Botànica tradizional in triestin

Primavera in arrivo

Erba trinità (Hepatica nobilis).

In te l'ocasion de l'ano petrarchesco, me son fermado a Padova per vedèr cosa che i combina co le celebrazioni in onor del grande poeta: cusì go 'vu anca el tempo de visitar la fameja del pitor Bruno Morato, al quale ghe devo riconossenza per i insegnamenti su l'arte pitòrica che el me ga dado e la singora Carla me ga mostrado de le fotografìe de fiori prematuri, scatade su i Coli Euganei, precisamente a Galzignano, da do su amissi meranesi amanti de botànica. E alora eco el "Galanthus nivalis" (bucaneve) de la fameja de le "Amaryllidacee" (de la classe "monocotiledoni), che ne ricorda le ninfe de la poesìa bucòlica; eco l' "Hepatica nobilis" (erba trinità, per la foja tripartita) - hepar = lat. fegato, se credeva che la curassi le su malatie - de la fameja de le "Ranuncolacee" e de la stessa el "Helleborus niger" (o rosa de Nadal) e per finir eco el "Eritronium canis" de la fameja de le "Liliacee".
El bel xe che in te la létera de trasmission da Merano, in un italian un poco condizionado da l'ortografìa tedesca, i nomi de i fiori in latin i xe scriti perfetamente. Dirìa che questo xe mèrito del cèlebre botànico Linnèo che ga procedudo a la classificazion prima de le piante, po' de i animài e anca de i minerali.
Carl von Linné (Rashult 1707 - Upsàla 1778) in latin Linnaeus (el re de Svezia el ghe ga dado la patente de nobiltà in t'el 1761) el jera fio del pastor de la parochia de Rashult, in te la region svedese de Smaland, ch'el se ciamava de cognome Ingemarsson, ma per amor de le piante el ga podudo cambiar el su cognome in Linné (in svedese lind = tiglio). Anca Carlo jera apassionado de botànica e, có el se ga iscrito a l'università de Upsàla, questa lo ga mandàdo in Lapponia a "erborizzare" e su sto argomento el ga fato do publicazioni. Ma ghe piaseva anca la medicina e alora el se ga trasferido in 'na università olandese, perché in Svezia in quel tempo no la ghe jera e là no solo el xe diventado mèdico, ma el ga anca sposado la fia del su professor. Nel 1735 el ga publicado a Leida in dòdise pàgine "in folio" el "Systema naturae"; l'ano dopo el pùblica el "Fundamenta Botanica" e cusì el xe pronto per la sistemazion de i tre regni de la natura. Linnèo parti da la botànica e più propriamente da le noze de le piante: da el studio de i "stami e dei pistilli" (òrgano maschile del fiore che contien el pòline e òrgano feminile che contien l'ovario) el riva a la classificazion del "sistema sessuale": el dividi el regno vegetal in 24 classi basade su i caràteri che i salta a l'ocio có te vardi el fior; el dividi ancora le classi in "ordini" e questi in "generi" comuni a tute le "specie" che le xe "l'unità fondamentale". Anca se el nùmaro de le classi xe sta' cambiado da i botànici vignudi dopo, xe restada ancora ogi la classificazion "binomia" de Linnèo de "genere" e "specie", che ga fato progredir el studio de la botànica: el primo tèrmine, squasi sempre un "sostantivo" genèrico, comune a un certo nùmaro de "specie", che le xe definide da un "aggettivo".

El bucaneve (Galanthus nivalis). (foto Rudi Zagler)

La pubblicazion in t'el 1751 de "Philosophia botanica" e i studi de i ani dopo i xe stadi la conferma de sto mètodo classificatorio che Linnèo ga aplicado anca al regno animale, co meno risultati. Ma in Linnèo no se trova la distinzion fra "Monocotiledoni" (embrione a una sola foja da la quale el ciol el nutrimento) e "Dicotiledoni" (embrione a do foje) e nissuna separazion fra "Angiosperme" (ovuli e pollini serai dentro pistilli e stami) e "Gimnosperme" (ovuli e semi nudi). E dato che per lui 'na pìcola modificazion no devi èsser ciolta in considerazion, no el xe rivado al conceto de "famiglia", la quale comprendi l'insieme de i gèneri co caratteri comuni (al più conossudo o più antico gènere se ghe zonto el "suffisso"-acee, o latinamente aceae. El fato xe che no'l xe stado del tuto apagado da el su sistema basado su la "sessualità delle piante" e po dopo la su ricerca se ga alargado su l'ambiente , diventando un "pioniere nel campo dell'ecologia", mantenendo però sempre el conceto de la natura secondo la tradizion cristiana.

[torna sopra]