Crònache de l'Altopiano

El "Museo dei Cuchi"

Se su l'Altopian de Asiago la Festa de S. Marco Evangelista, mèjo conossuda come la "Sagra dei Cuchi", se festegia el 25 de marso, le robe che da senpre la ga caraterisà, i "cuchi", ormi se le trova solo ne i musèi, dove se pol amirarli in tute le so forme e colori. Uno de sti musèi, forse el più inportante de l'Italia, xe quelo che ghe xe a Cesuna, in via XXVII Aprile n. 16, drio la statale che da Canove porta a Tresché Conca, proprio sul finire de la salita.
Noialtri de i ani '20 e '30, che el giorno benedeto de S. Marco fasévimo chilòmetri e chilòmetri de strada a pie per spendere una parte de i 10 schei che la nostra mama ne dava a conprare uno de i cucheti esposti su le bancherele alineà lungo le vie de Canove, mai gavaressimo pensà che quei sènplici ogeti de teracota gavarìa dà spunto a una così numerosa schiera de artisti de tuto el mondo per creare modèi novi e stravaganti de Cuchi, fruto del genio fantasioso de ognun de lori e ispirà a le più svariàe culture artìstiche, polìtiche e religiose.
El comercio de i Cuchi ga conossudo in pochi deceni un così grando svilupo da assumere nel mondo, e, per quanto ne riguarda, su l'Altopian de Asiago, le caraterìstiche de una vera gara de chi ne inventa de novi e più originali. Per farse un'idea precisa de quanto l'"Arte dei Cuchi" se sia svilupà nel mondo, basta andare a visitare el Museo dei Cuchi de Cesuna dove, dopo ani de racol-
ta e selession, se trova esposti più de 8.500 esenplari provenienti da tuti i paesi del mondo, e lì esposti, curài e controlài da Giancarlo e Vania Valente, gestori da senpre, che da modesti colessionisti de Cuchi de le antiche generassion, (rapresentanti osèi, galeti e galinele) xe diventà espositori qualificài de vere òpere d'arte, rapresentà da sogeti no più solo in teracota, ma anca porcelana acuratamente colorà.
La difusion de i cuchi nei vari setori de l'economìa europèa ga fato in modo che i principali interessài a quel gènere de comercio ga stabilìo de classificarli secondo una tipologìa che tien conto sopratuto de le particolari caraterìstiche del fis-ceto rispeto al suo suporto.
Naturalmente "paese che vai cuchi che trovi" con la sua specìfica denominassion, a seconda dela nassionalità. Belgi e francesi li ciama Sifflet, i tedeschi Kuckuck, (quasi come in sinbro!), i greci Kanataki, i inglesi Bird wisle, i norvegesi Gauk, i spagnoli Pito e i russi Svistuiska.
Per quanto riguarda i cuchi de stiani, eco una belìssima poesìa scrita da Gino Pistorello nel 1983:
"Quando un pugno de tera,
soto la man antica de l'omo,
diventa mùsica,
vol dir che nasse un cuco
e te ricorda un riciamo d'amor
tra i boschi apena tinti
de primavera."
Disemo, a la fine, che ùnico xe el modo de ciamare sto strumento rudimentale, anca in italian e cioè "cuco", come nel suo originale idioma vèneto, cussì ciamà perché el suono ìmita el canto del cuculo (Cuculus canorus).
El Musèo xe verto dal Marti a la Doménica, da le 10 a le 12 e da le 15,30 a le 19.
Per la vìsita de grupi e scolaresche xe ben telefonare prima, al n. 0424-694283.


http://www.museodeicuchi.it

[torna sopra]