|
Sbiansi de sagessa popolare
Segantini in fusara
Da un s-ciapo de sgualdrinote in bela vista xe vegnùo fora el spunto par rivisitare na squadra de segantini in fusara
 |
| Segantini a l'òpera drio sgarbare un rivale. |
"Te go tendùo, moro, prima ca te vincassi a fòra par fermarte a far benzina, finzendo de 'ndar via de oco, te ghè puntà a salve co l'ocio puleghin quele tracagnote foreste, de scòrsa scura, postàe in fregna so 'l caredon sfaltà, co 'l ravassin descuerto fin a l'angonaja de i so binoti spanìi. Va ben che d'istà ogni béco fa late, ma có te le ghè ingromolàe fisse te le to balote sensa bàtare i spalpieri te me paréi un segantin co 'l coàro in man pronto a assionare la mancoléta del ganbo par métarte in fusara a bàtare saldo. No sta' faèlar de reboto, xe come ca fusse stà in te le to braghe, e scometo ca no go falà de tanto." Gheto sentùo, zio? Xe qua un tòco de tenpo ca me ne càpita una più fustagnona de l'altra. Questa la go sentìa doménega passà, pitosto sul tardioto, rivando da Sotomarina. Me so' inacorto de la spia rossa ormai có gero in Corso Stati Uniti e me so' fermà al distributore, verto tuta la note, prima del samàfaro par Camin, dove spesso lungo el marciapìe ghe xe fin tardi un serto àndio alegro de angóne vispe, in mostra co le vergogne poco coverte. Te giuro, zio, me so' fermà parché gero propio in seca de tocio e fin che go spetà che se libarasse la ponpa, m'ò gratà de gusto sta tàvara fracà da un pearin canùo che tirava el barbesòlo a ràfica, forse par desvejare puìto quel puteloto al volante, un parente streto magari da la confidensa fufignà su, el condusente de l'automòbile ca dovéa menarlo casa. Me la so' godùa ca no go perso un bòto, ma me xe restà la spissa. Vorìa na man de le tue, se no te despiase.
Figùrate, me la passo via anca mi co le to curiosità. Secondo mi quel birbon el t'à fato na bela balsarola.
A mi?
Sì, e ti te ghe si cascà cofà un pero gnoco. Gnente da dire su le banpone in bela vista, quelo xe un malandro serio del nostro tenpo che fa piànzare l'ànema, el mestiero pi vecio de sto mondo e co'i ani ca me cato so 'l gropon, no savarìa propio come bonire sta piaga sacrosanta. El furbacion t'à tirà in Berta su un bronsaro quacià de sendron, forsi parché te te scoti anca ti le curamèle de i pìe 'véndote visto inocà cofà un cioci a le stanghe. L'à tirà fora sta pinsa onta co la so sbàtola da racoleta e so 'l pì belo el te la ga sconta par lassarte ingalussà co la to alcolina in boca. Co quatro sferrussàe giuste el t'à messo in marèla anca ti.
Spiègate, spiègate mèjo!
Se quel tissio no ga fato el segantin da zóvane, poco ghe manca. Mi digo che 'l ga segà de sicuro parece rive e rivài o magari caesagne e culi de fosso suti. Védito, el mestiero del segantin gera un laòro duro. Luri sì che i se guadagnava co 'l suòre la pagnoca, altro che quele quatro batissèssole che se tira sul passajo de la zente tuta la note a ingolosire chi che passa co le so miserie fora. Ani indrìo quei pòari òmani a òpara vegnéa suso bonora, prima ca cantesse el galo, par ciaparse vanti co 'l fresco, sperando in Dio ca fusse vegnùo zo tanta sguassa te la note in modo da far sbrissare mèjo el fero.
Co 'l primo ciaro de l'alba i se metéa in fregna t'un spagnaro e i tacava a bàtare saldo, scalà a pètane, fin che no i lo gavéa domà dal tuto. Nò cofà quele batone che ciapa scapelà de schei sensa far fadiga. Ai segantini, có rivava in canpi el paron a darghe un ocio so 'l segà, el ghe diséa: "Tusi, s'a gavì sen go tolto sù na suca fresca piena de graspìa, 'pena cavà da la secia del posso, la go molà soto l'onbrìa de la talponara là decào drio el fosso. Có rivè in testaùra podì sguaratarve le bocaròle e có ghi butà basso tuta sta drissagna, ponsève pure na s-ciantinèla, gussè ben le lame baténdole puìto su la pianta ca no ghe sia de i problemi domatina co'i binoti del vegneto, co'i sarfojari del brolo inpestài de melegheta e de pòle dei figari. Un paro de voaltri, metive d'acordo, ghe tocarà sgarbare le rive de i stropari fin a la ponta de confina. Stè 'tenti de incanbrare saldo i feri parché là 'torno via i frutari no se puole stare massa a l'erba par no tajare a raso, sinò ve toca supiare cofà na màntesa. Doman a ora de marenda vegnarò catarve co na s-cianta de vin pìcolo ca ve tirè sù de suste." Eco, neódo, te te ghè fato na idea de le fadighe patìe in quei ani da la nostra zente. Co la bela vita che i ne insìngana oncò no ghe xe gnente da farse maraveja, semài dovarìa vergognarse quele che se vende pa 'e strade e quei che le costrinze a farlo.
Serto, te me ghè cavà na spissa che me tediava da un paro de giorni, tirando fora le to onge come al sòlito. Grassie infinite: come faròi a sdebitarme?
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Lujo-Agosto:
Editoriale
Dài, cóntame calcossa de belo!
Massa crònaca "nera", massa notizie che fa scareze su le pàgine de i nostri giornài. Informare vol dire par forza spaventare?
de Mario Klein
Sbiansi de sagessa popolare
Segantini in fusara
Da un s-ciapo de sgualdrinote in bela vista xe vegnùo fora el spunto par rivisitare na squadra de segantini in fusara
de Dinerio
Cultura in provincia
Quando la moda xe... fata in casa
Organisà dal Comune de Campodarsego, a do passi da Padova, na insòlita sfilata de moda, che ga fato cultura, tradission... e divertimento
de Luigi Perini
|
