|
Editoriale
Dài, cóntame calcossa de belo!
Massa crònaca "nera", massa notizie che fa scareze su le pàgine de i nostri giornài. Informare vol dire par forza spaventare?
 |
| Se capisse ben che tuto no pol fare notizia! ("Le mietitrici", 2001, inc. de Bruno Marcante) |
Pare quasi che i ghe cata gusto e ch'i ghe meta tuto l'inpegno de sto mondo ne l'informare el letore, su tuti i mìnimi particolari, del pezo delito conpìo da na mama, da on fiolo, da on studente bocià, da l'amante deluso, dal mato de turno... Mi capisso che ghe xe del marzo so la testa de l'omo, ma doparare le pàgine del giornale par incartare... sto marzo e mandàrtelo casa, me pare che sia on fià massa! Sfido mi, che dopo uno ghe vien da piantare baraca e buratini e nar via co l'apocalisse!
No se capisse parché el scàndalo, el delito, el disastro ga da deventare la notizia pi inportante: la carta stanpà e quela che core sul vìdeo i se ga fato missionari del "macabro", del nefando, del violento, de la disgrazia e de i copamenti de ogni gènere, quando ghe sarìa tante robe bone che meritarìa d'èssare fate savere. Pare parfin che vègna esaudìa na orazion matutina, come se tel Padrenostro sia scrito "...dacci oggi il nostro orrore quotidiano..."
Co sto sistema, l'omo se scopre ogni giorno pi cativo, pi bestia, pi violento, pi tàngaro. Dài oncò e dài doman, el se cata col morale a cul par aria. Na volta persa la speranza, adìo patria!
Ve ricordèo quando da tositi, che se jera drio fare le lezion, se par sbalio se rabaltava la bozeta de l'inchiostro e el quaderno el deventava on canpo de batalia con scuciarà de zénare e tòchi de carta sugante par fermare le mace? Ve ricordèo che batarela e che làgreme? Sbregare le pàgine, rifare le lezion da novo, afrontare la facia de la maestra la matina dopo: che disastro, che dolore!
Vèrzare el giornale, scoltare on paro de telegiornài, a te ghe n'è che basta par demoralizarte: duro processo de riconciliazion in Oriente; polizioti incriminà par i scontri co i dimostranti "no global"; condana de i preti mericani par pedofilìa; proteste par el "PadovaPride" ché no ghe xe stà riservà el stesso entusiasmo del raduno de i alpini; deliti del "serial killer" padovan; cacia al mostro de Cogne; denuncià quatòrdese tosate clandestine che se vendéa... a rate; morto l'orèfice che se ga ribelà ai rapinatori... El resto ve lo risparmio!
Qualche tenpo fa, go fato on salto in Fiera, dato che ghe jera "Civitas", el "salone nazionale della solidarietà e dell'economia sociale e civile": on mare de zente vegnù lì par conóssare da vizin le oltre 330 tra associazion, organizazion de volontariato, cooperative sociali, operatori non profit... Na visitina e me xe bastà par capire quanto bisogno gavemo de sto universo cussì inportante par la vita de tuti i giorni, e cussì poco fato conóssare. Queste xe le robe che se ga da parlàrghene, parché no le difonde in giro la paura ma le porta el benèssare, el progresso de la società secondo giustizia e solidarietà.
Prima de vegner via, go incontrà proprio un giornalista de quotidiani, che'l m'à dito: "E 'lora, cossa me cóntito de belo?" Paréa che 'l m'avesse leto el pensiero. "Se i giornài i tachesse a spigolare le bone notizie che ghè qua, vegnarìa fora tante de chée faje de speranza da tirar sù on cavajon de serenità e de legalità, sul zélese de chel mondo che tuti sognemo!" xe stà la me risposta.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Lujo-Agosto:
Editoriale
Dài, cóntame calcossa de belo!
Massa crònaca "nera", massa notizie che fa scareze su le pàgine de i nostri giornài. Informare vol dire par forza spaventare?
de Mario Klein
Sbiansi de sagessa popolare
Segantini in fusara
Da un s-ciapo de sgualdrinote in bela vista xe vegnùo fora el spunto par rivisitare na squadra de segantini in fusara
de Dinerio
Cultura in provincia
Quando la moda xe... fata in casa
Organisà dal Comune de Campodarsego, a do passi da Padova, na insòlita sfilata de moda, che ga fato cultura, tradission... e divertimento
de Luigi Perini
|
