|
Salute
El mèdego condoto
 |
| Mèdego de canpagna a cavalo, nel dì de festa, ciamà par na vìsita. |
Se se va in discorso de mèdeghi condoti, a seconda de l'età e de le 'speriense che se ga vudo, la mente va a on vecio o zóvane senpre ben messo, par de sòlito con la barba, inpegnà in anbulatorio a visitare e a scrivere rèspissi. Opure se lo imaginemo a seconda de le èpoche e de i posti, montà a cavalo, dessora a on mulo, so la barossina o in bicicleta so 'na "gusseti" o co' na "topolino", ecc., pronto a córare de note e de dì, caldo, fredo, vento, piova, par strade de sassi, caresà infangàe, trosi desfalsài da caruare o su e zo par sentieri e mulatiere, ciamà da qualcun che ga bisogno de socorso. Par sècoli el condoto xe senpre 'ndà vanti cussì. Sì. Proprio par secoli! Parché la figura del mèdego condoto la xe vecia de squasi domìe ani.
La storia de 'sti benemèriti professionisti la incominsia torno a na sentenara de ani dopo Cristo, quando Antonino Pio, inperatore roman dal 138 al 161 d.C., ga vossudo che insieme ai Archiatres Plebis, mèdeghi che curava i siorati e i nòbili, oncora da i tenpi de Augusto, ghe ne fusse de i altri, i Archiatres Populares che stasesse drio e curasse i poareti. Ma parcossa se ciàmelo mèdego condoto? "Conductus" voleva dire "tirarselo a sé", "tòrselo a servissio" co 'na promessa de soldi o vantagi. Col passar de i ani, fra alti e bassi, i condoti ga ciapà piè. Nel Medioevo i comuni che podeva permétarselo, soratuto i pi grandi, ga cumissià 'verlo. A Padova el primo mèdego condoto xe stà on serto Antonio da Roma, nominà el 25 giugno del 1523. Pur essendo presenti in tante parte, no i xe stà mai boni de inraisarse ben so 'l teritorio; par dare on idea, nel 1858, qualche ano prima de l'Unità d'Italia, ne l'antico stato sardo che ciapava Piemonte, Liguria, Savoia, Nizza e Sardegna, circa domile comuni, no i lo gaveva. Le robe xe canbià co l'Italia Unita. 'Na lege del 20 marzo 1865, ga stabilìo che in te' i comuni doveva èssarghe on mèdego condoto par dar assistensa gratis ai pi poareti.
Nove ani dopo la lege, a Forlì, in coincidensa co l'inaugurassion de un monumento a G.B. Morgagni, xe stà fato el primo Congresso Nassionale de categorìa. Ormai el mèdego gaveva comissià a stabilizarse on poco dapartuto, e a man man che passava i ani, legi nove strassava le vece o le ritocava, inquadrando senpre mèjo la categorìa. Nel 1888 na lege obligava el mèdego de stare de casa ne la zona dove esercitava; n'altra del 1904 diseva che 'l mèdego gaveva da ciapare posto traverso concorso pùblico.
Nel 1923, n'altra lege meteva che 'l mèdego doveva èssare senpre a disposission (reperibilità) dì e note, el gaveva da fare le vacinassion, ecc. Nel 1934 tute le legi fate ani indrìo xe vegnù muciàe so una, la quale meteva che ne i comuni co manco de trentamila abitanti e in altri che no se podeva fare difarente, el mèdego gaveva da fare servissio de vigilansa igenico-sanitaria e scolastica, preocuparse de la prevension de tute le malatìe in generale e de le specialità reni, vessiga, vacinassion, malformassion e carie de denti, el gaveva da rilassiare certificati sanitari e fare anbulatorio ostètrico.
Par el poro mèdego solo oblighi e oblighi. Insoma sto omo, doveva èssare on stropa busi e on capelo bon par tante piove, sensa 'vere o squasi nessuna considerassion da l'alto; e pensare che se le Mutue e i Istituti I.N.A.M., E.N.P.A.S., I.N.A.D.E.L. ecc., ga possudo vegnere sù e funsionare puìto subito, el merito grando 'ndava a la professionalità e a l'esperiensa de i condoti che gaveva co 'l tenpo ben semenà. Tut'altra considerassion del mèdego la gaveva la povera zente; no podeva èssare diversamente in quanto el mèdego in paese el conosseva praticamente tuti, el saveva de tuti vita, morte e miràcoli. Có a 'na dona incinta se presentava on parto difìssile, có 'n putin gaveva problemi, có se malava o moriva on vecioto, có sucedeva 'na desgrassia, el mèdego gera senpre presente. De le volte anca par barufe e discordie in fameja, co l'intento de pacificare, el sae intrometeva insieme al prete. Insoma, senpre pronto e disponibile e dopotuto anca poco pagà! Có 'l 'ndaseva visitare fora de la so mansion so case miserévoli, dove de abondante ghe gera solo la fame, anca lu no gaveva el corajo de domandare, però la zente pur ne la miseria, se i copava el mas-cio, la brasola o el salado i jera pa 'l dotore; có i machinava el fromento, o al tenpo de la ua e del vin novo, del mèdego no se desmetegava nessun.
Dopo la guera le robe xe canbià. Prima in sità e dopo in canpagna, el mèdego condoto ga cumissià pèrdere el so carisma; el potensiamento de la modernisassion de i ospedali, l'istitussion del Ministero de la Sanità ai primi de marso 1958, la creassion de le region a statuto ordinario e speciale e le proposte ne i ani Setanta de riforma sanitaria ga portà nel 1978 a l'istitussion del servissio sanitario nassionale.
Ne i ati de la riforma se parla de organisassion del teritorio, Unità Sanitaria Locale, distreti sanitari de base, ma del mèdego condoto gnanca 'na riga! Praticamente in desméntega, el 23 dicenbre 1978 la figura del mèdego condoto more. A quel tenpo a Padova ghe gera dódese mèdeghi condoti e centoquaranta in tuta la provincia. La Region Veneto, el 1° otobre 1980 ga abolìo la qualifica legale de "medico condoto". 'Desso ghe xe mèdeghi de base, guardia mèdica, 118, Pronto Intervento, ecc.: mèjo o pèso no lo so, parché xe tuto roersà! Pecà che na figura cussì storica e gloriosa sia finìa a sto modo. Pecà proprio, parché ne l'arco de i sècoli, guere, aluvion, teremoti, tanti xe stà i mèdeghi che ghe ga lassà la vita nel 'ndar giutar la zente in tanti tristi momenti. Speremo che Q.C. co sto pìcolo contributo a sta grande figura, riessa a smòvare qualche aministrassion pùblica a dedicarghe on monumento.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Dissenbre:
Editoriale
Vint'ani de dialeto e altro
In dissenbre 1983 el primo nùmaro de la rivista: in copertina on s-ciapo de òmani drio far quatro ciàcoe. Na inpresa ris-ciosa che se ga rivelà inteligente, dimostrando che el dialeto no xe na lingua de poareti o de inseminìi, ma de tanti, se non de tuti
de Mario Klein
Salute
El mèdego condoto
de Mario Galdiolo
Da Belun
An pež special
de Biancamaria De Vecchi
Robe de Ciósa
El Nadale a Ciósa 'na volta...
a cura de Angelo Padoan
|
