|
Da Belun
An pež special
Era diženbre del '45 e se avižinéa la festa pí bela de l'an, ma a sete ani e medo no me rendée cont ancora de l'atmosfera particolar del periodo, se no da le robe che se féa a casa... L'era finì la guera da no tant e l'era tenp magri, e i me ricordi ligadi a questo ades i salta fora par n'altra olta!
Me papà che al laoréa a l'Uficio Tècnico del Comun l'avea avest, come tuti i altri dipendenti, pare de fameia anca lori, an paco natalizio in dono: cussì i uséa far alora. Lu al avéa cargà al scatolon che i ghe avéa donà te 'l manubrio de la bicicleta e l'era rivà a casa tut content. Imainarse noialtri tosat! La curiosità e l'emožion de trovarghe drento calcossa de... bon, l'era grande asèi!
Par le feste se scaldéa anca la stua cadorina te 'l tinelo, stanza vesina a la cusina, e quela olta se era andadi tuti là atorno a la tola: mi che passée su sol che co la testa! Da sto scatolon l'è gnest fora robe par mi straordinarie: an paneton che no avée mai sajà, e anca se, a casa, me mama la ghen fea de dolci, a 'l me avéa parest na roba ecezional; po' na butilia de spumante, che no me avéa interessà; na steca de mandorlato; na cassetina de mostarda e an bel sachet de ... cicolatin. I era tanti e me mama la ne n'a dat un paròn. Te quel momento al me palato l'à gustà par la prima olta la cicolata e ricorde che me avéa parest la roba pi deliziosa del mondo. Ancora des ò passion par sto dolce. Sùbito i me fradèi i à dit: "Questi i va ben picadi te l'albero de Nadal. Ancó ne cognarà ligarli par ben co 'l fil da cùser." Roba che avon fat al dopodisnar. Sti cicolatin, co la stagnola lusente de tanti colori, i me féa voja, ma i me avéa racomandà de no tocarli: l'era da far l'àlbero.
Al presepio me 'l ricordée, ma quel no savée come che i me fradèi i l'avarìe fat: no ghe n'avée mai vist un.
I avéa deciso de alestirlo te'l tinelo, ma manchéa la pianta. Lori do i savéa che in fondo a la gran dissesa del nostro teren, a nord, l'era al žieson co tante piante de cassia, ma là in tra medo, era cressest an pežet par so cont e l'avéa l'alteža iusta par i nostri progeti. I l'à segà pi bas possìbile e i l'à mes te l'entrada al fresc. Dopo i à parecià an vaso grant da fior co de i toc de lenc fracadi drento e i ghe a infilà al tronco e i lo à portà te 'l tinelo. Na olta là l'era da adobarlo e i avéa procurà la filantina argentada e vari nìnoli e balote che sluseghéa: anca queste no podée tocarle parché l'era fràgili e delicate. Al pež 'l avéa i ran pi bassi giradi in sù (e ò inparà da granda che quel no l'era an pež, ma an abete) e era stat necessario equilibrarli in modo che al paresse an cono regolar. Na olta sistemà al tut, i à scominžià a picar qualche mandarin par tegner dreti i ran pi bassi, po le robe meno bele che no ocoréa méter in vista, ma che le servìa par inpenirlo. Intant la sera me papà l'avéa parecià an pochi de nìnoli co 'l cartonžin; ricorde benìssimo de i fanài, "a tutto tondo", pituradi a aquerelo, diversi l'un da l'altro, che paréa i avesse drento la candela inpižada, e la stela cometa in rilievo, parché no se avéa la ponta. Insieme a sti nìnoli avon picà i cicolatin, qualche caramela, al mandorlato e par conpletar al tut al fil argentà e le candelete rosa e celesti co 'l so portacandele. Al me paréa special par come che al sluseghéa, fursi, quel che l'avea vist "La piccola fiammiferaria" de la fiaba, l'era cussì!
La sera de la vigilia de Nadal l'era de gran atesa: se sarìe andadi (par mi era la prima olta), a la Messa de medanot da i frati co i nostri vicini de casa. L'era fret, ma no 'l sentìe: al me pensier l'era a quel che avarìe vist al nostro ritorno a casa. Tornadi da la Messa, avon illuminà prima al presepio, po' sen passadi in tinelo e i me fradèi i à inpižà tute le candeline.
Mi ò fat: "Ooooh! l'è propio bel!" E dopo ò sajà al secondo cicolatin de la me vita! Se pense a l'abondanža de ancó!!
Durante le feste no sen andadi tante olte te 'l tinelo, no se scaldéa tuti i dì e mi me deližiée sol che co 'l presepio, parché ghe passée davanti; ma an dì son andada a cior calcossa là drento par me mama e naturalmente ò vardà l'àlbero e, de paca, no 'l me paréa pì tant bel: dapartut pichéa dó fil senza gnent atacà, e alora ò vardà de i cicolatin: no ghe n'era pi e ò capì, te quel àtimo, parché no dovée tocarli: li avéa magnadi tuti i me fradèi.
Giràndoghe atorno ghe n'ò catà ancora un da drio, solitario!, l'ò stacà e cussì ò podest magnar al... teržo cicolatin de la me vita!! E te sto caso no me à rimordest la cossienža!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Dissenbre:
Editoriale
Vint'ani de dialeto e altro
In dissenbre 1983 el primo nùmaro de la rivista: in copertina on s-ciapo de òmani drio far quatro ciàcoe. Na inpresa ris-ciosa che se ga rivelà inteligente, dimostrando che el dialeto no xe na lingua de poareti o de inseminìi, ma de tanti, se non de tuti
de Mario Klein
Salute
El mèdego condoto
de Mario Galdiolo
Da Belun
An pež special
de Biancamaria De Vecchi
Robe de Ciósa
El Nadale a Ciósa 'na volta...
a cura de Angelo Padoan
|
