Da la Bassa Veronese

L'è na buteleta el novo mini-sìndaco

L'intervento del novo sìndaco de i butèi, Anna Peroni, el ghe dà za da pensare a l'assessor Giorgio Malaspina.

Cossa ghè de pi vàlido al giorno de ancó come l'idea de valorizare i nostri fiói che se vèrze a la vita? Come stimolar la so mente? Come insegnarghe la strada de la responsabilità e a coltivar propositi boni e generosi, in te na società come la nostra che tende scancelar tuti i valori? Eco alora che, pian pian, se instrada sta bona idea: fare che i butèi i gabia on so governo. Cussì, San Piero de Morubio l'è deventà na pìcola "Città dei ragazzi". Sta bela iniziativa l'è nata l'ano passà, sostegnùa da i stessi buteleti, da i insegnanti e da l'Aministrazion Comunale.
A San Pietro di Morubio, staolta, de turno, è stà eleto on sìndaco co le còtole: na bela buteleta, Anna Peroni, che la provien da la lista Navigatori nel mondo dei ragazzi, e la ghe dà el canbio al vecio sindaco de terza media, Andrea Giavoni, restà in càrica par un ano.
I novi consilieri che è stà eleti iè: par la magioranza, Edoardo Cegan e Riccardo Guerra de quinta elementare, Alex Bersani, Matteo Malaspina, Andrea Bonamini e Marco Fanini, tuti de le scole medie; par la minoranza è entrà Daniela Campolongo, de la lista L'unione fa la forza. I cònpiti che ghe speta ai assessori iè stè distribuìi in sto modo qua: el vice sìndaco Alberto Modenese el se ocuparà de sport e tenpo lìbaro, Alessio Bersani de biblioteca e cultura, Alex Bersani de anbiente, storia e tradizion, Maria Vittoria Castellani de solidarietà e pace e Matteo Malaspina de vita cìvica, viabilità e educazion stradale.
La prima riunion del 2004 l'è stà fata in te on clima de piena democrazia. I buteleti i à capìo che bisogna far sul serio, soratuto inparar par saver 'sa far.

Foto ricordo de l'insediamento del sìndaco co i so direti colaboratori, consilieri e assessori. (foto L. Bronzato)

Tra le autorità presenti, ghera el sìndaco (quelo de le grosse responsabilità, par intèndarse) de San Piero, l'ing. Gastone Vinerbini, l'assessor a la cultura, rag. Giorgio Malaspina, el prèside de le medie, prof. Tiziano Albrigi, l'insegnante de sto progeto, prof. Linda Bendin, la bibliotecaria dot.sa Laura Bronzato, el Presidente de la Pro Loco p.i. Eligio Guerra, oltre a tanta altra gente. Po' el novo "sìndaco de i butèi" l'à leto i programi e i vari inpegni ciapè in considerazion: far funzionar la pista par le biciclete tra San Piero e la frazion de Bonavicina, controlar la pulizia de i àrgini, de i fossi e quei de i bordi de le strade piassè pericolosi, demodoché se ghe possa laorar adrìo almanco tre oltre a l'ano.
Par quanto riguarda el sport, i domanda che tute le zone destinè a verde par el zugo le vègna recintè, par question de sicureza de i piassè pìcoli. Par quanto riguarda la biblioteca inveze i è stè tuti d'acordo de atuar el progeto "un libro al mese", cussì da stimolar la letura fin da le scole elementari.
Co l'ocasion è stà portà a conossenza de l'assenblèa che, par Nadal, è stà vendùi de i laoreti fati a man - ricami, uncineti, vaseti piturè e robe de legno - con un ricavo de 200 euro che iè stè consegnè a la parochia de Cerea, par le mission in Brasile.
Par l'istà che vien 'vanti, i butèi i se speta da la Pro Loco on calendario de spetàcoli a ciel seren, con comedie, mùsica e cinema. Insoma on saco de bele iniziative che i butèi spera de portar a conpimento, grazie a l'aiuto de i insegnanti e de tuto el mondo de i "grandi".

[torna sopra]