Da Verona

Un massacro quasi desmentegà

La ciesa de Khor Virap e el monte Ararat

La g'avéa un nome insòlito, Sima, e l'era 'na doneta za avanti co' i ani, de 'n metro e meso, sì e nò, sempre de corsa! La mastegava-sù un fià de veronese smissià a l'italian e a l'armeno, la so lingua natìa. Scapà ci-sa-come al massacro de la so gente, da parte de i turchi, l'era riparà a Verona dove l'avéa catà casa e amor. Pura tante olte l'ò vista co' la testa bassa e i oci mori, lustri de pianto e quando qualchedun la interogava, la scurlàa la testa e la risposta, sottovoçe, l'era sempre quela: "Ah... robe teribilìssime!"
L'Armenia, el cui pòpolo, rivà da la Frisia, el fonda le radise za nel I milenio a.C., l'è costituì da un grande altopiano fra el Mar Nero, el Mar Caspio e 'l Mediteraneo e el conprende la metà orientale de la Turchia, l'atual Repùblica Armena e altri teritori a nord-ovest de l'Iran, de l'Azerbaigian e nel sud de la Georgia.
El monte principale l'è l'Ararat (5156 metri) andove che, finìo el diluvio universal, l'à atracà l'arca de Noè.
Quel del pòpolo armeno l'è stà el primo genocidio del XX sèc., un sècolo che 'l g'à 'vu, in 'sto canpo, un ben triste primato ne la storia del mondo. El tèrmine "genocidio" el g'à radise greche ("stirpe" e "ucision") ma l'è stà conià, novo, nel 1944 da Raphael Lemkin. El "genocidio", come l'è stà definì a le Nassioni Unite nel 1948, l'è el pèso de i crìmini contro l'umanità parché l'è direto a la distrussion totale de 'n grupo nassional, ètnico, rassial o religioso.
Da l'Anatolia nel 1915 par la prima olta, dunque, s'à inescà, da parte de i turchi, el propòsito de scancelar un intiero pòpolo colpévole solo de esìstar. 'Na "solussion finale", perpetrà po' su i ebrei da i nassisti durante la seconda guera mondial (definì "shoah") e, anca da recenti e recentìssime crònache, su altra pora gente.
L'operassion portà a conpimento da i fioi de la mèsa luna, soratuto dal moimento nassionalista de i "Giovani turchi", in Asia Minor, l'à visto la sparission de un milion e meso de persone su 'na popolassion de gnanca du milioni de etnìa armena residenti alora ne l'impero otoman; un vero sucesso dato che ancò no' se cata, in quel canton de mondo, più gnanca un armeno; destrigadi tuti co' 'na velocità e 'na crudeltà da farghe invidia, no' solo ai nassisti ma parfin a le orde de Atila! Tanto par far 'n esempio, i òmeni i vegnéa sùbito isoladi e deportadi (ma in realtà tolti da le spese). A Trebisonda in particolar i òmeni forti e giovani i vegnéa ligadi tra de lori su de le barche apesantide con de le piere, po' urtade al largo del Mar Nero e lì fate segno de 'n futìo de tiri a bersalio fin a farle andar zo. Ancora 'desso sul fondo de 'sto mar, de fronte a Trebisonda, gh'è pien de ossi.

San Lazaro de i Armeni a Venezia.

I armeni i à ciamà el so genocidio "Metz Yeghèrn", cioè "grande male" e no' gh'è dubio che grande el de sia stà!
Del meso milion scarso che s'à salvà, in parte grassie a l'avansada da est de l'esèrcito russo, e in parte parché residenti a Istanbul e inissialmente anca a Smirne, çità viçine a sedi diplomàtiche straniere, un pochi i è restà ne l'Union Sovietica, altri i s'à sparpajà pa 'l mondo, Amèrica conpresa; 'na "diaspora" che à tirà drento anca l'Italia e in particolar el nostro Vèneto, con special riferimento a Venessia. Ma ne la çità lagunare i armeni i gh'era za de casa fin da i primi tenpi, tanto che diversi antichi documenti vèneti i parla de 'sto pòpolo come "benemerita e prediletta nassion". A testimoniar i boni raporti tra Venessia e i armeni gh'è ancora, tra l'altro, la splèndida isola de san Lazaro de i Armeni, concessa da la Serenìssima nel 1717. A Venessia inoltre è stà stampà el primo libro in armeno nel 1512.
El nome uficial de la so cesa l'è "Cesa Apostolica Armena" dato che el cristianésimo el ghè stà portà da i du apòstoli Taddeo e Bartolomeo, propio lì martirisadi. Ma l'è stà po' grassie a la predicassion de San Gregorio che nel 301 d.C. el cristianésimo in Armenia l'è deventà religion de Stato. El "genocidio" de i armeni, cristiani ortodossi e catòlici, no' l'è stà 'na guera santa, come che i l'avéa proclamà i turchi, ma i "organizadori" i ghe l'à lassà crédar a la so popolassion, quasi tuta analfabeta e da sempre nemiga de i "infedeli". In realtà, come sempre, la rason l'è stà quela de poderse inpadronir, atraverso 'na crudelìssima pulissia ètnica, de le tere e de le richesse armene.
La fine del regime turco, seguì a la fine de la prima grande guera e l'avento al comando de Kemal Ataturk no' l'à cambià la situassion, e tra el 1920 e el 1922 con l'ataco a la Cilicia armena e el massacro de Smirne el novo governo l'à tentà de perfessionar el "genocidio". Dopo, no' è restà più un sol armeno vivo in Turchia.
Gh'è da zontarghe che 'sto "genocidio" non solo l'è restà sensa castigo, ma el g'à 'vu pura un bon tornaconto, infati, la magior parte del teritorio armeno ancò el fa parte de la Turchia e l'armeno el vive ancora 'desso, e da quasi un sècolo, ne la più granda "diaspora" conossù da l'evo moderno.

[torna sopra]