Editoriale

La pace
sia con te
El mèjo augurio che se se possa fare a Capodano, co la speranza che 'l dura tuto l'ano. On augurio serio e inpegnativo...

Speremo che ste man le riva a tocarse... (afresco de Michelangelo ne la "Cappella Sistina" - partic.)

Cossa se se pole augurare de mèjo de la pace, quando taca on ano novo, in sto tenpo che sarìa da catar da dire anca so 'l Padrenostro? Ano novo corisponde de sicuro a strada in salita e se sa che vegnere zo ogni santo iuta, ma nare sù la ghe vol tuta! Purtropo, un fasolo, par quanto che 'l boje, no 'l deventarà mai un biso; la pace par quanto la invochemo, no la sarà mai tale se no canbiemo el conceto inconpleto che ghemo so la pace. Ne la pi parte de i casi, tuti (o quasi) i ga na idea de la pace soltanto come el contrario de guera, quela fata co le armi, par intèndarse. L'idea la xe giusta ma inconpleta. E inconpleti xe i "comitati per la pace", i "istituti di ricerca e studio per la pace", le marce, le dimostrazion con mega-raduni, i girotondi, le bandiere a le finestre, le scrite su i muri, parfin l'ONU che inventa el "decennio (2001-2010) di pace e non-violenza per i bambini del mondo"...
Tuto belo, tuto iuta a far nàssare o a far créssare la cultura de la pace e de la non guera. Ma xe 'ncora poco. Xe 'ncora poco (anca se ùtile e inportante) atuare el progeto de partire da la scola, educando i putèi a la convivenza e a la pace. Xe poco parché anca tute le altre età de la vita ga da èssare inprontà a la pace e non solo quela de l'età scolàstica.
A scola ghe vien parlà de pace e dopo, a casa, par television o al cìnema, xe stà calcolà che on toso su i 17-18 ani el ga vudo modo de védare almanco diesemila omicidi! A scola ghe vien insegnà el rispeto, la non-violenza, e dopo a casa on putelo ghe toca sentire discussion pesanti, quando no le finisse con calcossa de pezo, tra so popà e so mama. In ciesa, a dotrina (?), in patronato vien parlà de moralità, de amore fraterno, de conportamento serio e dignitoso, inprontà ai princìpi cristiani, po' i vien casa... nissun che va Messa, musi duri e bareta fracà, mai na parola che riguarda l'ànima, la fede, i valori, la memoria, i diriti e i doveri verso i altri, el vero significato de la libertà che no vole dire fare tuto e senpre quelo che se vole...
La fameja, la società, la parochia, la strada, la tivù... le ga da deventare strumenti de pace, istituzion de pace individuale e coletiva ma
a tenpo pieno, senò xe inùtile (o quasi inùtile) parlare de educare a la pace fin da i primi ani de vita. La pace bisogna vardarla con oci fissi... nò con un ocio che varda le verze e st'altro i bròcoli!
No podemo dire de no avere vudo boni esenpi: basta partire da Cristo e, dopo de lu, figure come quele de S. Francesco, S. Antonio, la beata Madre Teresa de Calcutta ,che i ne ga via via ricordà che "mi posso èssare la pace", "mi posso far scopiare la pace".
Bisogna dire che el xe on inpegno grosso ma, se semo convinti che la pace la xe on problema da risòlvare, tachemo a canbiare anca solo el nostro raporto con chi ne sta vissin.
Moltiplicà par tuti, tuti podarà deventare protagonisti del processo de educazion a la pace.

E pace sia in tera, cielo e mare! Na piova de saludi, basi e struchi la possa tuto 'l mondo rinovare oncò, doman passando e senza truchi.

[torna sopra]