Premio del Ventenale

Quatro Ciàcoe premia la poesìa e la prosa
No 'l podéa avere mèjo conclusion l'ano de festegiamenti pa i 20 ani de vita de la Rivista, verto l'8 dissenbre 2002 e sarà el 6 dissenbre 2003 con la cerimonia de Premiassion del Concorso de poesìa e prosa, sostegnù da Regione Vèneto, Comune e Provincia de Padova.

Saludo del Presidente, Vittorio Ingegneri, con la Giurìa.

In te la Sala Rossini del Gran Cafè Pedrocchi, gentilmente messa a disposission da l'Aministrassion Comunale, davanti a un pùblico de le grande ocasion, se ga fato sù tel guìndolo de la premiassion la matassa de i sìngoli concorenti premiài ne le do sezion, poesìa e raconto curto, ciamà a raduno e tuti presenti manco do, assenti par indisposission.
La presensa fin da l'inissio de l'Assessore a la Cultura, prof. Giuliano Pisani, del Consigliere regionale dr. Iles Braghetto e la vìsita, dopo, da parte del Sìndaco, signora Giustina Mistrello Destro, ga dà uficialità a l'avenimento e ga ripagà i organizatori de i tanti sacrifici
incontrà par portare 'vanti un ideale de cultura, che, mese dopo mese, se ga concretizà su le pàgine de Quatro Ciàcoe.
A tegnere in piè la manifestazion, l'Editoriale Padova, col presidente rag. Vittorio Ingegneri e la Comission Esaminatrice del Concorso, formà da Arturo Baggio, Luigi Perini (Presidente de Giuria), Lidia Maggiolo, Milosc Voutcinitch e Mario Klein.
Par l'ocasion, ga fato da corona ai premiài, tuti i colaboratori de la Rivista, ciamài a racolta da tuto el Vèneto, nonché dal Friuli, pa 'l tradissionale incontro anuale. Consegnà a la storia, quela del volontariato culturale, par meso de telecàmare, fotografi e micròfoni senpre in funsion, uno dopo l'altro, xe vegnù tuti i premiài a dire la sua, a lèsare el proprio testo, a scoltare la nota tènica, a circostansiare ne i mìnimi particolari el "pezzo" mandà a concorso e a ricévare la targa personalisà, el volume d'arte, qualche pregévole medaja artìstica. I primi, secondi e terzi premi ga anca ricevù in dono un quadro diretamente da le man de i artisti, intervegnù personalmente, quasi per ribadire che l'arte va premià con l'arte.

Saludo del Sindaco de Padova, Giustina Mistrello Destro.

A propòsito de arte e de quadri, ne pare doveroso èssare più precisi. Per la poesìa, xe stà consegnà: al 1° premio "Lungo il Po di Pila" da l'artista veronese Franco Santi; al 2° premio la china "Nettuno ed Eolo - La forza della Natura" dal M° prof. Alberto Bolzonella; al 3° premio "Nevicata sui Colli Euganei" dal M° Antonio Bevilacqua. Per la prosa: al 1° premio "Natura morta con scodella" dal M° Oscar Nalin; al 2° premio l'incision "Padova 1999" da Bruno Marcante; al 3° premio "Emozioni floreali" dal M° Bruno Morato.
Durante la cerimonia xe stà dà comunicassion, da parte del presidente Ingegneri, che xe stà sospesa l'assegnassion de la Borsa de Studio, istituìa par ricordare el conpianto Francesco Dalla Pietra, per mancanza de adeguate tesi de laurea in règola col bando.
L'entusiasmo che ga animà l'incontro, la gioia de i vincitori, l'interesse par el dialeto, la cultura e le tradission vènete i xe stà i "ingredienti" de la festa che ga premià, soto tuti i aspeti, anca Quatro Ciàcoe", i so redatori e i so letori.

[torna sopra]