|
Cultura e Vita (in triestin)
Fiumi e canài de Trieste e Padova
 |
| Porta e Ponte Portello a Padova. |
In te la mia zità, Trieste, adesso no ghe xe più torenti e canài che cori averti; ghe xe 'ncora el Canal Grande, de aqua de mar, ch'el tèrmina davanti a la cesa de S. Antonio Novo, 'na volta propio soto la scalinada. Ma ne i sècoli andài ghe iera aque che scoreva fin el mar; ghe iera el Torente, che veniva zo da via de le Sete Fontane e ch'el xe stado coverto fin dal 1838, diventando la via del Torrente e che, a la morte de el Carducci in te 'l 1907, ga ciapà el nome del grande poeta, 'sai amado da i triestini. Un poco più avanti el Torente ciapava le aque de el rio che veniva zo da S. Giovanni per quela via che 'desso se ciama via Cesare Battisti; naturalmente xe stado coverto anca lu. Indove i Romani gaveva costruido un aquedoto che portava l'aqua da el monte Spacà, per S. Giovanni fin via Dónóta, in te i primi ani de l'Otosento, Domenico Rossetti gaveva fato covèrser sto corso de aqua per le fontane de la zità, prima su i su tereni, po' co provedimenti governativi fin el "Ponte ('desso Pòrtici) de Chiozza".
E alora có go inteso che a Padova, indove tanti fiumi e canài xe stadi coverti, i gaverìa fato 'na conferensa su el "turismo fluviale", go ciapado la strada ferata per la zità de el Santo. Gavevo za leto el bel libro a cura de Guglielmo Monti e Giuseppe Rallo "Vie d'acqua a Padova. Ponti e giardini" (ed. "il prato", 1999) fato stampar da la Sopraintendenza per i Beni Ambientali e Architettonici del Vèneto orientale, anca co capìtoli de Giorgia Roviaro; libro che, dopo un bon esame de le aque torno Padova in època preromana e romana, medievale, e soto el governo de la Serenissima, el fa la storia de i interamenti de quel che restava de el Medoacus minor, o Brenta, e de l'Edrone, o Bachiglione, da el 1843 a el 1958, co xe stada finida la coverzidura de i canài e xe sparidi "scenari naturali e costruzioni storiche" (pag. 41) per darghe posto a strade per far meno difìzile el tràfico in zità, soratuto el tombinamento da le porte Contarine a el ponte Torricelle, che da el progeto de el 1922 xe stado fato solo dopo el 1953. Gavevo anca leto el "I Quaderno delle Acque padovane" de Franco Benucci, intitolado "Padova e le sue acque: due casi di studio - Le Porte Contarine e il Portello: forma e identità urbana al crocevia della storia e delle arti" (Unipress ed. 2001), indove l'autor ciapa in esame anca lu, come la Roviaro, el "valore sacrale" de le aque che gira intorno a la zità de Padova, ma el slarga sto studio co l'anàlisi de i tòchi de statue trovadi in t'un cameron vizin a le porte Contarine "per lunghi secoli chiave della navigazione interna della terraferma" (pag. 4), indove lavorava la Fraglia de i "Barcajuoli" o "Burchiellari de la Ponta", che par che i gavessi come protetor S. Nicola de Tolentino, santo ogi un poco trascurà. Po' el ciol in considerassion la Fraglia dei Barcaroli de el Portelo, sia de quel vecio sul Bastion Buovo, sia de quel Novo, co la gran Porta Venezia, costruida da el bergamasco Guglielmo Grizi, che gaveva come protetor S. Nicolò de Bari; Fraglia che gaveva el "monopolio" per il trasporto de le persone da Padova a Venezia e viceversa. Sto "quaderno" ga anca 'na "appendice iconografica" de 161 pùpoli relativi a le robe contade.
Al Convegno a l'hotel Sheraton su "Padova e il turismo fluviale", personalità de la polìtica, quali Vittorio Casarin, Presidente de la Provincia de Padova, i su Assessori Ubaldo Lonardi e Ignazio Sidoti, l'Ass. a la mobilità de la Regione Renato Chisso, quel de el Comun de Padova, Franco Perlasca; l'Ass. al Turismo de la Prov. de Venezia Danilo Lunardelli; i tecnici de el Genio civile Luigi Destro e Enzo Gennaro; e ancora quei che xe più interessài a la "promozione turistica", Antonio Piccolo, Pres. de el Sindacato prov. de le Imprese di navigazione padovane, Gianfranco Chiesa Pres. CCIAA, Massimo Sabbion, Pres. Consorzio Terme eug.; Antonio Scipioni, Pres. de el Consorzio Giotto; e ancora Raffaele Bazzoni, Pres. Unione navigazione interna ital., Fernando Tommasello, Pres. de le Pro Loco, Antonio Gozzi, Cònsole del Touring e Gianfranco Martinoni, Capo settore de el Comun de Padova, i ga sotolineà l'impegno necessario per far che la navigassion fluviale, co 7 percorsi in Padova, co el colegamento co Venezia per el Naviglio de la Riviera del Brenta, ligà a la memoria stòrica de Goldoni e Casanova, per dir de i più conossùi, diventi 'na roba abitudinaria e de grande atrassion; la relazion stòrica de lo studioso Piergiovanni Zanetti xe stada quantomai esauriente. - Bisogna fare sistema - disi el Pres. Casarin, "in sinergia" co le struture stradali e autostradali per un programa a longo termine.
Bisogna che "l'Idrovia" vegni finida per servir l'interporto - osserva el Pres. Chiesa. Ma vizin a le grandi òpere, se devi vardar a quele più pìcole che servi a tratener i turisti a Padova: per es. la gòndola devi tornar a Padova, come un tempo.
Xe rinata la Fraglia dei Barcaroli, 'desso la se ciama "Consorzio dei Battellieri di Padova e Riviera del Brenta" e sta associazion premi perché i altri percorsi, come Padova-Battaglia-Monselice, Pontelongo-Chioggia, vegni ativadi. E po' se devi pensar ai turisti de le Terme de Abano, che i poderìa trovar in te 'l turismo fluviale un coronamento de el su viagio per la salute, che devi èsser anca artìstico ed enogastronòmico, scominziando a mostrarghe in t'i alberghi termali el filmato che xe stado proietà al prinzipio de el Convegno.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Giugno:
Editoriale
Ciao, Dino!
El 22 de Majo ne ga lassà Dino Durante, una de le figure vènete pi caraterìstiche, un cultore del dialeto, un sostenitore convinto de la vita, de la pace, de l'amicizia e de la cultura. Lo saludemo, co la speranza de no averlo perso par senpre
de Mario Klein
|
