Tradission de Nadale

Quando la storia incontra la vita

Ne la pàgina, qualche séna del "presepio vivente" del 2001: la stala del miràcolo; na tenda de palestinesi; done inpegnà ne i lavori del nostro recente passto. (Foto "Archivio Presepio Codiverno")

Romài ghe semo! Anca sto ano xe a bon punto i pareciamenti par el presepio vivente de Codiverno, el paese soto Vigonza, 'pena fora de Padova.
Don Aldo Manfrin, pàroco del paese, me dise che l'idea de fare el presepio xe vegnù fora siè ani fa, parlando co de i parochiani, quasi pa' na scomessa: nessun alora se gavarìa mai pensà che dopo 'na prima 'speriensa se gavarìa possudo 'ndare 'vanti e fàrghene de le altre e 'diritura che nel giro de pochi ani la manifestassion, orgolio de tuti i paesani, la vegnesse conossuda e nominà da giornài e television e visità da mi no sò quanta zente. Femo notare a don Aldo, che lo savemo che 'l ga na predilession par San Francesco, che la tradission voe inventore del presepio, che forse gnanca el poarin de Assisi nel mentre che'l pareciava el so primo e ùmile presepieto a Greccio (Rieti) la note de Nadale del 1223 se gavarìa imaginà che dopo squasi otosento ani el sarìa sta copià e ricopià e adiritura el deventasse "vivo" par la meraveja e devossion de grandi e picenini. Vien da pensare che le robe fate ben, sènplici e insieme co i altri e co amore, le piase al Signore e le vien premiàe. Don Aldo del "so presepio" tien a dirne, e el me racomanda de sotolinearlo co 'n strisso, "che la rapresentassion nel so insieme no la xe 'na fiera. El tuto xe on calcossa de piasévole, variopinto, beo e alegro quanto che se voe, ma no na fiera".
El caminamento nel quae vien introsà el visitatore, passando par primo da la porta de la ciesa, nel so interno e dopo fora, al verto, xe studià in maniera de costrénsare uno a vegnere via insiorìo de on calcossa in pi, de on pensiero da tegnerse in mente, on messagio beo da contarghe ai altri, 'na pìcola giossa par deventare mèjo e butare chel bon che se se porta via, so 'l mare de miserie nel quale noemo tuti, in sto mondo romài sensa valori e che, a difarensa de i Re Magi, no se xe pi boni de vardare in alto parché se ga perso la tramontana.
El beo del presepio de Codiverno e sicuramente anca el susesso xe dovudo al fato che ogni ano el xe difarente e el canbia de significati. Pur partendo senpre da i senari de la Palestina, da i loghi che ga visto la nàssita del Redentore, i oci 'sperti del grupo culturale, atenti a rapresentare la nostra cultura e tradission popolari, i lavori de 'na 'olta, i artigiani, el nostro modo de vìvare e queo de i nostri veci, ogni ano i propone e i fa riferimento a na roba che xe sucessa, che ga fato ciasso e notissia. L'ano passà la tragedia de le Tori Zemele de New York, sto ano invesse, ano de Giotto, el presepio s'ispira al restauro de i afreschi del pitore fiorentin, ne la Capela de i Scrovegni a Padova.
Par tegnere in piè tuta la strutura de sta inpresa se move 'torno co varie mansion sirca tresento persone, fra le quali diese putèi, nati entro l'ano, che se alterna nel fare la parte del Gesù Banbin.
El materiale che vien usà (legno, fero, stofe e vestiti, ecc.) xe tuto materiale poareto e rancurà in giro, che bravi maestri artigiani (fàvari, sartori, maestri, marangoni, 'letricisti, murari, ecc.) rimete a posto e se dà da fare parché el torna a èssare come novo. L'ano passà el presepio xe stà visità da oltre ventimila persone. Le rapresentassion vien fate da le ore 15 a le 18 el di de Nadale e Santo Stefano. Senpre co i stessi orari el 1° de genaro 2003, la doménega 5, el luni 6 e la doménega 12 de genaro. El 28 de dissenbre, in noturna, da le ore 20 a le 22. On avenimento che xe on pecà pèrdare! On gesto concreto de volontariato che xe proprio bruto no riconpensare almanco co na vìsita.

[torna sopra]