|
Robe de Ciósa
I orti de Marina
 |
| I veci orti de Marina |
Adesso che scomissia la stagion de la spiaggia, tanti foresti, spessialmente padovani, gavarà modo de védare i orti de Sottomarina, o mègio, i orti de Marina. Prima de quelo che se ciama boom edilizio col conseguente svilupo de Sotomarina, la zona dei orti de Marina se estendeva per circa 650 ètari dal centro abità fin a la sponda sinistra del Brenta. Ocupà sta zona da i alberghi, i ortolani de Marina xe stà costreti a concentrarse ne la zona compresa fra i fiumi Brenta e àdese, per poco manco de 1.300 ètari. Da diverso tempo la vita de i ortolani xe totalmente cambià in mègio, ma nel 1929 in un volumeto de l'època la gera cossì descrita: "Gli stessi orticoltori non vivono presso l'orto, ma in città e ogni giorno si recano al lavoro con le barche costeggiando la riva orientale del Lusenzo". Passà perciò l'intiera giornata ne i orti, sti ortolani i tornava a casa la sera formando longhe file de barche càreghe de ortagi, e spesso gera le done che remava co i brassi forti e robusti: "Sono le donne - se lèze sempre nel libreto - che vogano con una forza meravigliosa, mentre i loro uomini si stanno magari sdraiati a fumarsi la pipa o a invocare un sonnellino; e siccome tutte le donne vogano con la stessa lena, sembra una brillante regata..." Elemento caraterìstico de i orti gera (e xe anca adesso) i cosideti casoni, 'na sorta de capane de tòla e pagia sparsi in mezo ai orti e usà per depositare atrèssi da lavoro e anca come abitassion provisoria per i ortolani.
Come le antiche saline gera divise in fondamenti, cossì i "apessamenti" de i orti gera (e xe anca adesso) divisi in pèsse o aiole "ridisegnà" ogni volta prima de scomissiare 'na nova coltura, larghe da do a tre metri e longhe da i 18 ai 22, intersecà da streti stròsoli larghi 25 sentimetri. Durante l'inverno, i ortolani usava riparare le aiole da i venti fredi disponendo le grisiòle, dete anca "arelle"; ancùo invesse se usa le sère fate co teloni de nylon. Ste "arelle" gera fate da cane da palùo unìe una a l'altra e fissà fra de lore co la cosideta pavèra, un'erba secà e resistente sostituìa pi tardi da fil de fero; ghe gera i parè (quele sistemà a nord e pi o meno piegà verso sud) e le tressà (quele sistemà verso est in posission verticale). Le "arelle" gera po' fissà a pali deti cordoni. Operassion importante gera la concimassion de le tere (cossì come i ciamava i orti i "marinanti"), che gera fata 'na volta a l'ano co leàme prodoto o derivà da le stale del posto ('na volta se utilizava a sto scopo anca i rifiuti urbani racolti da i stessi ortolani a Ciosa, mescolà a pagia e fògie de panocia, lassà fermentare sul tereno e dopo sparsi su le colture).
I atrèssi pì usà da i ortolani de un tempo gera el rastrelo, la vanga, la piróna, la sapa, el baìle, la massa, la cariola e la balistiera ('na spessie de ponte o tòla adato a fare pression sul tereno dopo avere semenà e usà anca come passerela tra un fosso e l'altro ne i orti). La vangatura, praticà fin ai ùltimi ani '50, gera dopo completà da l'aratura, fata co i cavài. Se procedeva po' dopo a inafiare la tera co aqua piovana, prelevà co i seci da grandi buse sìmili a rudimentali póssi o da i fossi circostanti; infine la piantagione o seminagione del prodoto.
Questo gera, in estrema sìntesi, el lavoro de i ortolani de Marina de 'na volta, i ortolani de la vecia Sotomarina, quela ben descrita da un poeta dialettale ciosòto, Mario Padoan (1899-1976) ne la poesìa intitolà "Sotomarina".
SOTOMARINA
Una strissa de tera piantà su la laguna,
Marina se destira come 'na gran signora,
butà su la so spiagia, tuta sola.
El vento sbate sora del so viso
brusà da la salsedine e dal sole,
lo stesso de la zente che discore,
al modo stesso de le fiole che sui campi
à soterà la gioia col sudore.
Più avanti ancora, un stròsolo sul mare
sora le piere bianche del murasso
dove l'onda se desfe e se consuma
andando zo a cascare come un s-ciafo,
butàndose a morire fra la spiuma.
Mario Padoan
|
|
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Giugno:
Editoriale
Ciao, Dino!
El 22 de Majo ne ga lassà Dino Durante, una de le figure vènete pi caraterìstiche, un cultore del dialeto, un sostenitore convinto de la vita, de la pace, de l'amicizia e de la cultura. Lo saludemo, co la speranza de no averlo perso par senpre
de Mario Klein
|
