Curiosità Padovane

Le "coronare" de Piassa del Santo

Sto qua sarìa el banco "Cavalo"...

Ghe ne xe passà de tenpo, da quando le "coronare" gaveva un sésto co i santini de Sant'Antonio, le coronsine del rosario e poche altre robe! Alora, ai primi del '900, comercio e turismo i gera de là da vegnere. I Pati Lateranensi del '29 co la delimitassion de la Piassa del Santo, teritorio vatican, i ga inposto a le "coronare" de espore la propia marcansìa a na certa distansa dal "confin". Se xe passà dal cavaleto che se verseva ai primi banchi co le rode, fabricà secondo el gusto e le possibilità de ogniuna, fin a rivare a la situassion de uncò: banchi tuti conpagni, co tende parasole o parapiova conpagne, co feri rientranti che no i ga da superare le misure del spassio concesso. Tuto secondo le norme de lege.
Daprima i banchi i gera trèdese, nùmaro significativo par Sant'Antonio:
- 13 giugno 1231, giorno de la so morte (do trèdese a specio);
- 13 le funsion de i vespri che i vien prima de la festa del Santo;
- 13 i miràcoli che i avien nel mondo el giorno del Santo.
Le coronare le xe stà ciamà "tredesine", ma par poco. Difati... xe stà necessario zontare un posto, par un scanbio regolare e no intacare i diriti de nissuna. Dopo se xe passà al radopio de i banchi, no de i posti (quindi 28 license). Queste le vigneva dà (semo uncora intorno ai ani '20-'30) a védove co tanti fioli da tirar sù.
Al giorno de uncò i banchi i xe ventioto, quatòrdese fora, na setimana sì, na setimana nò, secondo el nùmaro de i posti. El so nome el xe tipicamente del logo: "Corea"¹⁾ (zontà par dare la possibilità del scanbio co la "Barca"), "Uno", "Do"²⁾, "Portesina drita"³⁾, "Portesina roversa"³⁾, "Crose"⁴⁾, "Cavalo"⁵⁾, "Barca"⁶⁾, "Busa"⁷⁾, "Ragio del Sole"⁸⁾, "Faciata uno", "Faciata do", "Museo uno", "Museo do"⁹⁾!
I banchi i vien sistemà a copie, in banda a ogni passagio pedonale. L'ùnico non in copia gera la "Barca": da qua la necessità de zontàrghene n'altro. El xe el primo a partire da via Cesaroti e, par la infelisse posission, el vien ciamà "Corea". Ma come rìvei i banchi in Piassa? El xe un mecanismo un pocheto conplicà che le "coronare" e i "adeti" ai lavori, do par la precision, (regolarmente stipendià co paga setimanale da le "coronare") sa distrigarse sensa sbaliare. I do òmini sa come e dove sistemare i banchi. El trasporto, uncò, xe modernizà co un tratorin. Ogni luni matina ghe xe el lavoro più grosso, tanto xe vero che i scominsia a le cinque, prima del gran tràfico. Bisogna che i sposta queli del turno 'pena finìo par sistemare al so posto queli del novo turno. I ghe ne tira fora do dal magazin che se trova drio l'Orto Botanico, e i li sistema sul posto che i gaveva lassà la setimana prima e i ne fa rientrare do, cussì finché tuti xe vignù fora e st'altri i xe 'ndà dentro. El giorno dopo i banchi se scanbia de posto a do a do, quindi i va 'vanti col giro del sagrato esterno. In 'sto modo se dà la possibilità a tute le "coronare" de 'vere posti boni o manco boni, de èssare fora a Nadale o a Capodano un ano sì, un ano nò e, nel giorno del Santo, ogni sete ani, salvo el giorno in più de l'ano bisestile (e qua le se mete "vivacemente" d'acordo prima). A le nostre "coronare" go dedicà i versi qua soto.

Nissun se domanda chi ga distirà le tende co le candele che pende, le cartoline, i "fulard", i pajassi de pano che xe bruti da védare, ma che tuti i foresti pensa de tore. Quante xele? Come fale a restare tuto el giorno col caldo che avansa, col fredo che supia, co la piova che bagna, come fale, digo mi, a no intrigare la piassa, ma a darghe un tono de bon, un tóco de colore, un respiro de padovan? A le cinque del luni, co un tratorin, banchi che va, banchi che vien, se cambia turno e postassion: "Corea", "Uno", "Do", "Portesina drita", "Portesina roversa", "Crose", "Cavalo", "Barca", "Busa", "Ragio del sole", "Faciata uno", "Faciata do", "Museo uno", "Museo do", la pare 'na tiritera del campanon, invesse i xe i banchi che a rotassion, sensa intrigarse e sensa imbrojessi, i xe sempre i stessi, i se sposta o i se scambia de un posto... sempre cussì, par sete dì... e, ogni sete ani, da tante generassion, a la crose o al cavalo, al dì del Santo, có passa la procession, te trovi el stesso banco. Giulia Mazzo

¹ "Corea", cussì ciamà parché esposto a tute le corenti del chiostro a nord (el xe el primo a partire da via Cesaroti).
² "Uno" e "Do" i gera queli in prinsipio, prima che vignesse zontà la "Corea".
³ "Portesina drita" e "roversa" (secondo el punto de vista) le corisponde a la portesina che se vèrse a metà navata sinistra.
⁴ "Crose", de fronte a la colona sormontà da na crose.
⁵ "Cavalo", in riferimento al monumento del Donatelo.
⁶ Poichè la mureta in chel punto no ga un passaio, chi se trova in "Barca" el xe in posission scòmoda par le vèndite.
⁷ "Busa", ghe xe un abassamento de la pavimentassion.
⁸ "Ragio del Sole": d'inverno el xe l'ùnico banco che, a un çerto momento de la giornada, el riceve un ragio de sole da el spaco de via Cappelli.
⁹ "Faciata uno", "Faciata do", "Museo uno", "Museo do", no ga bisogno de spiegassion.

[torna sopra]