|
Editoriale
Prigionieri de on muro
On muro, tirà sù par separare do pòpoli, do fameje o do persone, el rapresenta on falimento e na vergogna
 |
| Cussì on rabino el podarà pregare davanti al muro del pianto... opure a quelo de la vergogna! |
No ghe xe pace tra do pòpoli che se confina? Se inalza on muro! Do fameje no le va pi d'acordo tra de lore e le taca a farse dispeti? Se fa na mureta o se pianta na passaja e se divide la corte che prima la jera in comune: tuti a casa soa, e là 'a finisse! Xe finìo el miele del raporto coniugale tra du sposi, magari vanti co l'età? Ognuno par la so strada! Se tira sù on muro de carte e de avocati e se conbina na bela separazion. Cussì naltra volta la (o el) inpara!
Nessun de i do pòpoli ga vinto; nessuna de le do fameje trarà vantajo da l'avere troncà de bruto chel bel raporto de "on piato va e uno viene"; i do macadèi de sposi i se catarà prigionieri, separà da on muro de libertà solitaria che fa male pi de quanto no se creda o no se diga!
Nel caso del muro "fisico" che Israele xe drio inalzare par separarse da la Cisgiordania, se ga l'inpression che el rapresenta na sconfita pi che na vitoria, on falimento pi che on risultato positivo, anca in fato de sicureza. No ghe xe muro, no ghe xe bariera eletrònica che possa fermare l'odio, el terorismo, la vendeta, l'ofesa. Gnente de "fisico" pol fermare le idèe e i progeti kamikaze: solo giustizia, libertà, rispeto, colaborazion econòmica e solidarietà i pole portare al trionfo de la convivenza civile.
No sta a noaltri dire da che parte che ghe xe la rason e i torti, anca parché, de sòlito, i xe ben spartìi da na parte e da st'altra. Podemo soltanto, de riflesso, esprìmare la preocupazion che fa nàssare on tipo de separazion come quela de on muro. "Alora go parlà par gnente", pare che la ne diga la storia! La storia, condanà a insegnarghe ai òmeni la strada del ben e del male. No ga servìo a gnente la lezion del muro de Berlino, la vergogna, la tragedia, l'assurdo de na separazion che tuto el mondo ga condanà!
"No ghe xe sordo pi de chi no vol sentire" ne ricorda on proverbio. Forse, 'lora, bisognarà urlare pi forte che se pole el nostro bisogno de pace, a la stessa maniera de quando Javel ga dito a Giosuè come che el gavarìa dovesto fare par far cascare le mure de la cità de Gèrico (Giosuè 6, 16): "...Girare par siè giorni in procession intorno a Gèrico, sonando le tronbe e portando l'arca de l'aleanza; al sètimo giorno, girare 'ncora sete volte e po' tuti insieme urlare el nome de la cità: le mure de Gèrico le cascarà!" Le mure xe crolà basso e la cità xe stà conquistà senza fare guera.
Conbatendo ogni tipo de separatismo, de egoismo e de fondamentalismo, rivedendo la distribuzion de i "beni", ridusendo i armamenti e destinando sti risparmi a la lota contro la miseria e l'ignoranza, fasendo guera a ogni tipo de violenza, de intoleranza e de fanatismo: eco come far cessare contrasti, scontri e atentati. Tirando sù on muro, se ris-cia de isolarse, de catarse prigionieri de la propia paura e de deventare senpre pi déboli.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Setenbre:
Editoriale
Dài, cóntame calcossa de belo!
Massa crònaca "nera", massa notizie che fa scareze su le pàgine de i nostri giornài. Informare vol dire par forza spaventare?
de Mario Klein
Da Belun
Tera preziosa
de Biancamaria De Vecchi
Cultura Visentina
"NaturArte Sandrigo"
Da setenbre a novenbre de sto ano a Sandrigo vien organizà un ciclo de incontri che se òcupa de l'arte e de la natura del teritorio
de Giordano Dellai
|
