Editoriale

Vint'ani de dialeto e altro
In dissenbre 1983 el primo nùmaro de la rivista: in copertina on s-ciapo de òmani drio far quatro ciàcoe. Na inpresa ris-ciosa che se ga rivelà inteligente, dimostrando che el dialeto no xe na lingua de poareti o de inseminìi, ma de tanti, se non de tuti

Disegno del maestro Bruno Morato par i Vint'ani insieme.

Qualche criticon (o invidioso?) ga dito che Quatro Ciàcoe la pende da na parte, che la pende da st'altra, che la ghe someja al tale o al tal'altro giornale. Epure pochi giornài come questo ga fato cussì tanto par la cultura, la storia, la lingua, l'identità, la creatività, le tradission, el bon nome de la gente vèneta, senpre con serietà, con bon gusto, con un fondo de moralità e de rispeto, tendente a stimolare el diàlogo e la créssita civile. Cussì, mese dopo mese, par tuto sto tenpo, Quatro Ciàcoe xe 'ndà vanti par la so strada, magari canbiando el passo, magari corendo el ris-cio de no èssare capìa o de èssare vardà come espression maniacale de on cativo gusto, come se el dialeto el fusse roba da zapatera, da schincapene, da gente retrògrada.
Dovemo amétare che no 'l xe on giornale che se lèze tuto d'on colpo: xe tanti i dialeti doparà da chi ghe scrive; xe difarenti i modi de esprìmarse... magari conpreso quelo de voler far passare par dialeto un artìcolo scrito in... italian dialetizà; sarìa massa pìcolo el corpo del caràtare de stanpa; se pol dire che nel so totale el giornale sarìa on pocheto sul "serioso". Però, amesso che se pol senpre miliorare (e anca pegiorare), se no 'l fusse cussì, se no 'l fusse stà atento a le parole scrite che le ga senpre un peso difarente da quele dite, se el fusse stà pi de mànega larga, con on poche de barzelete grasse, con qualche fàcile bla-bla, qualche stupidada, qualche storiela picantina, col riporto de qualche scandaleto... forse el gavarìa fato pi strada, ma no 'l sarìa pi stà Quatro Ciàcoe, parché Q.C. sa de avere rinuncià a tuto quelo che, a prima vista, serve par sfondare!
Invesse, co l'orgolio de i poareti e el corajo de i onesti, semo rivà fin qua, con un pùblico àvido de dialeto, bramoso de conóssare el nostro passato pi recente, curioso de inparare parole e modi de dire in disuso, interessà a riapropiarse de zerti modi de vita sènplice de quando no se se vergognava de parlare in dialeto e la parola dita la gavéa el stesso valore de quela scrita.
Eco parché ne le pàgine de la rivista ghe cata posto la memoria, la ricerca, le tradission, i ricordi personali, l'approfondimento etimologico de alcune parole, la racolta de le parole drio man cavà fora da i artìcoli del mese. Ma ghe xe spazio anca par la curiosità del presente, par el teatro e el cìnema, la mùsica e l'arte, la leteratura e la poesìa, la notissia de la mostra, l'incontro col personagio del mese, l'apuntamento col zogo de parole o col cruciverba... e la ricerca stòrico-fotogràfica de uno de i tanti nostri paesi del Vèneto.
E de tuto questo dovemo èssare grati a: i nostri colaboratori che alimenta la rivista co i so scriti; i inserzionisti che ghe dà ossigeno con la publicità; i Enti Pùblici che sostien in qualche modo l'iniziativa; valtri abonati e letori che si i destinatari de sta "scomessa vincente"! Anzi, vardè che contemo su valtri: se tra vint'ani saremo ancora qua, sarà soratuto mèrito vostro!

Auguri de Bon Nadale a chi sta ben, a chi sta male, a chi festeja sto Ventenale... da Quatro Ciàcoe e l'EDITORIALE.

[torna sopra]