|
Da i Coli Euganei
La strigheta
 |
| Drento el me camin jera passà la strigheta... |
Tante volte, in te l'arco de l'ano, se sentìa 'sto discorso: "Vardè de star boni e no fare conbàtare parché senò la strigheta, 'sto ano, no la ve porta gnente". Magari par poco ma co 'ste paròe la mama la riussìa a farne stare on poco pi fermi. Sì, parché alora la Befana, par noantri pìcoi, la se ciamava proprio cussì: strigheta. No savarìa dire come che me la mostrava i oci de 'a me fantasìa ma me ricordo però de averghe volesto tanto ben anca dopo aver conossù chi che la gera, tanto che la mama ga continuà a darme on muceto de schei, in te chel dì, fin che ormai gera grande e co 'l me bel lavoro.
"Mama, no go bisogno, grassie" mi ghe diseva, ma ogni ano me sentìa i oci ùmidi quando che la mama me metéa tra le man na bustina piegà in quatro, co la mancia e sora la scrita: "Da la to strigheta".
Una de chele bustine la conservo ancora e la tegno cara pi de na colana de oro. Come go za dito, de 'sta nostra strigheta se sentìa parlare tuto el tenpo de l'ano. Ogni volta difati che uno de i tri (e qualche volta tuti tri i fradèi insieme) se faseva na qualche marachèa: "Te vedarè che st'ano no passa pi la strigheta" se sentìvimo dire "... e se la vien, la te portarà solo carbuni e ajo!" Mama mia, che mae che ne faseva 'ste paròe! Ma sùbito dopo, se 'ndaseva a darghe na ocià su par la capa infumegà del grande camin, sperando che no la gavesse sentìo, o quasi par domandarghe scusa.
El dì prima de l'arivo de 'sta strigheta se cumissiava a 'ndarghe torno al zio Gioanin che, essendo da sposare, el gavea pi passiensa da scoltarne. Có gera sera difati, lu ne insegnava a métarghe, lì in parte de 'a porta, na meza secia de aqua e on muceto de fen: "Questo" disea lu "serve par darghe da magnare al musseto de 'a veceta, in modo che la se ferma e la meta drento la calsa qualcossa de pi." Dopo, ghe gera la preocupassion de chi gavéa la calsa pi longa da tacare. De le volte saltava fora anca qualche lagremeta, parché chi gavea la calsa pi picenina, partìa in svantajo. Alora la mama calmava le robe andando a sercare na calsa in pristio dal pi grande. A la sera de 'a vigilia, se trovàvino tuti torno al fogolaro, silenziosi pi del sòlito parché la strigheta la vedesse che se gera boni e obedienti. A on serto punto, se sentìa el zio Gioanin, fora de 'a porta, che el brontolava co qualcun, ma a vose alta. 'Po' el rivava in casa baténdose le scarpe e scorlàndo la giacheta par libararse da la neve. El ne vardava ridendo e disendo: "La go mandà via, la xe scanpà!"
"Ma chi, zio?" se ghe domandava noantri. "La gera na veceta" rispondeva lu "la se ghea fermà lì col musseto, dedrìo de 'a casa e mi go dito, che qua no ghe xe tusiti e che la vaga via!"
A 'sto punto noantri se saltava sù da la carega sberegàndoghe al zio, che forse la gera la strigheta e che no 'l doveva pararla via. Qualcun de i tri se meteva anca a piànzare e vegneva fora na confusion incredìbie. Le zie brontolava col zio Gioanin che non doveva farne star mae, rassicuràndone che no gera vero e che el zio gavéa scherzà.
No gera fàssie farne tornare chieti, ma alora i ne mandava in leto tuti tri, co la scusa che a la matina se se dovéa alsare presto, par védare se gera passà sta famosa strigheta. Ognuno tacava, li 'torno a la capa del camin, la so calseta e 'po via in leto. De chel momento, me ricordo na voja grande drento al core, prima che 'l sòno me portasse via co lu: che la note fusse curta, che la finisse presto, par poder èssare davanti a la nostra calsa za piena... e chi sa mai de cossa?!
A la matina dopo, no faseva gnanca ora a finire la canpana de l'Ave Maria, che se gera za sviji. Na sfregolada in te i oci che i faséa fadiga a vèrzarse, e via, tuti tri de corsa, zo par la scala. La vose de 'a mama la ne seguìa disendo: "'Ndè pian, che petè zo par le scae e ve fè mae!" Ma se gera za là, davanti al camin. ècoe lì le calse, fate da la mama, de coton bianco, du driti e du roessi, in te i dì de bruto tenpo. Le gera piene fin insima. Ognuno se ciapava sù la sua e via in leto, dove se svodava sora la coverta el tuto, ma na roba a la volta. Eco le carobe, el pomo, i bagigi, on mandarin, le màndoe e se gavéa pressa de rivare in fondo, par tirar fora chea roba rotonda che ghe gera drento la ponta de 'a calsa. E finalmente ècola! La gera na naransa bea, tonda e inprofumà.
Drento la calsa, proprio so 'l calcagno, ghe gera restà ancora qualcossa che se tirava fora malcontenti: on tòco de carbon e na scarlogna, segno queo de le disobediense e de le birichinade fate durante l'ano. E so on tòco de carta del formajo la strigheta ne racomandava scrivendo, de star boni, senò naltro ano no la vegneva pi. Chi mai gera pi continti e confusionà de noantri in te chel momento? Dopo, rivava le domande: "Parché la strigheta, scriveva come la zia e sora la carta del nostro formajo?" Ne restava qualche dubio, ma par queo, la risposta sarìa rivà dopo qualche ano: el tenpo de 'ndare fora de 'a nostra "sgussa" par capire ben. E quando on toseto me ga dito, 'ndando a scola, che la Befana (ormai la se ciamava cussì) gera me mama, mi no voea crédarghe par nessun motivo. Capiva che gera vero ma par tanto tenpo go fato finta che no fusse vero. Me gera cascà on castèo de fantasìa, che me piaseva tanto e me gavéa trovà confusionà. E quasi ogni ano, vardo e rivardo, co i oci de 'a mente, chea bustina piegà in quatro co sora la scrita: "Questa xe par ti, da la to strigheta".
Tanti gavarà contà la storia de 'a so Befana de on tenpo. Anca mi go voesto dire la mia, pensando che, se "ogni omo xe on pìcolo mondo", come dise el grande de on tenpo, anca ogni storia vera, che gavemo vivesto, gavarà sens'altro on qualcossa de diverso. Magari la calsa, parché la nostra gera stà fata, du driti e du roessi, da la mama in te i dì de piova, meténdoghe tuto l'amore del mondo.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Genaro:
Editoriale
La pace
sia con te
El mèjo augurio che se se possa fare a Capodano, co la speranza che 'l dura tuto l'ano. On augurio serio e inpegnativo...
de Mario Klein
Premio del Ventenale
Quatro Ciàcoe premia la poesìa e la prosa
No 'l podéa avere mèjo conclusion l'ano de festegiamenti pa i 20 ani de vita de la Rivista, verto l'8 dissenbre 2002 e sarà el 6 dissenbre 2003 con la cerimonia de Premiassion del Concorso de poesìa e prosa, sostegnù da Regione Vèneto, Comune e Provincia de Padova.
de Mario Klein
Premio del Ventenale
Concorso di poesia e prosa in dialetto veneto "QUATRO CIÀCOE"
Edizione del Ventennale VERBALE DI GIURIA - RISULTATI
La Segreteria del Concorso
Da Thiene (VI)
Bonprinsipio
Altri tenpi, altri costumi... sodisfassion ch'el mondo moderno ne ga portà via
de Bepin Daecarbonare
|
