|
Editoriale
Vorìa on'istà fresca... suta... chieta...
No ghe xe lìmiti a le brame: solo che ognuno ga le sue e tute le viaja co esigenza prioritaria... Anca d'istà!
 |
| Alba sul mare. (foto Giorgio Marinelli) |
Oramai ghe semo drento... in barba a le voje personali. Anca st'ano l'istà va via par conto suo, senza scoltare chi la vole calda e suta, chi la preferisse morbia e fresca, chi la vorìa chieta e rilassante, chi cussì cussì e su par zo... Gnente da fare: el tenpo no 'l scolta nissun, el tira vanti come la ghe gira! Par fortuna, senò el deventarìa mato anca lu! Chi xe che ghe la farìa a starghe drio a le pretese de i òmeni? Gnanca el Signore che l'è el paron del vapore...
Cussì, in mezo a sto giavascaro de esigenze, preparémose a sentire: "orco can, piove anca oncò!", "gheto sentìo che candela?", "mama mia, che afa!", "speremo che se rafresca", "che la dura tanto sta calura?", "gheto sentìo le prevision?", "mi no me ricordo on'istà cussì balorda!", "doman mi gavarìa da partire: come se fa?", "gài dito che 'l pol canbiare?", "se la dura cussì, a ghemo butà via i schei par gnente", "có se dise scarogna: proprio oncò a ga da piòvare! Me digo che te si ti che te porti pégola!", "beato ti che te vè in ferie d'inverno", "no ghè pi relijon gnanca là de sora!", "a ghe vorìa la bacheta de Mosè", "speremo che stanote piova, cussì doman...", "me digo che oncò a croa le róndene cote!", "la tera te l'orto xe piena de crepi", "se no la canbia a ghe lassemo le pene", "par carità, no sta' ciamar desgrazie", "gheto visto che tenpestada?", "gheto n'idea de come la narà finire?", "'desso no serve benedizion", "ti che te ghè 'l filo direto co là in alto, dighe che semo sassinà da le bigatele", "le canpane bison sentirle sonare tute, caro mio: i ga fato massa sperimenti!", "tasi, tasi che me vedo le buele in man!", "se la va tanto de longo, a me toca desfare le valise!", "speta desperarte: el primo dì che se va in montagna no se fa el formajo!"
A so' senza fià! Ma questo xe solo un pìcolo canpionario de quelo che sentiremo dire tuti i santi dì in giro pa 'e nostre contrade, in canpagna, in sità, al mare, in montagna... La zente xe lìbera de lamentarse parché ghe xe la libertà de opinion. Al punto che anca mi son tentà de dire la mia in fato de tenpo estivo o tenpo de vacanze.
Me piasarìa tanto che par st'istà la rivista la podesse rivarghe bastanza presto ai nostri abonati e no come te i mesi passà che ghe xe abonati che ga 'ncora da ricévare el nùmaro de majo. Vorìa che na volta tanto le Poste le ne disesse ciaro parcossa no vien fato on servizio che xe stà pagà prima 'ncora de farlo. Massa còmodo volere i schei prima de fare el trasporto! A meno che no ghe sia calcossa contro el dialeto...
E nantra roba che me piasarìa vegnesse fata st'istà la xe che chi colàbora in modo continuo a la nostra rivista el se meta de inpegno a no farghe pi fare el "manovale" a chi ciapa in man i so scriti: xe de boto quindes'ani che tuti i mesi ghe toca fare senpre le stesse corezion, cavarghe le dopie e tirar via senpre i stessi acenti (gà, gò, pì, tè...), zontarghe senpre i stessi acenti (pèle, pégola, cussì, róndene...)... Basta vardare e confrontare el proprio artìcolo dopo che 'l xe stà stanpà... e dopo caso mai se pol parlàrghene!
Insoma, no par intaressi personali, ma pa 'l ben de la rivista, vorìa trasporti postali pi eficenti, na colaborazion puntuale e fata come dio comanda, par augurarghe
A TUTI NA BONA ISTà FRESCA... SUTA... E CHIETA: a postini, colaboratori e letori!
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Lujo-Agosto:
Editoriale
Vorìa on'istà fresca... suta... chieta...
No ghe xe lìmiti a le brame: solo che ognuno ga le sue e tute le viaja co esigenza prioritaria... Anca d'istà!
de Mario Klein
Memoria viva
El "Museo del Risorgimento e dell'età contemporanea" a Padova
Precedenti che giustìfica l'esistensa de un Musèo come questo novo. Storia de un vecio Musèo che da tanto tenpo no' esisteva più. Lavoro intenso e continuo par 'rivare al risultato. Serie de "reperti" de varia natura in te 'l periodo de sentosinquanta ani
de Gigi Vasoin
Da Verona
Un massacro quasi desmentegà
de Wanda Girardi Castellani
|
