Quatro Ciàcoe - Spetando che néveghe - Genaro 2003

Quatro Ciàcoe
Mensile de cultura e tradission vènete

de Biancamaria De Vecchi

Da Belun

Spetando che néveghe

"...al spetàcol l'era da fàvola..."

O subì anca mi da piciola al fàssino de la neve come divertimento, ma al me à durà pochi ani: scominzié però a spetarla dà (già) in novenbre.
Drio casa ghe n'era an colet che vedéa tanti dughi mei e de me fradel propio te sto mese. Có rivéa qualche springadina de neve, spes la se desféa in pressa e alora... adìo, slitade! Altre olte la se dontéa a la brosa e a le giazade e la rendéa al col pronto par divertirse.
Noi no se avéa al ferion, ma i me fradèi avéa na slita e mi dughée co quela. Me sorela l'avéa tut: si, rachete, braghe a la siatora, maiói... mi, inveze, sol che i calzetói e i scarpói: questo no me inpedìa però de divertirme!
Quele olte che no neveghéa, ma ghe n'era gran giazade, me fradel al portéa an poche de sece de aqua te la zima del colet e al la butéa dó (giù): questo al dopodisnar, an cin tardet par perméterghe a l'aqua de iazarse. E prima che gnesse scur... dó, a gizolade! Al strato de giaz l'era sotil e qualche olta se ris-céa de inpiantarse te qualche ciòt de erba, che spuntéa fora, o de andar a rebòtole...
"Iuuh! che bel!... Iutoo!... Òciu che me inpiante!..." L'era tut an zigar e, se ne cognéa interónper la dissesa, se la finisséa de corsa e a salt!
Me fradel na olta l'avéa ciót do tòc de tòle, longhi uguali, l'avéa smussa ben co la raspa la parte davanti, a l'avéa fata a ponta e, sbusà co 'l tràpano al spessor, al ghe avéa infilà do cordete: l'era an pèr de si fati in casa! Sol che ste tòle no le sbrisséa pulito e se era delusi. No ne restéa che le gizolade e spetar la neve vera, co gran preocupazion de me mama, parché oltre che ris-ciar de farse mal, se speléa gran parte del col.
A dizenbre se spiéa al cel e se ripetéa: "Par S. Nicolò, se podarò vegnarò; par Santa Lucia, me farò in via: a Nadal, no farò fal!" Qualche olta rivéa genaro prima che gnesse la neve e la restesse a longo.
Te l'inverno no se fea dughi fora e 'lora se la spetéa co ansia. De le olte neveghéa de not e a la matina l'era na sorpresa, ma ghe 'n ricorde altre che tachéa a fiocar de dopomedodì: al tenp al ne avèa preparà tuta la matina, teren iazà, tenperadura intorno a zero gradi, cel uniforme bianco de madreperla o 'pena grigio e ghe n'era come qualcossa sospeso te l'aria...
Serada te la cusina, co 'l nas fracà su par i vieri a disegnar co 'l fiadum, te 'l pi bel vedée qualcossa fora ghe gnea dó pian pian da tut quel grigior: l'era le prime fulische.
"Urrah! Mama, névega!"
"Accidenti, doman l'é da spalar par far la strada!" la me rispondéa, ma mi ere dà persa drio le fulische che aumentéa senpre de pi, anca de grandeza: pian pian le deventéa fioc. Alora volée seguìrghene un e vederlo aterar. Tegnée i oci fissi in zima e ghe 'n fissée un: al dondoléa dolzemente in qua e in là e, come portà da l'aria, no 'l se incontréa co quei altri, la so dissesa l'era sguelta e riussìe 'pena 'pena a vederlo poiarse lediero lediero par tera e confónderse fra tuti. Sti fioc rivadi te'l teren iazà i binéa e in poc tenp tut deventéa bianc e miracolosamente novo. Me domandée come che sucedéa an miràcol (al me paréa, a mi, banbineta!) cussì sugestivo, ma me à cognest studiar le sienze par saverlo: i aghet de giaz i se forma intorno an granelin de pólver e po' i se unis co altri fin a formar i cristài regolari a sié ponte, tuti diversi par disegno l'un da l'altro; ste stele le forma i fioc; pi fioc, le falde; pi falde quele che noi ghe ciamon... straze... Ma tut questo no se pol distìnguerlo a ocio nudo te'n manto nevoso...
Dopo la nevegada de sòlito gnéa seren: alora al spetàcol l'era da fàvola: al sol te mandéa i so ragi che, riflessi, i fea brilar la neve e l'era inpossìbile no sentir l'aria pi pura, no veder al mondo pi bel!
Mi qualche olta de scondión de me mama, me aventurée, sbalzando la neve, drio casa par amirar al paesagio: al mantel nevoso a l'avea amorbidì tut: te vedéa dolze colinete e qua e là le casete de i contadin co 'l penacio de fun. Tut riposéa: la tera, le piante, tanti animài. No ghe n'era pèche, sol vizin casa le orme de qualche panegàs, del bèt o del réuzol, che al se fea sentir co 'l so vers curt e metàlico e al ronpéa an màgico silenzio... Alora tornée indrìo e portée in casa Dog che l'era tut ingretolì drento a la so cucia.
"Mama! Doménega se l'é bel, posse andar a slitar?"
"Te andarà co i to fradèi".
La meta domenicale l'era an gran col no tant distante da casa; l'era vesin al "Tiro a Segno" verso Col di Piana e l'era an posto frequentà da tanti bocete e dóveni de Belun. N'altra mèta famosa e fursi pi bela l'era a l'"Anconeta", ma la se trovéa al de là de la Piave e par questo massa lontan da casa. Rivadi te 'l col, dopo aver passà l'abitazion de i Toni, se catéa tanta dent. Le piste l'era dà bateste, ma ogni tant te afondéa fina a metà ganba e a mi no me piaséa.
Zigando: "Pista! Pista!" partìe ben atenta de no andar a brazar qualchedun! L'era bel, l'aria la te pizighéa le guance e, rivadi in fondo, te 'l pian, la velocità la te fea proseguir par an bel tòc. Ma al pedo l'era tornar indrìo tirando sù la slita: questo no 'l gradìe par gnent.
Na olta al vizin de casa, papà de le me amighete, che al siéa propio ben, l'avea piantà le rachete e al me avéa ciapà in braz e portà dó par la dissesa velocemente: n' emozion da "adrenalina" pura!
Dopo an pèr de ore de dissese e risalite tornée a casa straca co i diaolet te i déi de i pié e de le man, pensando che no l'era stat propio tut divertente: mèdo e mèdo!

[torna sopra]

Archivio

2022