Memoria viva

El "Museo del Risorgimento e dell'età contemporanea" a Padova
Precedenti che giustìfica l'esistensa de un Musèo come questo novo. Storia de un vecio Musèo che da tanto tenpo no' esisteva più. Lavoro intenso e continuo par 'rivare al risultato. Serie de "reperti" de varia natura in te 'l periodo de sentosinquanta ani

Na vecia stanpa che mostra la insuression de studenti e de popolani a Padova contro i austriaci l'8 febraro 1848.

Padova doveva avere un Musèo del Risorgimento e de l'Età contenporanea. Par un saco de razon che sarìa longo scrìvarle tute. Ghe ne basta quatro: l'8 febraro 1848, giorno de la rivolta de studenti e popolani contro i austriaci, xe stà "cronologicamente" el primo de i moti de libertà e de indipendensa che xe sucesso in Europa quel'ano; el nùmaro de i padovani che, o ne l'esèrcito piemontese o co' Garibaldi, xe scapà par andare a conbàtare in te 'l 1848, '49, '59, '60, '66; la posission che ga vudo Padova quando, dopo Caporetto, la xe deventà "la capitale del fronte" co' tute le conseguense e le responsabilità relative; la decorassion de medaja d'oro al valore per la Resistenza che ga 'vudo la nostra Università, ùnica in Italia, par la alta partecipassion de professori e de studenti.
Padova doveva avere 'sto Musèo, anca parché in passato lo gaveva za avudo. E qua dovemo fare un passo indrìo co' i ani. In te 'l 1869 gera stà fata a Milano la "Società di Solferino e S. Martino" par dare "onorata sepoltura" ai resti de 11.000 caduti ne le do famose batalie del 24 giugno 1859. Le batalie de Solferino e S. Martino ne la II guera de Indipendensa italiana, vinte da i franco-piemontesi contro i austriaci, gaveva spianà la strada verso l'Unità de l'Italia. I fondatori de la "Società di Solferino e S. Martino" gera stà i lonbardi Torelli e Cavriani, el veronese Legnazzi, i padovani Vincenzo Stefano Breda e Carlo Maluta. Gera stà domandà un contributo a tuto el Paese par fare do Cese-ossario e Padova gaveva dà la quantità più alta de aiuti fra le varie sità italiane, tanto che in te 'l 1871 la sede de la Società gera stà portà ne la nostra sità. Fate le do Cese-ossario, la Società gaveva continuà, come che la continua anca 'desso, la so atività co' tante òpere che ga fato de Solferino e S. Martino do stupendi parchi de la memoria de i caduti e de l'amore de Patria. Durante le presidense de la Società da parte de Vincenzo Stefano Breda dal 1883 al 1903 e de Carlo Maluta dal 1903 al 1910 xe stà preparà i do Musèi. Par farli la Società ga racolto canoni, s-ciopi, baionete, spade, rivoltele, divise, bandiere, galiardeti, quadri, arassi, manifesti, carte geogràfiche, libri, documenti, statue, tuto materiale relativo a le do batalie sia da parte italiana come francese e austriaca. 'Sta roba xe stà portà provisoriamente a Padova e dà "in comodato" al Comune, che, da par suo, e co' altro materiale ch'el gaveva tirà sù da i Veterani del 1848, ga fato in te i locali de Piassa del Santo nel 1913 un Musèo del Risorgimento. Co' la classe de la scola elementare "R. Ardigò", so' stà portà a visitarlo. No' ve digo la emossion e l'inpression che go provà, soratuto par le pressiose spiegassion che ne ga dà el Maestro Gino Faggian.
Purtropo in te la seconda metà de i ani '30 el Comune de Padova ga dovudo dare indrìo a la Società tuto el materiale, parché intanto gera stà fati i fabricati de i do Musèi, uno a Solferino, l'altro a S. Martino. 'Sti do Musèi, richi de "reperti" stòrici, artìstici, militari, xe visitàbili e visità da un saco de zente par tuto l'ano.

Fassoletto del 1861 co Vittorio Emanuele II e el fiolo Umberto.

Padova cussì xe stà sensa Musèo par tanti ani. El mèrito de avere pensà a queo novo xe stà de la precedente Aministrassion comunale, de averlo fato de l'ultima Aministrassion. El xe stà un lavoro longo, intenso, sensa respiro parché, oltre al materiale disponìbile, ghe ne xe stà tirà sù ancora in quantità enorme. El "Comitato scientifico" e i funsionari del Comune se ga dà tanto da fare. Sercando a drita e a sanca, i ga trovà 'na inteligente colaborassion de Enti pùblici e privati, più le generose donassion de sitadini che se ga oferti. El Musèo xe stà inaugurà el 7 de febraro de 'sto ano dal Sìndaco Giustina Mistrello Destro, a la presensa del Ministro de i Beni Culturali, on. Urbani, de autorità polìtiche, civili e religiose. El pùblico ga scominsià le vìsite el giorno dopo. La sede del Musèo xe la parte del piano nòbile del Pedrocchi che varda verso le piasse. No xe da seno un caso che sia stà sielto el Pedrocchi, che praticamente par l'època quando ch'el xe stà fato e par i fati patriotici ch'el ga 'vudo, a Padova xe un vero e proprio monumento risorgimentale.
El "percorso espositivo" del Musèo se svilupa in sete stanse. La prima se riferisse al periodo 1797-1847, cioè dal tramonto de la Republica de Venezia a la cospirassion de i primi movimenti rivolussionari soto la dominassion austriaca. La seconda al periodo 1848-1849 co' la insuression contro l'Austria de l'8 febraro, la difesa de Vicensa, la difesa de Venezia. La tersa al periodo 1850-1866 che porta a l'Unità de l'Italia. La quarta al periodo 1867-1914 co' la graduale costitussion del Regno. La quinta al periodo 1914-1918, cioè la Grande Guera co' la liberassion de Trento e Trieste. La sesta al periodo 1919-1943 co' la nàssita del fassismo che ga portà a la seconda Guera mondiale. La sètima al periodo 1943-1948 che ga segnà la fine de la Guera, la Resistenza, la liberassion e la Repubblica. Ma el Musèo no' ga un caràtere tradissionale, "ottocentesco" par intèndarse. Ghe xe, da seno, s-ciopi, baionete, bandiere, divise, quadri, statue, medaje, ma ghe xe anca tanti documenti, manifesti, libri, fotografìe, stanpe, che fa del "percorso espositivo" un aspeto vivo e intenso de la vita de la sità e de la so provincia. El xe un aspeto che abrassa anca el svilupo "socio-economico" del teritorio via via che la storia camina. Xe par questo che i visitatori, anca i manco studiati, podarà rèndarse conto che polìtica, storia, economìa, "socialità", core insieme e se ingropa l'una co' l'altra.
Ogni "reperto" xe sistemà convenientemente o su i muri o in eleganti vetrine e ogni particolare, anca el più pìcolo, ga 'na propria "didascalia" co' in più, in vari casi, el nome del donatore.
Le notissie che gavemo, fin che so' drio scrìvare 'ste righe, ne dize che la presensa de visitatori xe intensa e continua. Me auguro che sia senpre cussì, soratuto da parte de i zóvani parché conóssare el proprio passato xe un sistema par decìdare co' giustessa, co' razon, co' bon senso el proprio futuro.

[torna sopra]