|
Da Vicenza
La Jina "caregheta"
La caressava el silensio, el silensio de la sera, e i so oci i sercava spassi sconfinà in chel gnaro inpolvarà che jera la corte. Dove ogni stajon passà la lassava el segno: na batalia de vita, lassando un savor forte e amaro, dàndote quei scorloni e quei brìvidi che pol darte la libertà de mòvarte, de decìdere, e saver de esìstere. Come la jera dolse quela creatura cussì pìcola, co i oci celeste sbiavo e le dresse a incoronarghe la testa, pa farla quasi diventare na s'cianta più grande. Ela, co el soranome de Jina "caregheta". Na nana paralisà le ganbe. Ah! Sì, la so voja de libertà la jera tanta. Costreta a star senpre sentà in quela bassa carega de paja, dove pa mòvarse la doveva fare un grande sforso, e urtarse co i brassi, fasendo 'ndare la caregheta de qua e de là. Pa rivare fora in corte la spetava che do àneme bone i la alsasse pa superare i tre scalini che i la separava da quelo che ela ciamava "la vosse de l'aria", "le giosse de vita", "l'ora de i me sogni", la corte. La luce, el sole co i so ricami de oro, le ale de sisila che le ghe sussurava l'èstasi lesiera de na libertà, dove la so fantasìa la spassiava in ogni nota del tenpo. Tuti i so sogni i jera fermi in chel tapéo verde dove in te le calde sere d'istà, i amissi de la corte, un son de chitara e vece canson desmentegà, i la faséa sentire viva, e parte de l'umanità.
La so vosse: come el rossignol de la note, no la se stufava mai e la continuava a domandare: "Dài, dài càntame 'Signora Fortuna' almanco quela". L'amore pa ela la jera na orassion, na perla sul filo de la memoria che pian dispanava parole; ma quando la strofa rivava: "Mamma, passione mia, Tu sei la miglior grazia che ci sia", la cominsiava a piànzare, sangiutare, come se qualchedun dovesse portarghe via el so ùnico ben: so mama.
La siora Celeste na dona alta, magra, co le dresse anca ela girà torno a la testa la rivava de filata sigàndone de tuto co el tìpico dialeto venessian, zontàndoghe anca: "Ciò, ti bruta trogia gheto altro da cantare?"
Muta, ferma, mortificà, co i me dódese ani, vardavo la Jina a sugarse i oci. "No sta' miga badare me mama seto! Ela la ga paura che mi staga male, che qualchedun me fassa qualche malagrassia, ma mi pianzo pa comossion. Dài, dài no sta' badarghe, càntame 'Violino Tzigano'."
La vardavo muta co un gropo a la gola ch'el me blocava la vosse. Intanto el prà verde dove jèrimo sentà el pareva mòvarse: l'erba briscolàndose pian la cantava co mi. Le note in te la boca del vento le se perdeva co la me vosse, e la Jina alsando el so ventalio venessian la vardava el celo disendo: "Eco, vàrdeme là, fra le prime stele, vàrdeme in t'el ciaro de la luna co un vestito rosso, che anca mi balo, balo el tango."
"Sona, sona par mi, Luciano!" Faséndoghe un soriso al nostro amico che sonava la chitara. Le so pìcole man come bianche colonbe le se liberava ne l'aria, verso chel tenpo che la portava fora da la realtà, dove na dona andalusa vestìa de rosso la coloriva i so sogni, e le so ganbe le podéa vibrare come le corde de quela chitara che tanto la faséa sognare.
Sere d'istà perse in t'el veludo del tenpo, mascherà de fantasmi e de rose, e de onbre màgiche. El gera stà proprio magico chel momento che per la Jina "caregheta", tràmite la Congregassion de la Carità la jera riussìa dopo tante domande che i ghe donasse na carossela par disàbili. La pareva na grande poltrona co de le rode smisurà. E là sentà sora la pareva sparire e pèrderse in un mondo tuto suo, disendo: "Urta, mama, urta la carossela; finalmente posso anca mi 'ndar védare el corso, e podemo 'ndare al cinematògrafo a l'aperto!"
Tuta la corte e tuta la contrà la jera fora quando ela passava. "Vardème, done, vardème, vado incontro a la vita, a l'amore, vado védare 'Via col Vento'."
Le làgreme co na luce solitaria de amore e contentessa le ghe bagnava le so corte ganbe. Posàndoghe na margherita fra le dresse ghe disevo: "Jina, te ghè el profumo de la vita, de la primavera e te me pari na principessa." La so pìcola e rosa man la se slongava e la me donava una caressa diséndome: "Dài, dài, urta la carossela e càntame 'Signora Fortuna'."
[torna sopra]
|
 |
Archivio
| 2022 |
21 |
20 |
19 |
18 |
17 |
16 |
15 |
14 |
13 |
12 |
11 |
10 |
9 |
8 |
7 |
6 |
5 |
4 |
3 |
2 |
1 |
|
|
|
|
Dal nùmaro de Lujo-Agosto:
Editoriale
Vorìa on'istà fresca... suta... chieta...
No ghe xe lìmiti a le brame: solo che ognuno ga le sue e tute le viaja co esigenza prioritaria... Anca d'istà!
de Mario Klein
Memoria viva
El "Museo del Risorgimento e dell'età contemporanea" a Padova
Precedenti che giustìfica l'esistensa de un Musèo come questo novo. Storia de un vecio Musèo che da tanto tenpo no' esisteva più. Lavoro intenso e continuo par 'rivare al risultato. Serie de "reperti" de varia natura in te 'l periodo de sentosinquanta ani
de Gigi Vasoin
Da Verona
Un massacro quasi desmentegà
de Wanda Girardi Castellani
|
