|
Da Thiene (VI)
Bonprinsipio
Altri tenpi, altri costumi... sodisfassion ch'el mondo moderno ne ga portà via
 |
| Corendo felissi incontro a l'ano novo (foto Bruno Dalle Carbonare) |
"Al primo che domamatina vignarà a farme i aguri ghe darò na bela roba." Cossì diseva me mama la sera de l'ùltimo de l'ano e, co l'idea fissa de rivare prima de me fradèi, 'ndavo in leto sforsàndome de star svejà. Passà la mesanote andavo pian pianelo su par la scala de legno, sercando de no farla sgrensare, ne 'a càmara de me popà e me mama a farghe i aguri. Dopo l'abrasso me infilavo al caldo del leto grando.
La bela roba gera i mandarini, i dàtari e i bagigi che scaolàvimo soto i nissuli. Ma dopo se nava fora volentiera al fredo par andare da i noni. Le stele, quele più grosse, le parenti de 'a Boara, tremava in quel momento màgico che i contadini conosse ben, parché da na vita i se alsava a mónsare e governare le bestie a quel'ora. Gèrimo ancora nel clima "mistico" del Nadale. Qualche lanpadina s-ciarava cantoni de contrà, fasendo el presepio. Quante volte se ghemo ispirà a 'e robe che ne circondava e che ne gera familiari par costruirlo anca naltri: la fontana, la possa de aqua piovana co le oche, la cesa de scàtola col canpanile de covercio...
"Aguri de bonprinsipio, nona!" La tirava fora da 'e vìssare el fassoeto e, da un gropo stretìssimo che forsava jutàndose co i dente, la toeva na "moneta" calda e me faseva la mancia. Deventà grande, go visto i maghi far vigner fora dal fassoeto colonbe e coniji, ma l'incanto e la magìa de quei sento franchi i go persi par senpre. Me nono se sentava su la sponda del leto, se ligava le cordele de le mudande lunghe, zo vissin le caéce, infilava le braghe, lì pronte dove el le ghea fate cascare la sera, el me dava un baso e dopo el sercava le siarese soto graspa che tigneva ne l'armaro de 'a biancarìa come medesina e tocasana el m'in dava un bicerin: "Bivi ché romài ti si omo!" el diseva. Me nona intanto scomissiava a lamentarse pa i dolori: strenséa fra le man el zenocio, a l'aparensa san, e ciamava co vosse... gemente e piangente: "Sant-tan-tonio da Padova che me juta mi, Beata Vergine de Caravajo, feme morire!"
Fra tosi se formava un grupeto e fasìvimo el giro de i parenti. Ne le fameje dove no ghe gera parentele, se inventàvimo co la parola "sàntolo". "Bonprinsìpio, sàntolo Menego!" La felissità che pare iragiungìbile ghe someja tanto a l'emossion de quele matine, quando gavevo su par zo diese ani.
L'inverno pena scomissià se faseva sentire. El fredo "penetrava" pa i crepi de le man fin le ponte de i pie, quasi congelà. Ai bordi de le rece se "appollaiava" la dolorosa bugansa che fa più male có la va via, lassando su la recia pìcole ùssare sanguinanti. Malgrado el gelo se 'ndava co entusiasmo de casa in casa: "Bonprinsìpio de l'ano: ca stè sani tuto l'ano, co la vostra fameja."
La cantilena frutava ben. I ne ofriva fruti che in sta stajon gera par lo più fruta seca. A naltri più pìcoli i ne dava bicerini de crema marsala o vermute: ai più grandi, invesse, un bicerin de graspa fata in casa. A l'alba, quei che no gaveva ancora gomità gera tristi 'fà peoci; i altri, quei che gaveva za suparà la crisi, riaquistava via via i so colori col dilagare de l'aurora che ronpeva da 'e parte de l'Oriente. Tuti ne acolieva volentiera el primo de l'ano. Porta fortuna che el
primo a fare i aguri de Bon Ano sia un "maschio".
Da "Ricordi da bocia" de Claudio Cappozzo (rajoto del Graspo)
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Genaro:
Editoriale
La pace
sia con te
El mèjo augurio che se se possa fare a Capodano, co la speranza che 'l dura tuto l'ano. On augurio serio e inpegnativo...
de Mario Klein
Premio del Ventenale
Quatro Ciàcoe premia la poesìa e la prosa
No 'l podéa avere mèjo conclusion l'ano de festegiamenti pa i 20 ani de vita de la Rivista, verto l'8 dissenbre 2002 e sarà el 6 dissenbre 2003 con la cerimonia de Premiassion del Concorso de poesìa e prosa, sostegnù da Regione Vèneto, Comune e Provincia de Padova.
de Mario Klein
Premio del Ventenale
Concorso di poesia e prosa in dialetto veneto "QUATRO CIÀCOE"
Edizione del Ventennale VERBALE DI GIURIA - RISULTATI
La Segreteria del Concorso
Da Thiene (VI)
Bonprinsipio
Altri tenpi, altri costumi... sodisfassion ch'el mondo moderno ne ga portà via
de Bepin Daecarbonare
|
