|
Robe de Ciósa
El Nadale a Ciósa 'na volta...
 |
| Presepio artìstico (tecnica mista) preparà nel Nadale 1998 ne la cièsa de S. Andrea a Ciósa dal cav. Gilberto Tonello. (Arti Grafiche DIEMME, Taglio di Po) |
La miseria che ghe gera 'na volta a Ciósa (parlemo de l'Otosento) no permetteva serto grandi lussi ai pescaori a Nadale. E infati solo per sto dì, 'na volta a l'ano, ghe gera in tola pasta in brodo de carne o de polastro, mentre el secondo gera un lesso de carne compagnà da fasiòi o patate lesse. Per finire, tuti se gustèva el tìpico dolse ciosòto de Nadale, la smegiassa, fata co melassa, suca, farina e aromi, un dolse che no mancava mai a Nadale e che a fete se vendeva pure su i bancheti ne le cale o soto i pòrteghi. I benestanti (ma i gera pochi) i pareciava invesse un rico pranzo de Nadale, co 'na gran varietà de pesse, spessialmente bisati e carne.
El primo piato gera i tortelini fati in casa.
Un particolare colegà al Nadale de 'na volta a Ciósa gera l'usansa, adesso de moda e che se ciama "strenne", e che invesse alora se ciamava regalìe. Per esempio, i persenévoli (grossisti de pesse) regalava ai paroni de compagnia 'na dindieta co un vaso de piera pien de mostarda e do franchi de mandolato. Per el paron de barca la regalìa gera un chilo de carne, un vaso de mostarda e un franco de mandolato e infine per i paroni de i bragosseti, ostreghèri, sardelanti e molecanti un chilo de carne.
I paroni de vale, invesse, i ghe regalava a parenti e amissi casse de pesse e córbole (séste) de bisati.
Anche i paroni de magazèni de vin i ofriva come regalìa ai so clienti diverse botilie de vin bon, a seconda del faturato. Ai maestri de scuola gera usansa regalarghe 'na sésta co un franco de mandolato, un vaseto de mostarda opure 'na polastra o un pèro de salami o la smegiassa.
Eco qualche proverbio de Nadale (pochi, per la verità) de i nostri veci:
Da Nadale el branzin - da Pasqua el beresin (capretto).
Nadale Nadalin - trédese dì ghe vuole al berolin (befana).
Có Nadale xe dadrìo - descalsi se può passare el rio.
Da Nadale a Pasqueta - la zornàe se slònghe de un'oreta.
El popolin dizeva che la note de Nadale gera la note pi freda de l'ano: atorno al fuogo del camin impissào co stissi che s-ciopetava sóra el fuoghèro e al lume de 'na làmpada a ogio, se trovava, aspetando la mezanote, tuta la famegia. El vecio, o mègio, el Barba, sentà sul so caregon, a contèva ai nevodini, sentài vissin a elo, le vecie fiabe del "Barba Sucon", de "Pometo Rosseto", del "Maestro e Piero", ecc. Oni fiaba finiva sempre co la tiritera: Da Vigo al Dòmo - un franco a paròmo - e da Vigo a Santa Maria - contéme la vostra - che la mia xe finìa.
Oni tanto el vecio, che i fioi scoltèva a boca verta, a se fermava de contare e l'aprofitèva cossì per impissarse la so pipa, tirà fora dal comò per l'ocasion, e lònga (cossì i dize) adiritura un metro e mezo..., tanto che a doveva impissàrsela tante volte.
Quando sonèva mezanote e i bambini caschèva dal sòno, el vecio smeteva de contare le fiabe. Vissin de elo se fazèva i so fioi, deventài òmeni, e quando se sentiva sonare le campane de la cièsa per la messa de mezanote, lu (el vecio), co fare serio e misterioso, a ghe svelava le formule segrete da dire in caso de sióni (cicloni) o contro le punture de i pessi velenosi.
Come in altri posti, anche a Ciósa gera 'na volta molto difuse le nenie de Nadale, 'na spèssie de nine-nane a Gesù Bambin. Ste nenie gera inserìe nel cosideto "Canto de la Passion", 'na sorta de sacra rapresentassion ciamà le carte onte, che se tegniva durante la setimana santa e composta da vari episodi senegiài su la vita de Gesù, e fra questi anche la Natività, l'anunsio ai pastori e l'adorassion de i Re Magi.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Dissenbre:
Editoriale
Vint'ani de dialeto e altro
In dissenbre 1983 el primo nùmaro de la rivista: in copertina on s-ciapo de òmani drio far quatro ciàcoe. Na inpresa ris-ciosa che se ga rivelà inteligente, dimostrando che el dialeto no xe na lingua de poareti o de inseminìi, ma de tanti, se non de tuti
de Mario Klein
Salute
El mèdego condoto
de Mario Galdiolo
Da Belun
An pež special
de Biancamaria De Vecchi
Robe de Ciósa
El Nadale a Ciósa 'na volta...
a cura de Angelo Padoan
|
