|
Cultura Visentina
Pietro Galletto
Xe pena vignù fora un libro in do volumi su l'idea republicana in Italia scrito da sto famoso scritore trevisan de nassita, padovan de residensa, ma con raise familiari sandricensi
 |
| El scritore Prof. Pietro Galletto, drio presentare el so ultimo lavoro. El xe l'autore de: "Mio padre" (1963), "Il dono di Brunella" (1965), "La firma" (1977), "La ruota" (1984), "Soldi o acquasanta?" (1989), "Galantuomini padovani dell'Ottocento" (1992), "Come lo scricciolo" (1994), "I due ritorni" (1995), "La Resistenza in Italia e nel Veneto" (1996), "Fine e rinascita della Repubblica di San Marco (1797-1848)" (1997), "Alberto Cavalletto (1813-1897)" (1997), "Antonio Tolomei" (1998), "La vita di Daniele Manin e l'epopea veneziana del 1948-49" (1999). |
"I 'taliani? No i xe fati, no, par la monarchìa! I ga bisogno de svilupare la so personalità, i ghe vien la stisa a èssare comandài da calchedun, che no sia la so cossiensa". Xe questo in poche parole el giudissio sul caràtere de i abitanti del Belpaese, vignù fora da la relassion de Pietro Galletto, famoso naradore e storiògrafo, che ga scrito xa na ventina de publicassion, che el vintido de febraro passà ga presentà 'nte la sala consiliare de Sandrigo el so ùltimo libro, "Dai comuni medievali alla repubblica italiana. Il lungo cammino dell'idea repubblicana in Italia", Giovanni Battagin editore. Se trata de na publicassion in do volumi fruto de ani de laoro che 'l scritore, trevisan de nàssita, padovan de residensa ma co raise familiari sandricensi, ga elaborà su la base de na documentassion abondante e studià.
'Nte na sala piena levra de zente, dopo l'introdussion del sìndaco Renato Sperotto che se xe ciamà onorà de ospitare l'ilustre personajo, Pietro Galletto prima de tuto ga espresso la so emossion 'ntel sentarse propio 'nte la poltrona che xe stà de so zio che se ciamava propio 'fa lu, sìndaco de Sandrigo par na desina de ani dopo el secondo conflito mondiale. E propio in corispondensa a sto momento stòrico, culminà col referendum che ga instaurà la repubblica in Italia, se sara el longo e minussioso "excursus" de Galletto. Un aprofondimento su i risvolti stòrici, a volte anca fora de ogni aspetativa, de l'idea republicana in Italia, a partire da i comuni medievali, pìcole ma inportanti entità statali sitadine, autònome dal punto de vista aministrativo e polìtico. Dopo l'esperiensa longa dosento ani de i comuni, l'Italia ga conossùo alcuni sècoli in cui l'ideale republican no xe stà realizà par intiero: se xe dovesto spetare Napoleon e le repùbliche nate in varie parti dela penìsola, sùito dopo la so assion militare che ga scantà fora in raquante persone i progeti de liberà e de democrassia che la repùblica ga rento de ela. Xe vignù, po', esperiense sfortunade, cofà la repùblica romana o quela partenopèa, animàe pi che altro da la bona volontà de i pochi protagonisti polìtici, ma destinàe a èssare spassà via dal vento de la restaurassion monàrchica.
"Ma xe Giuseppe Mazzini - ga afermà Pietro Galletto - el personajo al quale se ga da tributare el màssimo ringrassiamento par il svilupo de l'idea republicana in Italia. Na idea che 'ntel corso de i sècoli ga visto anca realizassion poco o par gnente bele, parecio distanti dal rapresentarne l'essensa, peraltro tute ciapà in considerassion 'ntel libro. In quanto a Mazzini, solo che xe poco el ga conossùo na rivalutassion piena de la so òpara, lìbara da considerassion moralìstiche che soratuto la Ciesa catòlica no ghe gaveva sparagnà, rovinàndoghe a la longa anca l'imàgine stòrica conplessiva. Come che ga riconnossùo anca el quasi omòfono Raimondo Manzini, par diversi ani diretore dell'Osservadore Roman, el patriota genovese ga coerentemente perseguìo un ideale che verzeva al pòpolo 'taliano le porte dela libertà, dopo ani de servilismo e de sfrutamento che gaveva relegà i abitanti del Belpaese a fare i buratini 'nte na baraca de paroni. Invesse sto ideale republican xe un dono pressioso che le generassion future ga da conservare, ben conossendo le làgreme e 'l sangue versài par la so conpleta realizassion e laorando parché el sia conservà e vègna trasmesso a le generassion future".
A la fine de la presentassion, el sìndaco Sperotto ga ringrazià Galletto no solo par l'òpera de studioso ma anca par quela de educatore ai prinsipi che ga ispirà la nassìta de la nostra repùblica. Prinsipi che, stando a quelo che ga dito el primo citadin sandricense, ga da èssare recuperài, soratuto in mèrito a l'inpegno costrutivo e edificante del "fare comune". El sìndaco ga anca leto la létera spedìa a Galletto da l'ex presidente de la Repùblica, Oscar Luigi Scalfaro, che ga lodà l'inpegno 'nte l'elaborassion de le 1100 e pi pàgine de l'òpara.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Majo:
Editoriale
Se tute le mame del mondo...
Un mondo dove comanda le mame? Un sogno, na pazìa, no 'l capitarà mai! Pecato, parché canbiarìa tante robe!
de Mario Klein
Cultura orale
Le moleche
Un golosesso sorafin che costa un ocio de la testa
de Dinerio
Cultura Visentina
Pietro Galletto
Xe pena vignù fora un libro in do volumi su l'idea republicana in Italia scrito da sto famoso scritore trevisan de nassita, padovan de residensa, ma con raise familiari sandricensi
de Giordano Dellai
|
