Solidarietà

La lebra la se poe vìnsare

Quando sentimo parlare de lebra, ne vien i penoti e pensemo, forse, ai lebrosi guarìi da Gesù. Invesse, anca 'desso, le persone colpìe da sta malatìa le xe 12.000.000: un milion i casi ativi, 4 milioni con mutilassion ne i arti, opure orbi, e 7 che ga bisogno de riabilitassion fìisica. Ne la nostra Padova, nel Medioevo, ghe gera do lebrosari: el primo xe stà costruìo insieme a la ciesa de S. Crose, come risulta da on documento datà 30 aprile 1181. Inoltre, dal testamento de na dona inportante e siora del tenpo, Speronella Dalesmanini del 10 giugno 1199, savemo che la gaveva disposto che "50 lire vadano per la chiesa di S. Croce affinchè i lebbrosi lì ospitati vengano rivestiti di indumenti" ("malesani ibi morantibus indumenta emantur").
Nel 1299 el véscovo de Padova xe 'ndà a visitare i lebrosi de S. Croce e, come S. Francesco e Raoul Follerau, el li ga abrassài e basài. On secondo lebrosarìo se trovava a 1 Km e mezo fora Pora Portelo so la strada tra Padova e Ponte de Brenta. De l'esistensa de sto lebrosario gavemo conferma dal testamento de un çerto Buffone di Bertolotto, che el ghe ga 'assà tanti schei a l'ospedale de San Lazzaro. Par i lebrosi de chel tenpo "vigevano" de le disposission ben precise: no i doveva 'ndare in giro par la çità o i soborghi e, quando i vegneva trovài a caminare par le strade, el podestà doveva mandarli via. Par fortuna, 'desso le robe xe canbiàe, sopratuto par quanto riguarda la cura.
Dal 1981 con l'introdussion de la polichemioterapìa (rifanpicina, clofazimina e dapsone) se poe guarire da la lebra.
El periodo de incubassion del bacilo va da 5 a 20 ani e la cura da sei mesi a do ani. Quelo che xe 'ncora tanto triste al dì de oncò xe che le persone, guarìe conpletamente, le continua a èssere considerà "diverse" e socialmente emarginàe.
El 26 de sto mese ghe sarà la 50a "Giornata mondiale dei malati di lebbra": on gran apuntamento de amore e, par questo, de solidarietà verso i ùltimi del mondo.

Foto scattà te un paeseto vissin a la sità de Lucknow, nel stato de Uttar Pradesh de l'India del Nord. (foto Franco Paolo)

Sta giornata xe stà istituìa nel 1954 da R. Follereau, scritore, poeta e giornalista francese che, par el so inpegno par la lota a la lebra, el xe stà ciamà "l'apostolo de i lebrosi". Purtropo oltre 2.000 persone se mala ogni giorno e se stima che i sia altretanti i casi no identificài. El Paese dove che ghe xe più malài xe l'India: el 73% de tuti i lebrosi del mondo.
Par questo el 26 de genaro, sarà proposta in tantissime piasse d'Italia la vèndita de on vaseto de miele par sostegnere i progeti de la "Associazione Italiana Amici di R. Follereau" (AIFO) contro la lebra. Anca a Padova ghe sa-rà on bancheto e sarà presenti an-
ca i Scouts, co l'entusiasmo de la giovinessa.
In Brasile, ne i ani '80, xe nato el Movimento de reintegrassion par persone colpìe da la lebra, par opera de D'Jalma Claudio da Silva e de altri 7 conpagni che i ga sperimentà su la so pèle la malatìa e, de conseguensa, la discriminassion e la disperassion. Penseve che sto Claudio el ga patìo la fame, pur 'vendo i schei in scarsela parché nessuno voleva "denaro infetto" da le man de on lebroso.
E finisso co na so considerassion: "Quello che più mi fa soffrire è vedere bambini che, nell'epoca della tecnologia che ha permesso all'uomo di arrivare sulla luna, sono portatori di handicap gravi, dovuti ad una malattia che si potrebbe prevenire e curare in tempo, se solo si volesse... "

[torna sopra]