Quatro Ciàcoe - Editoriale - Genaro 2003

Quatro Ciàcoe
Mensile de cultura e tradission vènete

de Mario Klein

Editoriale

E dato che ghe semo... nemo vanti!
20 ani: se Quatro Ciàcoe no la ghe fusse, a sto punto bisognarìa inventarla

L'incision del prof. Alberto Bolzonella, par i "Vint'ani insieme".

Pi la xe dura nar vanti, pi se se convinze che oramai no se pole pi fàrghene senza. De cossa? Ma de la nostra rivista! Col mese de dissenbre 1983 vegneva fora el primo nùmaro de Q.C.: na storia che pare destinà a continuare, visto come cresse l'intaresse intorno a ogni "parlata", che par capirse mèjo ciamemo dialeto. Che questo sia vero, lo testimonia anca l'autorévole convegno su "la parlata vèneta" de l'8 dissenbre scorso, tegnùo a Padova (vedi servizio), in ocasion de la nostra festa de conpleano, dove xe stà riconossùo el calo del nùmaro de i parlanti in dialeto, ma in conpenso xe cressùo el studio, l'aprofondimento, la difesa del valore fondamentale de la "prima lingua".
Cussì, come soto un certo punto de vista l'esperiensa de Quatro Ciàcoe la pare tenpo perso, roba par veci, par zente che no sa fare gnente de mèjo che piànzarse 'dosso pa 'l "come eravamo", soto naltro punto de vista la rapresenta na testimoniansa zóvane, destinà a fare strada, a canbiare e deventare mèjo, forse manco seriosa e magari un fià pi spassosa, ma senza bisogno de far inboressare, senza mai cascare nel trabocheto de la superficialità e tanto manco de la volgarità.
Certo che dal 1983 ghin'è passà del tenpo, e col tenpo xe passà tante pene (penne) che ga lassà su le pàgine el segno de na presenza ùnica e mai ripetìbile, parché ognuno de noaltri xe senpre ùnico. Pur restando fedele a le intenzion de quando che la xe nata - "ocuparse de dialeto... senza che la sia na preocupassion, ma na sodisfassion, un divertimento... (c.f.r. primo nùmero) - la rivista, 'desso come 'desso, la sente la responsabilità de èssare deventà ormai "òtima", nel senso de "maggiorenne" e de doverse confrontare senpre con maturità con i propi letori.
La storia e i mèriti del passato no credo che i garantissa gnanca un'ora del futuro. Par questo semo qua a riflètare su i "vint'ani insieme", a interogarse su parcossa vale la pena fare quelo che femo e garantire la continuità de sta iniziativa straordinaria. Tante volte se ghemo domandà se se vede el risultato de sto "lavoro di squadra". Disemo che i oci del mondo vèneto i varda tanto in altre direzion. No ghe xe bastanza scàndali o crònache rosa o "a luci rosse" par atirare l'atenzion de la gente: el passato, par de pi, el xe roba da desmentegare, e morto là! No se pensa che par saltare el fosso del futuro, bisogna ciapare la rincorsa, magari mìnima, fasendo un passeto indrìo, senza fare archeologìa del dialeto, ma par èssare testimoni del nostro tenpo. Par questo na parte de pàgine la xe destinà a la "contemporaneità", a robe che càpita 'desso, che vegnemo a savere e che xe bone anca el dì drio. E, come senpre, nessun fanatismo, nessuna manìa de protagonismo, nessun legame polìtico e gnanca intaresse de fare schei: solo dialeto e con tanto entusiasmo!
Quindi, visto co che fassilità che nasse e more tanti giornài e riviste, no podemo che sentire orgolio par èssare rivà fin qua. E l'augurio de longa vita che ghe femo a Quatro Ciàcoe, ghe lo femo anca ai nostri colaboratori, ai cari letori e ai inserzionisti. Questo xe el "lavoro di squadra" che ne fa dire: "E dato che semo... nemo vanti!"