|
Le storie de Nando
El spaventapàsseri de Rosara
 |
| ... e dopo do dì, on bel spaventapàsseri faséa bela mostra, tacà l'oratorio... |
Rosara, frassion de Codevigo, scoasi abrassà dal fiume Brenta, che par ani el se ga conportà da carognon par via de racoante inondassion, co relative magagne, miseria e luti dolorosi, da ani, el se gaveva dotà de nove vie, de case colòniche abità da zente vegnù da foravìa, de on pìcolo patronato par i tosi e tose, de on simitero, dato che coelo vecio el xera stà sventrà da la inondassion del 1905.
Anca la cesa la xera stà rifata, e nel 1930, a pàroco, ghe xera don Cassano, on prete bon e che sentiva drento le soferense de i paesani.
Le fameje, le xera on s-ciapo, ma fioi ghe ne vegniva zo a graspi, tendùi da i veci, parché le mame xera oro par jutare i so òmani in te i canpi.
Essendo el paese racoanti metri soto i àrzari, ogni volta che se meteva piòvare, la zente se muciava ne la fatorìa de Violin (ani indrìo de proprietà de on pàroco fin dal 1830) e coà, el pi ansian del paese, co a fianco el pàroco, scoltava tuti i pari de fameja e dopo, insieme, i ciapava le decision so come tanponare i àrzari, no sensa prima avertire i adeti de stansa al munissipio de Piove de Saco.
Ghe xera cussì de i volenterosi so i do àrzari, che stassionava note e dì, tegnendo soto misura el fiume.
Có Dio faséa smétare la piova, tuti i tirava sospiri de solievo, e no mancava la sòlita procession de ringrassiamento, fin a le porte de Codevigo. Dopo, rivava anca primavera e dopo 'ncora, l'istà, e za se vedéa do grupi de tosi e tose: uno, votà a darghe na man ai genitori ne i canpi; l'altro, indafarà a zogare (data la età) e la indiferensa verso la scola, a coei tenpi ciamà on perditenpo da le fameje stesse.
I do grupeti de tose e tosi, come la fosse na guera vera, i gaveva tanto de comandante, e tuti i lo scoltava e so i canpi na s-cianta fora el paese i se catava, co tanto de dichiarassion de guera, par via de no avere rispetà i confini, de fare racoanti progionieri, de versare on tributo chi de lori perdeva.
El confin xera stà aprovà da i do grupi, vissin a on oratorio abandonà, e tacà a on fosso: i capi de i do grupi, gaveva sentensià de acordo che chi vinseva la gara de corsa, da Codevigo a Rosara (tacà la cesa) se ciapava la feta pi favorévole, e cussì xe stà.
Donato, gaveva messo nome al so grupo "Pache so i denti" e Marieto, al suo, "Leoni sensa paura".
La gara xe stà vinta da Donato e da coel dì, nissuno del grupo "Leoni sensa paura" podeva pi traversare el fosso, pena la guera e relative punission.
Le tose, xera stà a vardare ste manovre, al màssimo seliendo da che parte stare; cussì Malvina la xe stà co Marieto, faséndoghe capire a Donato che 'l ghe xera odioso fin so i oci.
Sti do grupi, gnanca a farla aposta, i sercava la guera, visto che pi spesso no i rispetava el confin, co scontri a cògoli, sope de tera e parolasse da veri pirati, no mancando momenti de paura coando uno de lori, se ciapava on cògolo so i denti, e cussì l'andava a casa tra làgreme e sangue.
A so volta i genitori, barufava tra lori, parché i fioli 'ndava senpre difesi, ma dopo on zorno, tuto tornava a la normalità.
Le tose, spece coele che i do capi gavéa sentensià "so protete" no le xera de manco a butarse ne la lota, e se par caso le se brincava, le se tironava i cavéi, co tanto de sgrafoni e parolasse, che solo Dio podeva savere dove le gaveva inparà.
Cussì, on zorno, la Malvina, ghe ga dito (durante la lota) a la Gervasia: "Tiente in bon, par coel somaro cancro de Donato!"
E tra na s-ciafa e on tirare i cavéi, la Gervasia, la ga capìo che la so amiga-nemica, la xera cota del so capo...
A la fine, no ga vinto nissuna, ma le se ga lassà co tanto de spuaci e parolasse: "Me farò - ga dito la Gervasia - on tapetin par i me fétoni, co i to cavéi!" Ga risposto la Malvina: "Có te gavarè bisogno de na inpalcadura par i denti, te sè dove che stago!"
Có Donato ga savudo che la Malvina lo pensava, dopo racoante bataje, sbreghi de camise e braghe, sberle da i genitori e minace de méterli a laorare i canpi, el ga indeto na tregua co tanto de riunion co tuti, e che xera ora de fare la pase.
Tacà el fosso, tuti ga dito la sua, a la fine, xe stà aprovà che xera mèjo fare on grupo ùnico, recepìo a fare calcossa de bon, darghe na man a vècioti soli, tegnire netà el patronato, netare le tonbe de chi no gaveva nissuno, e... stare pi boni.
Par rendare pi stabile sta pase, la Malvina ga dito: "Parché no femo on spaventapàsseri, tuto nostro?" Dito e fato, el grupo ga butà par aria i cassoni de la nona in cantine e sofite, par trovare veci vestiti, siarpe, guanti e altro e dopo do dì, on bel spaventapàsseri faséa bela mostra, tacà l'oratorio: 'desso el xera lu la vedeta, zorno e note, so 'l confin.
Marieto, Paola, Donato e la Malvina, de acordo, ghe ga messo nome "Rosario" a significare che el xera de tuto el paese.
El grupo, tanto el ga fato, tanto el ga pregà, che don Cassano, xe stà costreto a benedire el spaventapàsseri Rosario, co tuti i tosi e tose, inzenociai intorno, e la promessa de Donato a la Malvina de molàrghela co i zoghi e de pensare a muciare le piere par on so sogno d'amore.
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Marso:
Editoriale
Senza fiòi no esiste futuro
Semo al tradizionale apuntamento con la mimosa. Ancora no xe ciaro se la società ghe crede ai diriti, a la dignità e al ruolo de la dona. E la maternità va in crisi!
de Mario Klein
|
