de brìscola, magari par fustegare un vecio àstio. Sarìa come dire l'incroso de do freciàe velenose pescàe da quel modo de esprìmarse d'altri tenpi, de quei che xe senpre pi fadiga 'ndarghe in coste. Sicuro, caro, se go capìo puìto, stavolta se catemo davanti a un piato co na gran fuja de arnèla rosta, ben rosolà, un gustoso boconsin da prete che se gràmola volentiera co le bave ai làvari, giusto par farse la boca bona. Intanto te ga da tegner conto che co 'l discorso invià semo a Ciosa, te la sinpàtica sitadina de mare e de pescaòri, dove le tradission xe 'ncora ben masaràe tel salmastro che va su e zo con le marèe e ogni tanto sparsora scrocalando de boca in boca pa 'l piassère de tegnere in viva espression gergali popolari a ris-cio de sconparire. El potacio che te smeàta la suca da un paro de dì insolfanà dal vecio granzìo che darcào n'à fato sospetare quei do baraconi radegosi, se fica tel canèo d'un mondo de curiosità marinare che pochi conosse. Cade che parlemo de moleche. Te' a cusina marinara de la laguna vèneta le rapresenta un golosesso sorafin, pressioso e rissercà da i bongustài. Digo pressioso in quanto sto prodoto itico costa un ocio de la testa, soratuto parché xe fruto de un lavoro smalissià da vari segreti che vien tramandài da pare a fiolo sensa gnente de scrito. Xe donca l'ocio del pescaòre la furbissia che conta, ossìa la capassità de saver conóssare dal mucio de granseti pescài quei che ga el segno de la muta drio rivare... Sientificamente parlando se trata de un normalissimo granso de modeste dimension che vive te le nostre aque lagunari ciamà "carcinus aestuari", però co na carateristica ùnica. Infati vien pescà, ansi sernìo quando el se ga libarà da la so scòrsa dura par poder créssare. Quelo ciapà de sorpresa tel momento de la muta, la bestiola co la so pèle molegata più xe incapasse de difèndarse più xe bona da magnare frita in farsura. I ciosoti, assieme ai pescaòri de le ìsole de Pelestrina, de Buran e de la Giudeca xe de i artisti te la pesca de sti crostacei. Par pescarli i dòpara le treze che xe de le gran rede fate a enpiria co un cogòlo in cào che funsiona da tràpola sensa scanpo. Scata sùbito dopo la selessionaùra, ossìa la fase che mostra el segno de la bravura del molecante de mestiero che co 'l so colpo de ocio serne i gransi boni da quei mati. I boni xe quei che tel giro de na ventena de giorni deventarà moleche. Tel mucio se cata anca de i spiàntani, quei che t'un paro de giorni bandona la corassa. I mati xe quei che non deventarà moleche parché i ga za canbià la pèle. Le masenete invesse sarìa le fémane, altra prelibatessa con la scòrsa dura che vien bona in autuno, quando le xe piene de ovi. Ogni sernìa con difarenti caraterìstiche in tèrmini de prevision de la muta vien tegnùa in viva drento a difarenti vièri, ossia de le cassèle otagonali lavoràe artigianalmente con parece sbusolaùre torno via fin che la pescada vien pronta da portare in piassa al marcà. Tuta la procedura che ghe vole par starghe drio, co 'l ris-cio che qualchedun se rangia par scontovìa, come càpita spesso, xe la causa principale che tien alto el presso. I coghi deventa mati instesso par frìzare le moleche infarinàe e co le nove tendense de la cusina moderna qualcun propone anca na bela spaghetada consà con le moleche frite. To nona, có gèrimo in stajon, la se ne faséa portare un poche casa dal pessaro che passava do volte la stimana e la le metéa a purgare drento na bassinèla zingà, a bagno t'un sbatudin de ovi. Dopo che le ingorde bestiole se gavéa sgionfà puìto, la ghe tajava con le forfe le ongete a una par una, po la le infarinava e la le frizeva te l'ojo bojente. Un bocon squisito ca no go pi magnà al mondo.
Basta cussì, sinò sodisfà de na voja te me ne movi 'naltra. Mi so' par ringrassiarte de la to spiegassion, come al sòlito, più che esauriente, zio!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Majo:
Editoriale
Se tute le mame del mondo...
Un mondo dove comanda le mame? Un sogno, na pazìa, no 'l capitarà mai! Pecato, parché canbiarìa tante robe!
de Mario Klein
Cultura orale
Le moleche
Un golosesso sorafin che costa un ocio de la testa
de Dinerio
Cultura Visentina
Pietro Galletto
Xe pena vignù fora un libro in do volumi su l'idea republicana in Italia scrito da sto famoso scritore trevisan de nassita, padovan de residensa, ma con raise familiari sandricensi
de Giordano Dellai
|
