|
Da Belun
Tera preziosa
 |
| L'ort de Collungo. (foto B. De Vecchi) |
Al laoro del contadin no 'l se ferma mai: lu a l'è senpre a l'òpera. Co fora nèvega e la canpagna polsa sot na cuerta bianca e monesina, al sta te la stala a laorar: ghe n'é i restéi che à pers i dent e l'é da sistemarli, o i màneghi de le sape e de i sàrcoi che se a crepà, i scagnèi de la stala co le zate che s-cioza, i zest che fa... aqua! Lu al se dà da far par iustar tut, anca le inpreste de quei altri. E noi se avéa bison-c de sto aiuto, parché a primavera scominziéa al laoro de la tera. Oltre ai canp, ghe n'era da laorar e curar l'ort abastanza grant. Questo l'era a ovest de la nostra casa, propio te'l pian del colet, te na posizion piena de sol.
Dopo averghe mess al ledan de la concimaia, me papà al dovéa svangarlo, ma an tochetin paròn se lo laoréa quasi tuti noi de casa, però no l'era cussì fàzile da far: oltre la fadiga de reoltar profondamente co 'l badil la tera scura, ne cognéa usar anca i oci: sot se podèa catar tante robe: qualche grossa piera, radiss de belùriga, de pegorin, de radici e e de erbe varie che le rivéa dal pra e l'era inportante cavarle... Na sbadilada e hop! la tera fertile e friàbile l'era oltada, ma dopo ghe oléa an bel colpet par taiarla e siòlierla e alora se trovéa... larve rodolade de garduss: bianche co la testa arancio-rossicia come le ale de l'inseto e, de bòta, se ghe'n vedéa córer fora an altro gross, da le forme sgradévoli e de 'n color brunastro che se confondéa co la tera: l'era na chèra. A questo inseto se ghe dea la cacia, parché, có se strapiantéa i vari ortagi, de not lu a ghe zonchéa co le so mandìbole le radiss e al dì dopo le piantine l'era da morte: ne cognéa rifar tut.
A la fin có l'ort l'era ben svangà, te avéa na sensazion de órdine e de pulizia, al bordo intorno l'avéa senpre an profondo cavedal, parché no al se inerbesse fazilmente.
Pi divertente l'era semenar e no se semenéa mai le stesse robe te i stessi pósti: se rispetéa na rotazion. Intant me mama l'avea cronpà bustine varie de ortagi a pianta anuale; persémol, carote, salatina e ravanèi, radici e bisi, ma l'avéa conservà zéole scarogne de le nostre, ajo, basericò, fasoi da tegoline, marele de zuche e zuchet e cocùmeri. Osmarin, salvia, cren, erba menta e camamila (piante pereni) le avéa al so posto speciale. Se strapiantéa sèdano, pomidori, capuz, peveroni. Na olta me mama l'à olest piantar anca i barbagigi (arachidi) che i à al fusto leguminoso sot tera e no ve die al tràfego chel'avéa fat có li à cioti sù, par tostarli te'l forno, parché, da crudi, i é propio come i fasoi!
Le ère de l'ort le se presentéa regolari e te ogniuna ghe n'era an bachetin co la bustina par poder controlar la créssita. Avée vardà co atenzion come che fea me mama a semenar: la movéa e galivéa ben la tera co 'l restel de fer, po' la semenéa a pìciole brancade come i... seminatori de i canp, la tornéa restelar e a bàter ben co 'l restel, parché le semenzete le penetresse te la tera e no le fusse la "méta" de tanti oselin che ghe n'era là intorno. Se gnea na pioveta, cresséa sùbito i ravanèi e dopo la salata e questo l'era al primo racolto de la stajon; quaranta dì ghe metéa inveze al parsémol.
L'ort cussì, co le piantine pena nate, al paréa come an giardin, ma se tachéa le piove l'erba la cresséa pi in pressa e la ris-céa de sofegarle, se no se provedéa a cavarla! tante olte lo fée anca mi e me mama la me racomandéa senpre de star tenta andé che metée le man: podéa èsserghe qualche anda o carbonaz che giréa. Par fortuna avée vist sol che na olta na revesèla color argento: la se movéa lentamente, ma la me avéa fat gner al baticor.
A l'inizio de l'istà piovéa tant e na olta, rivada te i concòi de le tegoline, avée vist an gross rosp rugoso: al se mimetizéa perfetamente co la tera e le erbace, ma i so oci, anca da imòbile, i era atenti. Al primo momento al avea fat nàsser in mi an istintivo senso de repulsion e de paura, parché le me amighete le me avéa dit che l'era pericoloso: secondo lore al spuea te i oci faséndote deventar orbo. La maestra a scola inveze la me avéa racomandà de rispetarlo sto animal, parché l'era fra i pi ùtili che se catéa te i ort canpagnoi... L'era an gran divorator de inseti danosi. Alora me ere piegada su de lu par vardarlo mèjo e no 'l se avéa movest, ma i so oci sporgenti i era senpre vìgili. L'avée tocà co 'n stechet e lu... plaf - plaf, l'avea fat an pochi de salt alontanàndose...
Chissà par qual motivo noi omi sen senpre poc rispetosi verso i animài, specialmente i pi utili!?...
Me mama e me papà i avea catà da dir, na olta. Ela la ghe avea dit rabiosa: "Te sé an rosp!" E lu al ghe avea rispondest: "E ti la pi vìpera de sta tera!"
Sto fato, però, no 'l me avea piasest par gnent!
Te i me giret giornalieri, rivée spess te l'ort: i primi ravanèi, lavadi, co na preseta de sal i era boni, picanti. Me piaséa le badane de i bisi, quele pìciole e tendre: magnée la parte esterna e le balete dolze dolze.
Te 'n canton ghe n'era al ribes e anca là rivée spess; có era ora de le prime carote o pomidori, me fée le me bele magnade.
L'ort al produséa durante l'istà le verdure par tuta la fameja e se fea co i pomidori anca la conserva par l'inverno; se finìa co i ravi che me mama, anca se i é consideradi ortagi de nessun valor, la parecéa in tecia e ve assicure che i era veramente gustosi!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Setenbre:
Editoriale
Dài, cóntame calcossa de belo!
Massa crònaca "nera", massa notizie che fa scareze su le pàgine de i nostri giornài. Informare vol dire par forza spaventare?
de Mario Klein
Da Belun
Tera preziosa
de Biancamaria De Vecchi
Cultura Visentina
"NaturArte Sandrigo"
Da setenbre a novenbre de sto ano a Sandrigo vien organizà un ciclo de incontri che se òcupa de l'arte e de la natura del teritorio
de Giordano Dellai
|
