Quatro Ciàcoe - Na nevegada miracolosa - Genaro 2003

Quatro Ciàcoe
Mensile de cultura e tradission vènete

de Giacinta Dall'Ora

Da Verona

Na nevegada miracolosa

Dopo un tira e mola sensa fine i era partìi par quei pochi giorni de vacansa a caval tra l'ùltimo de l'ano e la Pifanìa. I avèa prenotà tuti du le ferie da almanco tri mesi. Pecà, però, sassinar tuto quel tenpo in un viaio romàntico su le Dolomiti, 'desso che i era de róta. L'era un mese seco che i criava matina e sera, cioè ogni olta che i se vedéa. Par fortuna i se fermàa a magnar fora, senò i saréa stè barufoni da fogo anca a mezodì.
I era stè in balansóla fin a la sera prima, ma dopo tanto pirar, i avea caricà el cànper, inciavà sù casa e, inmusonè uno piassè de quel altro i s'avéa inviè verso l'autostrada del Brenero.
Ghera un fredo beco, un tràfico da manicomio e, drento el furgonsin, un silensio de tonba. Lu el pensàa a guidar, ela la faséa la fenta de dormir. A Ala i era za in coa, con l'aqua del motor che boiéa e el riscaldamento fermo. Ela, ingiassà stenca, l'avéa scominsià a dirghe sù parché no l'avéa controlà la caseta con le rue prima de partir. La sercàa de star calma, ma, sicome lu, ingrugnà, no 'l se degnàa de rispóndarghe, ela l'avéa alsà la osse pian pian e caricà da la susta del nervoso, a Rovereto la sigàa come n'anguana. E lu senpre sitto.
A Trento avéa lassà lì de bóier l'aqua del motor ma l'avèa tacà a levar el boio ela. El riscaldamento no 'l gavéa gnanca par i sète sentimenti de funsionar, ma drento el furgon ghera un caldo che se s-ciopàa par i fumeti che vegnéa fora da la so boca senpre in moimento. E lu muto come un pesse.
Se el gavesse risposto, magari dito sù, o anca dato na dindonada, ela la s'avaréa calmà na nina. Ma lu el tegnéa serà la boca con el cadenasso.
A Ora 'ntanto s'avéa inuvolà e ela la gavéa voia de piànsar, ma la tegnéa duro parché el ghe paréa un segno de debolessa.
La le vardàa pensando che la ghe voléa ancor ben anca se ne i ùltimi tenpi la l'avaréa strossà par la so indifarensa. Poco prima de Bolzan lu l'avéa scominsià a sbaciar e ela a cantar vitoria. La le conosséa da trent'ani e la savéa che da lì e 'n poco el s'avaréa molà e el gavaréa dito che el gavéa fame. E 'nvesse lu... lavri inciavè.
Gnancora a Bressanone s'avéa inpissà la spia del gasolio, lu l'avéa za messo in boca un par de caramele (voléa dir che oltre che fame el gavéa anca sé) e ela la ridéa soto i bafi, sicura che da lì e 'n minuto lu l'avaréa cedùo.
Ma el paréa che l'avesse fato voto de tàsar.
A Fortessa el s'avèa fermà a far rifornimento par el cànper e anca par lu. L'avea brocà un paneto longo trenta centìmetri inbotìo co 'l spec e formaio, spanpanando ne la gabina un profumo de bon, de casalin. Ela, dura, la nasàa, strangossando. Sodisfato, con la pansa che no reclamàa più, el s'avéa stravacà sul sentarin dedrìo e l'avéa fato un soneto.
Contento, passùo e sponsaìsso, dopo un par de ore l'era ripartìo. Ela, rabiosa, famà e co 'l mal de testa, la gavéa le làgrime su l'oridel de i oci.
El cel el s'avéa rebaltà 'nsieme al so cor; un ventasso l'avéa arbinà propio sora Vipiteno tuti i nugoloni che prima spassesàa lìberi e scominsiàa a vegner zo qualche faliva. Alora, solo par educassion, el gavéa dito: "Bisogna fermarse". Par sercar el canpegio i s'avéa slontanè dal paese e de bòto la boca nera de sora l'avéa scaminsià a gomitar falive bianche. I s'avéa fermè ne 'l primo slargo a spetar. Ela l'avéa preparà na pastassutina fin che lu el sistemàa el riscaldamento. Passà la slorda, i avéèa ciapà in man un libro, i avea leto un pochetin e, visto che no calàa de nevegar e che i croàa dal sòno, i avèa sbassà el lèto e i era né a dormir. E che dormida... I s'avéa sveiè a 'n botesar lontan e i s'avéa incorto che la neve l'era rivà fin al finestrin. No se podéa gnan vèrsar la porta. Cissà quanto i avaréa dovùo star lì drento, gónbio a gónbio. Ela l'era anca spaentà par sto isolamento, la ghera nà vissin e ela s'avéa postà a lu che el gavéa ciapà la man strucàndoghela. Con la scusa de farse i auguri de bon ano i avéa scominsià a parlarse. I ciacolàa e 'ntanto i pensàa tuti du che el saréa stà sens'altro un 2003 propio "speciale"!

[torna sopra]

Archivio

2022