|
Cultura Visentina
"NaturArte Sandrigo"
Da setenbre a novenbre de sto ano a Sandrigo vien organizà un ciclo de incontri che se òcupa de l'arte e de la natura del teritorio
 |
| El Municipio de Sandrigo. |
Xe stà un pòpolo antico e co na gran civiltà, cofà i Greci, a dire che l'arte xe la imitassion de la natura. Xe par questo, donca, che i artisti greci i gaveva na concezion de l'arte cofà la rapresentassion de la realtà cussì come i oci de i òmini (inteso in senso leterale, le done in Grecia le vegneva bone solo par rancurare fioli e sodisfare i apetiti sessuali de i òmani) la vedeva. Da chel momento là, natura e arte, arte e natura se xe ciapà parece volte brassocolo, trovando quasi senpre la maniera justa par 'ndar d'acordo.
Sta specie de sinbiosi xe stà osservà anca da la Bibioteca de Sandrigo, che tra setenbre e novenbre ga organizà un ciclo de sinque apuntamenti intitolà "NaturArte Sandrigo", un tìtolo che mete in evidensa el raporto streto tra ste do manifestassion de la realtà umana e naturale. El ciclo se verze vénare 20 setenbre co la presentassion del libro de Francesco Mezzalira "Bestie e bestiari", Allemandi editore. Se trata de na publicassion che rancura na serie de imàgini de animali tra arte e siensa, da i grafiti de i òmani preistòrici disegnài rento a le caverne el dì prima de partir par na batuta de cacia, a le imàgini de i siensiati siessenteschi vignùi dopo de Galileo, passando par i cussì ciamài còdici miniati medievali che in prima pàgina, in corispondensa de la prima lètara copià dal testo antico, i gaveva spesso la riprodussion un pochetin stilizà de un animale, vero o inventà che 'l fusse. A inpressiosire el libro ghe xe anca la introdussion de Danilo Mainardi, famoso etòlogo che ghe juta parece volte Piero Angela in ocasion de documentari su animali trasmessi da "Superquark". Mezzalira insegna siense al licèo clàssico "Brocchi" de Bassan del Grapa e no l'è novo a publicassion del gènare, avendo curà, tra i altri, anca el capìtolo rivardante la fauna del volume sul lago de Fimon.
El secondo apuntamento del ciclo xe programà par el 4 otobre, senpre de vénare. La serata se disputarà ancora na volta 'nte la sala conferense de la Bibioteca Cìvica de Sandrigo e la sarà inprontà a parlare de la idrografìa del teritorio altovisentin. Protagonisti stavolta i sarà i pescadori del Grupo Pescadori a Mosca de Sandrigo, i quali i presenterà el Progeto Pilota finansià da Region e Provincia sul fiume Tésina. Se trata de un argomento che se riferisse a un problema vecio e stravecio: da quando pi de trent'ani fa sto fiume, che rancura le acque de l'Àstego e 'l se buta 'ntel Bachilion, el xe stà incementà, no nasse pi i sortumi, no ghe xe pi pesse e, quel che xe pezo, no rancura pi le aque in ecesso có ghe xe le brentane provocàe da forti tenporali. La proposta de i pescadori a mosca sandricensi, portà vanti da diversi ani, xe de ripristinare la naturalità del teritorio, costruendo de i canali de scolo par l'aqua piovana sovrabondante, tiràndoghe via el cemento dal leto e da le sponde del corso d'aqua e fasendo rifiorire la fauna ìtica ma anca quea de i osèi che ghe sta senpre drio ai torenti gnancora iregimentài.
Par queo che concerne el terzo de sti apuntamenti, el se tegnarà el 18 otobre in una de le vile vènete de cui Sandrigo xe siora. Defati la serata parlerà de le vile del teritorio sandricense e de l'òpara de l'Associassion Dimore Stori-che Sandricensi e Dintorni, a la quale xe iscriti i propietari de le istesse vile e anca chi ga caro che le staga in pie 'ncora par tanti ani. Xe stà propio sta associassion che ga insistìo parché vignesse fate raquante risserche su i so edifissi stòrici, risserche che 'desso xe confluìe in un paro de tesi de laurea che 'ntel corso de la serata vegnerà presentàe. In una de ste vile, l'atuale vila Sesso-Ruffini, 'ntel 1532 xe stà ospità gnente de manco che l'inperadore Carlo V, che passando da ste parte xe stà òspite de i conti Sesso che 'lora gaveva in man Sandrigo.
Le ùltime do serate se tegnerà 'nte i primi de novenbre e le parlerà de la fauna del Visentin e de le atività del Gruppo CAI de Sandrigo. La speransa xe de un sucesso de l'inissiativa, anca parché se trata de problemàtiche sentìe da la popolassion, no solo locale. In fin de i conti, Sandrigo, in tuto el teritorio altovisentin, xe stà uno de i puchi comuni che xe riussìo a rancurarse parece aree verdi, cofà quela de Lupia o quela del Tugurio. Questo dimostra la volontà de pensare anca a la dimension naturale, e qua se ricoleghemo al discorso inissiale, parché anca i sandricensi, cofà i greci antichi, i ga capìo che la vera arte xe quea che se specia 'nte la natura.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Setenbre:
Editoriale
Dài, cóntame calcossa de belo!
Massa crònaca "nera", massa notizie che fa scareze su le pàgine de i nostri giornài. Informare vol dire par forza spaventare?
de Mario Klein
Da Belun
Tera preziosa
de Biancamaria De Vecchi
Cultura Visentina
"NaturArte Sandrigo"
Da setenbre a novenbre de sto ano a Sandrigo vien organizà un ciclo de incontri che se òcupa de l'arte e de la natura del teritorio
de Giordano Dellai
|
